ނިއު ދިއްލީ، އިންޑިއާ (އޮގަސްޓް 16) - އަންނަ އޮކްޓޫބަރު މަހު، ބަންގްލަދޭޝްގައި ބާއްވަން ޝެޑިއުލްކޮށްފައި އޮތް އައިސީސީ ވިމެންސް ޓީ20 ވޯލްޑް ކަޕް، އެ ގައުމުގައި ނުބޭއްވުނު ކަމުގައި ވިޔަސް، އިންޑިއާ އިން އެ ފުރުސަތު ބޭނުންނުކުރާނެ ކަމަށް ހާމަކޮށްފި އެވެ.

ބަންގްލަދޭޝް މި ވަގުތު ދާހިލީ ހަމަނުޖެހުމަކަށް ގޮސްފައިވާއިރު، މި މަހު ކުރީކޮޅުގައި، ބަންގްލަދޭޝްގައި ކުރިއަށްދާ މުޒާހަރާތައް ހޫނުވެ، ބޮޑުވަޒީރު ޝެއިހް ހަސީނާ އިސްތިއުފާ ދެއްވައި، އެ ގައުމު ދޫކުރައްވައި ވަނީ ފިއްލަވައިފަ އެވެ.

ކުރިއަށް އޮތް މަސްތަކުގައި ބަންގްލަދޭޝްގެ ހާލަތު ބަދަލުވާނެ ގޮތެއްގެ ސީދާ މަންޒަރު ސާފުނުވާތީ، އިންޓަނޭޝަނަލް ކްރިކެޓް ކައުންސިލް (އައިސީސީ) މިހާރު ވާހަކަ ދައްކަމުން އަންނަނީ، އޮކްޓޫބަރު ތިން ވަނަ ދުވަހު، ބަންގްލަދޭޝްގައި ފަށަން އޮތް ޓީ20 ވިމެންސް ވޯލްޑް ކަޕް އެހެން ގައުމަކަށް ބަދަލުކުރުމަށް ކަމަށް ރިޕޯޓްތައް ބުނެ އެވެ.

އޮކްޓޫބަރު 20 ވަނަ ދުވަހުގެ ނިޔަލަށް ޓީ20 ވިމެންސް ވޯލްޑް ކަޕް ކުރިއަށްގެންދަން ނިންމާފައިވާއިރު، ބަންގްލަދޭޝްގައި އެ މުބާރާތް ނުބޭއްވިއްޖެ ހާލަތެއްގައި، ދެން ހޯސްޓްކުރުމުގެ ފުރުސަތު ދޭން ވިސްނަނީ، ޔޫއޭއީ، އިންޑިއާ ނޫނީ ސްރީ ލަންކާ އަށް ކަމަށް ރިޕޯޓްތައް ބުނެ އެވެ.

އެކަމަކު، އިންޑިއާ އިން ވަނީ އެ ފުރުސަތު ދޫކޮށްލަން ނިންމައިފަ އެވެ.

އިންޑިއާގެ ކްރިކެޓް ބޯޑް، ބީސީސީއައިގެ ސެކްރެޓަރީ ޖެނެރަލް، ޖޭ ޝާހު ވިދާޅުވީ، އަންނަ އަހަރު އިންޑިއާގައި ވަންޑޭއިންޓަނޭޝަނަލް (އޯޑީއައި) ވިމެންސް ވޯލްޑް ކަޕް ބާއްވަން މަސައްކަތް ކުރަމުން އަންނައިރު، އޭގެ އެއް އަހަރު ކުރިއަށް އިތުރު މުބާރާތެއް ހޯސްޓްކުރުން ރަނގަޅެއް ނޫން ކަމަށެވެ.

"ޖެހިޖެހިގެން ދެ އަހަރު ދެ ވޯލްޑް ކަޕެއް ބޭއްވުން، މިއީ އެންމެ ރަނގަޅު ގޮތެއް ކަމަށް އަހަރެމެންނަށް ނުފެނޭ،" ޝާހު ވިދާޅުވި އެވެ.

ބަންގްލަދޭޝްގައި ކުރިއަށްދާ މުޒާހަރާތަކުގައި، 400 އަށް ވުރެ ގިނަ މީހުން މަރުވެފައިވާއިރު، ކްރިކެޓް ވޯލްޑް ކަޕް އެ ގައުމުގައި ހޯސްޓްކުރާނީ 10 ގައުމުގެ މެދުގަ އެވެ. ޖުމްލަ 23 މެޗު ކުޅެން ނިންމާފައިވާ މި މުބާރާތުގެ މެޗުތައް ކުޅެން ތާވަލުކޮށްފައިވަނީ، ސިލްހެޓާއި ޑާކާގަ އެވެ.

ރިޕޯޓްތައް ބުނާގޮތުން، ބަންގްލަދޭޝްގައި ނުބޭއްވިއްޖެނަމަ، އައިސީސީން މުބާރާތް ބޭއްވުމުގެ ފުރުސަތު ފުރަތަމަ ދޭނީ ސްރީ ލަންކާ އަށެވެ.