ގަވާއިދާ ހިލާފަށް ޕާކު ކުރުން ހުއްޓުވުމަށް މާލޭގެ މަގުތަކާއި ގޯޅިތައް ބައްދަލުވާ ބައެއް ކަންމަތިތަކުގައި ރަތް ރޮނގު ކުރަހައި، އެ ތަންތަނުގައި ޕާކު ކުރާ އުޅަނދުތައް ޓޯ ކުރަން ނިންމާފައިވާ ކަމަށް ކަމާބެހޭ އިދާރާތަކުން ހާމަކޮށްފި އެވެ.

މިހާރު މާލެއަށް ދިމާވެފައިވާ އެންމެ ބޮޑު އެއް މައްސަލަ ކަމަށްވާ ޕާކިންގެ މައްސަލަ ހައްލުކުރުމަށް، މާލެ ސިޓީ ކައުންސިލް، ޓްރާންސްޕޯޓު މިނިސްޓްރީ، ހޯމް މިނިސްޓްރީ، ފުލުހުން އަދި އެޗްޑީސީން ބައިވެރިވި ބައްދަލުވުމެއް މިއަދު ބޭއްވި އެވެ. އެއިން ކޮންމެ އިދާރާއެއް ވެސް މި ބައްދަލުވުމުގައި ތަމްސީލުކުރީ އެންމެ އިސްވެރިންނެވެ.

އެ ބައްދަލުވުމަށްފަހު ނޫސްވެރިންނާ ވާހަކަ ދައްކަވަމުން މާލެ ސިޓީގެ މޭޔަރު އާދަމް އާޒިމް ވިދާޅުވީ، މާލޭ މަގުތަކުގެ ކަންމަތިތަކުގައި ޕާކު ކުރުމަކީ ކަނޑައެޅިގެން މަނާ ކަމެއް ކަމަށެވެ. އަދި ރަތް ރޮނގު ކުރަހަން ނިންމީ އެކަން އިތުރަށް ސަމާލުކަން ގެނައުމަށް ކަމަށް އޭނާ ވިދާޅުވި އެވެ.

"ކަންކަން މަތީގަ، މުހިންމު ތަންތަނުގަ އަޅުގަނޑުމެން ރެޑު ލައިން ދަމަން ފަށާނަން. އެއާއެކު އެ ރެޑު ލައިން ހުންނަ ތަންތާ ޕާކު ކޮށްފި ކަމަށްވަންޏާމު ވަގުތުން އެ އެއްޗެހި ފުލުހުން އައިސް ނަގައިގެން ގެންދާނެ. މިކަން ކުރަން މިއުޅެނީ ހުރިހާ އެންމެނަށް ފަސޭހަ ކުރަންވެގެން،" މޭޔަރު ވިދާޅުވި އެވެ.

މަޝްވަރާތަކަށް ފަހު ހޯމް މިނިސްޓަރު އަލީ އިހުސާން ވިދާޅުވީ، ޕާކު ކޮށްފިނަމަ ޓޯ ކުރާނެ ނުވަ ސަރަހައްދެއް ކަނޑައަޅާފައިވާ ކަމަށާއި އޭގެ ތެރޭގައި އެންމެ ގިނައީ ސްކޫލުތައް ހުންނަ ސަރަހައްދުތައް ކަމަށެވެ.

ފުލުހުންގެ ސީޕީ އަލީ ޝުޖާއު ވެސް ވަނީ ގަވާއިދާ ހިލާފަށް ޕާކު ކުރާނަމަ ޓޯކުރާނެ ކަމަށާއި އެހެންނަމަވެސް އެއީ ފުލުހުން ކުރަން ބޭނުންވާ ކަމެއް ނޫން ކަަމަށް ވިދާޅުފަ އެވެ.

"ފަސޭހައެއް ނޫން މާލޭގަ ޕާކު ކުރާނެ ތަނެއް ނެތި އަދި މަގުތައް އެހާ ތޮއްޖެހިފަ އޮތްއިރު، ޕާކު ކުރަން މަނާތަނެއްގައި ޕާކު ކޮށްފައި އޮންނަ އެއްޗެއް ގެންދިއުން. އެހެންނަމަވެސް އެނގިލައްވާނެ އަޅުގަނޑުމެން މިކަން މިކުރަނީ ހުރިހާ ބޭފުޅުންވެސް އެ ފާހަގަކުރެއްވި ގޮތަށް މާލޭގަ ދިރިއުޅޭ ހުރިހާ ފަރާތްތަކުގެ ސަލާމަތާ ރައްކާތެރިކަމަށް،" ސީޕީ ވިދާޅުވި އެވެ.

މާލޭ ސަރަހައްދުގައި މިހާރު ވެސް 118،000 އަށް ވުރެ ގިނަ ވެހިކަލް ރަޖިސްޓްރީކޮށްފައިވާ ކަމަށް ޓްރާންސްޕޯޓު މިނިސްޓްރީން ބުނެ އެވެ. އޭގެ ތެރޭގައި އެކެއްގެ ނަމުގައި ވެސް ގިނަ އުޅަނދުތަކެއް ރަޖިސްޓްރީކޮށްފައިވެ އެވެ.