މާލެ ސިޓީ ކައުންސިލުން ހުޅުމާލޭގެ މުނިސިޕަލް ހިދުމަތްތައް ދިނުމަށްޓަކައި ކުރަންޖެހޭ މަޝްވަރާތައް ކުރިއަށްދާ ކަމަށާއި އަންނަ މަހު އެ ހިދުމަތް ފެށޭނެ ކަމަށް ލަފާ ކުރެވޭ ކަމަށް މޭޔަރު އާދަމް އާޒިމް ވިދާޅުވެއްޖެ އެވެ.

"އަދަދު" އާ ވާހަކަ ދައްކަވަމުން އާޒިމް ވިދާޅުވީ ހުޅުމާލޭގައި މުނިސިޕަލް ހިދުމަތް ދިނުމަށް އެޗްޑީސީ އާއި ފައިނޭންސް މިނިސްޓްރީއާއެކު މިހާރު ވެސް މަޝްވަރާ ކުރަމުން އަންނަ ކަމަށެވެ. އަންނަ މަހުގެ ތެރޭގައި މުނިސިޕަލް ހިދުމަތް ފަށަން އެއްބަސްވުމަކަށް އާދެވޭނެ ކަމަށް މޭޔަރު ވިދާޅުވި އެވެ.

"އެޗްޑީސީ އާއި ފިނޭންސް އާ މަޝްވަރާކުރެވެމުން މިދަނީ. ލަފާކުރެވެނީ އަންނަ މަހުގެ ތެރޭގައި އެއްބަސްވުމަކާއި ހަމައަށް އާދެވޭނެ ކަމަށް. އެގްރީމެންޓް އެކުލަވާލުމުގެ މަސައްކަތްތައް ވެސް ކުރިއަށް އެބަދޭ،" އާޒިމް ވިދާޅުވި އެވެ.

އެގްރީމެންޓު އެކުލަވާލުމުގައި ހިމަނަނީ މި މަސައްކަތުގެ ސްޓާފުން ނެގުމާއި ކައުންސިލަށް ހަވާލުކުރާ ބިންތައް ކަނޑައެޅުމާއި އަދި ޓްރާންސްފާ ކުރެވޭ ވެހިކަލްތަކުގެ މަސައްކަތް ކަމަށް ވެސް އާޒިމް ވިދާޅުވި އެވެ.

ހުޅުމާލޭގެ މުނިސިޕަލް މަސައްކަތް މާލެ ސިޓީ ކައުންސިލްގެ ދަށަށް ބަދަލުކުރަން ސަރުކާރުން ނިންމީ، ޑިސެމްބަރު 31، 2023 ގަ އެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެރޭ ކުރެއްވި ޕޯސްޓެއްގައި ވިދާޅުވީ މާދަމާއިން ފެށިގެން ހުޅުމާލޭގެ މުނިސިޕަލްޓީގެ އެންމެހާ މަސައްކަތެއް މާލޭ ސިޓީ ކައުންސިލަށް ބަދަލުވާނެ ކަމަށެވެ.

އެ ނިންމެވުމަށް މިހާރު ހަތް މަސް ވެފައިވާއިރު އަދިވެސް ހުޅުމާލެ މުނިސިޕަލް މަސައްކަތް ސިޓީ ކައުންސިލުން ފަށާފައި ނުވެ އެވެ. މިކަމާއި ގުޅިގެން ކުރިންވެސް "އަދަދު" ނޫހުން ސުވާލުކުރުމުން މޭޔަރު ވިދާޅުވީ މި މަސައްކަތް ނުފެށި ލަސްވަނީ ބަޖެޓު ހަމަނުޖެހިގެން ކަމަށެވެ.