މާލެ ބަސް ޓާމިނަލް ފަހަތުގައި އޮންނަ ވެމްކޯ ކުނި އަޅާ ސަރަަހައްދުގައި ބަޔަކު މާރާމާރި ހިންގައިފި އެވެ.

އެއިން އަނިޔާ ލިބުނު މީހެއްގެ ފޮޓޯ މީހަކު ވަނީ ފޭސްބުކްގައި ޕޯސްޓްކޮށްފަ އެވެ. އެ ޕޯސްޓްގައި ލިޔެފައިވާ ގޮތުގައި އެއީ ކުނި އަޅާ ސަރަހައްދުގައި ހުސް ގޯނި ހޮވަން ގޮސް ހުރި މީހެކެވެ.

އޭނާއަށް ހަމަލާދީ މާރާމާރީ ހިންގީ އެ ސަރަހައްދުގައި ވެމްކޯގެ ޔުނީފޯމުގައި ހުރި ދެ މީހަކާއި ކުލަ ހެދުމުގައި ހުރި ދެ މީހަކު ކަމަށް އެ ޕޯސްޓުގައި ތުހުމަތުކޮށްފައިވެ އެވެ.

އެ ކަމާ ގުޅޭ ގޮތުން ސުވާލު ކުރުމުން ފުލުހުން ބުނީ އެ ކަމުގެ މައުލޫމާތު ލިބިގެން ފުލުހުން އެ ސަރަހައްދުގައި މިހާރު ހަރަކާތްތެރިވަމުންދާ ކަމަށެވެ.

މި މައްސަލާގައި މީހަކު ހައްޔަރުކުރި ކަމެއް އަދި ނޭނގެ އެވެ. ފުލުހުންގެ މީޑިއާ އޮފިޝަލް ބުނީ މައުލޫމާތު ލިބޭ މިންވަރަކުން މީޑިއާއާ ހިއްސާކުރަމުންދާނެ ކަމަށެވެ.