ގޯލްޑަން ފުޓްސަލް ޗެލެންޖު 2025 ގެ އޮފިޝަލް އޮންލައިން މީޑިއާ ޕާޓްނަރަކަށް "އަދަދު ސްޕޯޓްސް" ހަމަޖައްސައިފި އެވެ.

ގޯލްޑަން ފުޓްސަލް އެސޯސިއޭޝަންގެ ފަރާތުން މި އެއްބަސްވުމުގައި ސޮއިކުރެއްވީ، އެ އެސޯސިއޭޝަންގެ ރައީސް ރިލްވާން މޫސާ އެވެ. އަދަދު ނޫހުގެ ފަރާތުން މި އެއްބަސްވުމުގައި ސޮއިކުރެއްވީ "އަދަދު ސްޕޯޓްސް"ގެ އެޑިޓަރު، އައްޒާމް އަލިފުޅު އެވެ.

"އަދަދު ސްޕޯޓްސް" އާ ވާހަކަ ދައްކަމުން، ރިލްވާން ވިދާޅުވީ، މިދިޔަ ދެ އަހަރު އަދަދު އިން މަސައްކަތް ކުރީ ޕީއާރު ޕާޓްނަރެއްގެ ގޮތުގައި ކަމަށެވެ. އެކަމަކު، މި އަހަރު "އަދަދު ސްޕޯޓްސް" އޮފިޝަލް އޮންލައިން މީޑިއާ ޕާޓްނަރަކަށް ހަމަޖެއްސީ މިދިޔަ ދެ އަހަރު އެންމެ ފުރިހަމަ އަށް މީޑިއާ ކަވަރޭޖް ދީފައިވަނީ "އަދަދު ސްޕޯޓްސް" އިން ކަމަށްވާތީ ކަމަށް ރިލްވާން ފާހަގަކުރެއްވި އެވެ.

"އަދަދުގެ ނޫސްވެރިން ދަނޑުގައި ހަރަކާތްތެރިވޭ މެޗުތައް ކުރިއަށްދާއިރު ވެސް މީގެ އިތުރުން އަދަދުގެ ކަވަރޭޖްގެ ފުރިހަމަކަން އެހެން މީޑިއާތަކުން ވެސް ވަނީ ފާހަގަކޮށްފައި،" ރިލްވާން ވިދާޅުވި އެވެ.

މި އަހަރުގެ މުބާރާތުގައި 129 ޓީމުން ބައިވެރިވިއިރު, މި މުބާރާތުގެ ޗެމްޕިއަން ޓީމަކީ ބ. އޭދަފުށި އެވެ. އޭދަފުށިން ޗެމްޕިއަންކަން ހޯދީ 2023 ވަނަ އަހަރުގެ ޗެމްޕިއަން ލ. ގަން ފައިނަލުގައި ބަލިކޮށްގެންނެވެ.

މި މުބާރާތުގައި ބައިވެރިވުމުގެ ފުރުސަތު މިހާރު ހުޅުވާލާފައިވާއިރު, މުބާރާތް ފެށޭނީ އަންނަ އަހަރުގެ ޖެނުއަރީ މަހުގެ ހަތަރު ވަނަ ދުވަހު އެވެ.

މުބާރާތުގައި ބައިވެރިވުމުގެ ސުންގަނޑިއަކީ، އަންނަ މަހުގެ 10 ވަނަ ދުވަހެވެ.

އަންނަ އަހަރުގެ މުބާރާތުގައި މިހާރުވެސް ގިނަ ޓީމުތަކަކުން ބައިވެރިވެފައިވާ ކަމަށް ރިލްވާން މައުލޫމާތު ދެ އެވެ.

މި މުބާރާތުގައި ބައިވެރިވާ ޓީމުތަކުން ދޭ އެއްބާރުލުން ރިލްވާން ވަނީ ފާހަގަކުރައްވައިފަ އެވެ. އަދި ރަށްރަށުގެ ކައުންސިލުން މުބާރާތަށް ބަހައްޓާ އަހައްމިއްޔަތުކަން ފެނިފައި، މި މުބާރާތް އިތުރަށް ފުރިހަަމަކުރަން ގޯލްޑަން ފުޓްސަލް އެސޯސިއޭޝަނުން މަސައްކަތްކުރާ ކަމަށް ވެސް ވިދާޅުވި އެވެ.

އަހަރަކުން އަހަރަކަށް ގޯލްޑަން ފުޓްސަލް މުބާރާތުގައި ބައިވެރިވާ ޓީމުތައް އިތުރުވަމުން އަންނައިރު, މި އަހަރުގެ މުބާރާތަކީ ރާއްޖޭގެ ހުރިހާ އަތޮޅަކުން ޓީމުތައް ކުޅުނު މުބާރާތެކެވެ. އަދި މި އަހަރުގެ މުބާރާތުގައި 300 އަށްވުރެ ގިނަ މެޗު ކުޅުނެވެ.

ގޯލްޑަން ފުޓްސަލް އެސޯސިއޭޝަނުން އެންމެ ފުރަތަމަ މި މުބާރާތް ބޭއްވީ 2015 ވަނަ އަހަރު އެވެ. އޭގެ ފަހުން، މި މުބާރާތް ނުބޭއްވި ދިޔައީ، ކޮވިޑް-19ގެ ސަަބަބުން އައި މެދުކެނޑުމާ ހެދި އެވެ. މި މުބާރާތުގެ ޗެމްޕިއަންކަން ހޯދާފައިވަނީ، ތ. ތިމަރަފުށިން ތިން ފަހަރު، ލ. ގަން، ބ. އޭދަފުށި، ބ. ހިތާދޫ، މާފަންނު އަދި ހެންވޭރު އެވެ.

އަންނަ އަހަރު ފަށާނީ، ގޯލްޑަން ޗެރިޓީ ޝީލްޑް މެޗުންނެވެ. ބައްދަލުކުރާނީ، ގަމާއި އޭދަފުށްޓެވެ.