މިއުނިކް (އޮގަސްޓް 18) - ޕެނަލްޓީ ޖަހައިގެން، 4-3 އިން ސްޓުޓްގާޓް ބަލިކޮށް، ބަޔާ ލެވަކޫސަނުން ޖަރުމަނުގެ ސުޕަ ކަޕް ކާމިޔާބުކޮށްފި އެވެ.

މެޗުގެ ބޮޑުބައި ލެވަކޫސަނުން ކުޅުނީ އެއް ކުޅުންތެރިއަކު މަދުކޮށް، އެއީ ފުރަތަމަ ހާފުގެ 37 ވަނަ މިނިޓްގައި ލެވަކޫސަންގެ މާޓިން ޓެރިއާ އަށް ރަތް ކާޑެއް ދެއްކުމުންނެވެ. ލެވަކޫސަންގެ ޓެރިއާ އަށް ރަތެއް ދެއްކިއިރު، މެޗުގެ ސްކޯ އަކީ، 1-1 އެވެ.

މިދިޔަ ސީޒަނުގައި ޖަރުމަނު ލީގާއި ކަޕްގެ ޗެމްޕިއަންކަން ހޯދި ލެވަކޫސަނުން ވަނީ 11 ވަަނަ މިނިޓްގައި، ވިކްޓަ ބޮނިފޭސް ޖެހި ގޯލުންނެވެ. އޭގެ ހަތަރު މިނިޓް ފަހުން ލެވަކޫސަނަށް އެއްވަރުކޮށްދިނީ ކްރިސް ފުހްރިޗް ނެގި ހުރަަހަކުން އެންޒޯ މިލޮޓް އެވެ.

އެ ނަތީޖާގައި އޮވެ، ފުރަތަމަ ހާފު ނިމުނު ކަމުގައި ވިޔަސް، ލެވަކޫސަނަށް ދިޔައީ އުނދަގޫ ކޮށެވެ. އެއީ، މި ފަހަރު ލެވަކޫސަނުން ސޮއިކުރި ޓެރިއާ އަށް ރަތެއް ދެއްކުމުންނެވެ. އޭނާ އަށް ސީދާ ރަތެއް ދެއްކީ ސްޓުޓްގާޓްގެ އެރްމެޑިން ޑެމިރޯވިޗަށް ނުރައްކާތެރި ފައުލެއް ކުރުމުންނެވެ.

ލެވަކޫސަނުގެ ކުޅުންތެރިއަކު މަދުވުމުގެ ފައިދާނަގައި، ސްޓުޓްގާޓުން ވަނީ 63 ވަަނަ މިނިޓްގައި ޑެނިސް އުންޑާވް ޖެހި ގޯލުން ލީޑުނަގައިފަ އެވެ. އެކަމަކު، މެޗުގެ ފުރިހަމަ ވަގުުތު ހަމަވާން ދެ މިނިޓަށް ވެފައި ވަނިކޮށް ޕެޓްރިކް ޝިކް ވަނީ ލަނޑު ޖަހައި، ލެވަކޫސަނަށް އެއްވަރުކޮށްދީފަ އެވެ.

ނަތީޖާ ނެރެން ޕެނަލްޓީ ޖަހަން ޖެހުނުއިރު، ލެވަކޫސަނުން ހަތަރު ޕެނަލްޓީ ވެސް ކާމިޔާބުކުރި އެވެ. އެކަމަކު، ސްޓުޓްގާޓުން ޖެހި ފަސް ޕެނަލްޓީގެ ތެރެއިން، ފެލިކްސް ކްރަޓްޒިގް އާއި ސިލަސް އަތުން ޕެނަލްޓީ ނާކާމިޔާބުވެ އެ ޓީމު ބަލިވީ އެެވެ.

މިއީ، ޒަބީ އަލޮންސޯގެ ކޯޗުކަމުގައި، މިދިޔަ 13 މަސް ދުވަސް ތެރޭގައި، ލެވަކޫސަނުން ހޯދި ތިން ވަނަ ތަށްޓެވެ. ލެވަކޫސަނުގެ ތާރީހުގައި ޖުމްލަ ފަސް ތަށި ހޯދިއިރު، ތިން ތަށި ކާމިޔާބުކުރީ އަލޮންސޯއާ އެކު އެވެ.