ސިނާއީ ބޭނުންތަކަށް ތިލަފުށިން ބިން ކުއްޔަށް ދޭން ހުޅުވައިލީ، ސަރުކާރުން ބޭނުންވި ބަޔަކަށް އަގުހެޔޮކޮށް ބިންތަކެއް ދިނުމަށް ފަހުކަން ހާމަވެއްޖެ އެވެ.

ތިލަފުށިން ބިން ކުއްޔަށް ދޫކުރަން ހުޅުވައިލީ ނިމިގެން ދިޔަ ޖުލައި މަހު އެވެ. ނަމަވެސް އޭގެ ކުރިން ގާތްގަނޑަކަށް 70 ވަރަކަށް ބިން، ސަރުކާރުގެ އިސް މީހުންނާ ގުޅުން އޮންނަ ފަރާތްތަކަށް އަގުހެޔޮ ރޭޓެއްގައި ދޫކޮށްފައިވާ ކަމަށް، އެ މައުލޫމާތު އެނގޭ މަސްދަރަކުން މި ނޫހާ ވާހަކަ ދައްކަމުން ބުންޏެވެ.

އެ ބިންތައް ދޫކުރީ އިއުލާނު ކުރުމެއް ނެތި، ހަމައެކަނި ހުށަހެޅި ސިޓީއަކަށެވެ. ސިޓީ ހުށަހެޅި ފަރާތްތަކަށް އަކަފޫޓަކަށް 5ރ. ގެ ރޭޓުން ބިން ދޫކުރިއިރު، މިދިޔަ މަހު ކުރި އިއުލާނާ ގުޅިގެން ބިން ކުއްޔަށް ދޫކުރަނީ އަކަފޫޓެއް 8ރ. އަށެވެ. އިއުލާނުގެ ދަށުން ދޫކުރާ ބިންތަކުގެ އެހެން ރޭޓުތައް ވެސް ދެގުނަ ބޮޑެވެ.

ސިޓީލައިގެން ދޫކުރި ބިން

• އެކްއިޒިޝަން ފީ: އަކަފޫޓަކަށް 38.55ރ.
• ސީއެސްއާރު: އަކަފޫޓަކަށް 60ރ.
• ކުލި: އަކަފޫޓެއް 5ރ.
• މުއްދަތު: 25 އަހަރު

އިއުލާނުގެ ދަށުން ދޫކުރާ ބިން

• އެކްއިޒިޝަން ފީ: އަކަފޫޓަކަށް 60ރ.
• ސީއެސްއާރު: އަކަފޫޓަކަށް 120ރ.
• ކުލި: އަކަފޫޓެއް 8ރ.
• މުއްދަތު: 25 އަހަރު

މި ރޭޓުތަކަށް ބަލާއިރު، ސިޓީ ލައިގެން ހޯދި 5،000 އަކަފޫޓުގެ ބިމުގެ އެކުއިޒިޝަން ފީ އާއި ސީއެސްއާރުގެ ގޮތުގައި ދައްކަން ޖެހެނީ 492،720ރ. އެވެ. މަހު ކުލީގެ ގޮތުގައި 25،000ރ. އެވެ.

ނަމަވެސް އިއުލާނުގެ ދަށުން ދޫކުރާ 5،000 އަކަފޫޓުގެ ބިމަކަށް އެކުއިޒިޝަން ފީ އާއި ސީއެސްއާރުގެ ގޮތުގައި 900،000ރ. ދައްކަންޖެހޭނެ އެވެ. އަދި މަހު ކުއްޔަށް 40،000ރ. ދައްކަން ޖެހޭނެ އެވެ.

މިފަދަ މުއާމަލާތަކީ، ކޮރަޕްޝަން ހުއްޓުވުމާއި މަނާކުރުމުގެ ގާނޫނުގެ ދަށުން ކުށެކެވެ. އެ ގާނޫނުގައި ބުނެފައި ވަނީ ވަކިފަރާތަކަށް ލުޔެއް، ނުވަތަ ފަސޭހައެއް، ނުވަތަ ހެވެއް، ނުވަތަ އެއްވެސް ބާވަތެއްގެ މަންފާއެއް ލިބިދިނުމަށްޓަކައި ކަމެއް ކުރުމަކީ ކުށެއް ކަމަށެވެ.

އެފަދަ ކުށްތަކުގެ އަދަބަކީ ގިނަވެގެން ހަތް އަހަރު ދުވަހުގެ މުއްދަތަށް ޖަލަށްލުން، ނުވަތަ އަރުވާލުން، ނުވަތަ ގޭގައި ބަންދުކުރުމެވެ.