މިރޭ ފަށާ ދުނިޔޭގެ އެންމެ ފޯރިގަދަ، އެންމެ ގިނަ ބައެއްގެ މެދުގައި މަގްބޫލު ފުޓުބޯޅަ ލީގު "އިނގިރޭސި ޕްރިމިއާ ލީގު" ގެ އައު ސީޒަން ގެ ހުރިހާ މެޗެއް މީޑިއާނެޓުން ބެލޭނެ ކަމަށް އެ ކުންފުނިން ބުނެފި އެވެ.

މީޑިއާނެޓުން ބުނީ އެހެން އަހަރުތަކެކޭ އެއްފަދައިން އެކްސްކްލޫސިވް ރީބްރޯޑްކާސްޓާގެ ޙައިސިއްޔަތުން ލީގުގެ ހުރިހާ މެޗެއް މިއަހަރުވެސް އައިސް ނެޓްވޯކުގެ ޗެނަލްތައް މެދުވެރިކޮށް މީޑިއާނެޓު ހިދުމަތް ބޭނުންކުރާ ފަރާތްތަކަށް ބެލޭނެ ކަމަށެވެ.

ޕްރިމިއާ ލީގުގެ ފުރަތަމަ މެޗުގައި މިރޭ ދަންވަރު 12:00 ޖަހާއިރު ބައްދަލުކުރާނީ މެންޗެސްޓާ ޔުނައިޓެޑް އަދި ފުލަމް އެވެ. މާދަމާ ރޭ 09:30 ގައި ވެސްޓް ހަމް އަދި އެސްޓަން ވިލާ ބައްދަލުކުރާއިރު، އާދިއްތަ ދުވަހުގެ ރޭ 08:30 ގައި ޗެލްސީ އަދި މެންޗެސްޓާ ސިޓީގެ ފޯރިގަދަ ކުރިމަތިލުމެއް އޮންނާނެއެވެ.

ލީގު ޗެމްޕިއަން ގޮތުގައި ތަށި ދިފާއުކުރުމަށް މިފަހަރު ނިކުންނާނީ ވަރުގަދަ މެންޗެސްޓަރ ސިޓީއެވެ. އަދި ދެވަނަ ޑިވިޝަނުން ޕްރޮމޯޓްވެ މިފަހަރުގެ ޕްރިމިއާ ލީގުން ލެސްޓާ ސިޓީ، އިޕްސްވިޗް ޓައުން އަދި ސައުތެމްޕްޓަން ފެނިގެންދާނެ އެވެ.

ލީގު ފެށުމާ ދިމާކޮށް މީޑިއާނެޓުން ހާއްސަ ޕްރޮމޯޝަނެއް ވެސް ވަނީ ފަށާފައެވެ. އެ ޕްރޮމޯޝަން ކުރިއަށްދާނީ ސެޕްޓެމްބަރު، 30 ގެ ނިޔަލަށެވެ.

އެގޮތުން ޕެކޭޖު އަޕްގްރޭޑްކޮށްގެން ގުރުއަތުން ހޮވޭ ތިން ފަރާތަކަށް 65 އިންޗީގެ ޓީވީ، އެއާޑްސް ޕްރޯ ސެކަންޑް ޖެން އަދި ގޫގްލް ކްރޯމްކާސްޓްއެއް ދިނުމަށް ވަނީ ހަމަޖެހިފަ އެވެ.

މީޑިއާނެޓުން ވަނީ ފުޓުބޯޅައަށް ލޯބިކުރާ ގިނަ ދިވެހިންގެ ތެރޭގައި މަގްބޫލު ފެންޓަސީ ޕްރިމިއާ ލީގެއް ވެސް ތަޢާރަފްކޮށްފަ އެވެ.

ފެންޓަސީ ލީގުގެ ކޮންމެ މަހެއްގައި އެންމެ ގިނަ ޕޮއިންޓް ހޯދާ ފަރާތަކަށް 5،000 ރުފިޔާގެ އަގުހުރި އިނާމެއް ދިނުމަށްވެސް ވަނީ ހަމަޖެހިފަ އެވެ.

މީޑިއާނެޓުން އަންނަނީ ދިވެހި ފަސްގަނޑުގައި ކުޅޭ ބޮޑެތި ކުޅިވަރު މުބާރާތްތަކުގެ އިތުރުން ދުނިޔޭގެ އެކިކަންކޮޅުތަކުގައި ކުޅޭ ދިވެހިން އެންމެ ގަޔާވާ ކުޅިވަރު މުބާރާތްތަށް ދިވެހިންނާއި ހަމައަށް ގެނެސްދިނުމަށް ގިނަ މަސައްކަތްތަކެއް ކުރަމުންނެވެ.

އެގޮތުން ދާދި ފަހުން ވަނީ ދުނިޔޭގެ އެންމެ ބޮޑު މަލްޓި ސްޕޯރޓްސް އިވެންޓް "ޕެރިސް އޮލިމްޕިކްސް" ދިވެހިންނާއި ހަމައަށް ގެނެސްދީފަ އެވެ.

މީޑިއާނެޓު ކަސްޓަމަރުންނަށް ޓީވީ މެދުވެރިކޮށް އަދި މޯބައިލް ޑިވައިސްތައް މެދުވެރިކޮށް އެޕް ބޭނުންކޮށްގެން ކޮންމެ ތަނެއްގައި ހުރެވެސް އައިސް ނެޓްވޯކު މެދުވެރިކޮށް މެޗުތައް ބެލޭނެ އެވެ.