ނޭޕާލުގައި އަންނަ އާދިއްތަ ދުވަހު ފަށަން ނިންމާފައިވާ ސާފް 20 އަހަރުން ދަށުގެ މުބާރާތުގެ ގްރޫޕް ސްޓޭޖުގެ މެޗުތައް ކުޅޭ ދަނޑު ބަދަލުކުރަން އޯލް ނޭޕާލް ފުޓްބޯލް އެސޯސިއޭޝަން (އަންފާ) އިން ނިންމައިފި އެވެ.

ހަ ގައުމުގެ މެދުގައި ކުރިއަށްދާ 20 އަަހަރުން ދަށުގެ ސާފް ޗެމްޕިއަންޝިޕް، މި މަހުގެ 28 ވަނަ ދުވަހުގެ ނިޔަލަށް ކުޅެން ހަމަޖެހިފައި އޮތީ، ހުރިހާ މެޗެއް، ދަސަރަތު ރަންގްސާލާ ސްޓޭޑިއަމްގައި ކުޅޭ ގޮތަށެވެ. އެކަމަކު، އެ ދަނޑުގެ ހާލަތު ގޯސްވެފައި އޮތުމުން، އަންފާ އިން މިހާރު ނިންމާފައިވަނީ، އަންފާ ކޮމްޕްލެކްސް ދަނޑުގައި ކުޅޭ ގޮތަށެވެ.

އަންފާގެ ތަރުޖަމާނު ދިން މީޑިއާ އިންޓަވިއުއެއްގައި ބުނެފައިވަނީ، މަސައްކަތް ކުރަމުން އަންނަނީ ސެމީ ފައިނަލާއި ފައިނަލް މެދު ދަސަރަތު ސްޓޭޑިއަމްގައި ކުޅުމަށް ކަމަށެވެ.

މި މަހުގެ 13 ވަނަ ދުވަހު، އޭއެފްސީ ޗެލެންޖާސް ލީގުގައި ނޭޕާލްގެ ޗެމްޕިއަން، ޗާޗް ބޯއީސް ޔުނައިޓެޑާއި ބޫޓާންގެ ޗެމްޕިއަން، ޕަރޯ އެފްސީ ކުޅުނު މެޗު ހޯސްޓްކުރީ ދަސަރަތު ސްޓޭޑިއަމްގަ އެވެ. އެ މެޗަށް ފަހު، ދެ ޓީމުގެ ކޯޗުން ވެސް ވަނީ ދަނޑުގެ ހާލަތުގެ ޝަކުވާކޮށްފަ އެވެ.

އެ ހުރިހާ ކަމަކަށް ބަލާފައި، އަންފާ އިން ނިންމާފައިވަނީ، ރަނގަޅު މަރާމާތަކަށް ފަހު ނޫނީ، ސާފް 20 އަހަރުން ދަށުގެ މުބާރާތުގެ މެޗެއް ދަސަރަތު ސްޓޭޑިއަމްގައި ހޯސްޓް ނުކުރުމަށެވެ.

މުބާރާތުގެ ގްރޫޕް އޭގައި ހިމެނެނީ، ނޭޕާލް، ސްރީ ލަންކާ އަދި ބަންގްލަދޭޝް އެވެ. ގްރޫޕް ބީގައި ރާއްޖެ، އިންޑިއާ އަދި ބޫޓާން އެވެ.

މުބާރާތަށް އެންމެ ފުރަތަމަ ކަތުމަންޑޫ އަށް ދިޔައީ، ރާއްޖޭންނެވެ. ނޭޕާލުގައި މިއަދު ރާއްޖޭން ފަރިތަކުރުންތައް ފެށިއިރު، މިއަދުގެ އެކި ވަގުތުތަކުގައި، އިންޑިއާ އާއި ސްރީ ލަންކާ އަދި ބޫޓާނުން ނޭޕާލަށް ދާނެ އެވެ. ބަންގްލަދޭޝް ޓީމު ނޭޕާލަށް ދިއުމަށް ހަމަޖެހިފައިވަނީ މާދަމާ އެވެ.

މިއީ، 19 ނޫނީ 20 އަހަރުން ދަށަށް ބޭއްވޭ ސާފްގެ ހަ ވަނަ މުބާރާތެވެ. ފުރަތަމަ ދެ މުބާރާތް ކާމިޔާބުކުރީ ނޭޕާލުންނެވެ. އެކަމަކު، ދެން ކުޅުނު ތިން މުބާރާތުގެ ތަށި އުފުލާލީ ވެސް އިންޑިއާ އިންނެވެ.

މި މުބާރާތް ހޯސްޓްކުރަން އަންފާ އިން ބަޖެޓްކޮށްފައި ވަނީ، 250،000 ޑޮލަރެވެ. މީގެ އިން ވަކި ޕަސެންޓެއް ހަމަޖައްސައިދީފައިވަނީ، ނޭޕާލްގެ ސަރުކާރުންނެވެ.