ދިވެހިރާއްޖޭގެ ފުރަތަމަ އިންޖިނިއަރިން މައުރަޒު ވިލާ ކޮލެޖުން މިއަދު ކާމިޔާބީއާއިއެކު ބާއްވައިފި އެވެ.

ވިލާ ކޮލެޖުގެ ހޯލުގައި އާންމުންނަށް ޒިޔާރަތް ކުރެވޭ ގޮތަށް ހުޅުވާލައިގެން ބޭއްވުން އެ މައުރަޒުގައި އިންޖިނިއަރިން ދާއިރާގެ 40 ޕްރޮޖެކްޓު ވަނީ ދައްކާލާފަ އެވެ.

"ޕްރޮޖެކްޓުތަކަކީ ވިލާ ކޮލެޖުން ހިންގާ އިންޖިނިއަރިން ޑިގްރީ ޕްރޮގްރާމްތައް ކަމަށްވާ މެކަޓްރޮނިކްސް، މެކޭނިކަލް އަދި އެލެކްޓްރިކަލް އާއި އެލެކްޓްރޮނިކްސް ކޯސްތަކުގެ ދަރިވަރުންގެ ފަހު އަހަރުގެ ޕްރޮޖެކްޓްތަކެއް،" ވިލާ ކޮލެޖުން ބުންޏެވެ.

މައުރަޒު ފަށްޓަވައިދެއްވީ ފެނަކަ ކޯޕަރޭޝަން ލިމިޓެޑްގެ އެމްޑީ މުއާޒު މުހައްމަދު ރަޝީދެވެ.

ވިލާ ކޮލެޖުން ރާއްޖޭގައި ބޭއްވި ފުރަތަމަ އިންޖިނިއަރިން މައުރަޒުގެ ތެރެއިން -- ފޮޓޯ: މިރާޝް ނާޝިމް / އަދަދު

މުއާޒް ވިދާޅުވީ ދުނިޔޭގެ އެކި ކަންކޮޅުތަކުގައި ޔުނިވާސިޓީތަކުގެ ދަރިވަރުން އިނޮވޭޓިވް އިންޖިނިއަރިން ހިޔާލުތައް ގެންނަމުންދާ ގޮތާއި، ރާއްޖޭގައި ވެސް މިގޮތަށް ރާއްޖޭގެ ލޭންޑްސްކޭޕަށް ފެތޭ އިންޖިނިއަރިން ސޮލިއުޝަންތަކަށް މަސައްކަތްކުރަން ޖެހޭ ކަމަށެވެ.

ރާއްޖޭގެ ޔުނިވަރސިޓީތަކުގެ ދަރިވަރުންނަށް އެހީތެރިކަން ބޭނުންވާނަމަ، އެހީތެރިކަން ފޯރުކޮށްދިނުމަކީ އުފާކުރާނެ ކަމެއް ކަމަށް ވެސް މުއާޒް ވިދާޅުވި އެވެ.

ވިލާ ކޮލެޖުން ރާއްޖޭގައި ބޭއްވި ފުރަތަމަ އިންޖިނިއަރިން މައުރަޒުގެ ތެރެއިން -- ފޮޓޯ: މިރާޝް ނާޝިމް / އަދަދު

މައުރަޒު ހުޅުވުމުގެ ރަސްމިއްޔާތުގައި ފެކަލްޓީ އޮފް އިންޖިނިއަރިންގެ ހެޑް އޮފް ސްކޫލް، އުދުމާ އަބްދުލް ލަތީފް ވަނީ އިންޖިނިއަރިންގެ ދާއިރާއިން ކޮލެޖުގެ ދަރިވަރުން ކުރިއަށް ދިއުމަށް މަގު ފަހިކޮށްދެއްވަމުން ގެންދަވާ ގޮތުގެ މައްޗަށް އަލިއަޅުއްވާލައްވާފަ އެވެ.

"މި މައުރަޒަކީ ހަމައެކަނި ހަރަކާތެއް ނޫން. މިއީ އިލެކްޓްރިކަލް އެންޑް އިލެކްޓްރޯނިކްސް، މެކޭނިކަލް އަދި މެކަޓްރޯނިކްސް އިންޖިނިއަރިންގެ ދާއިރާއިން ދަރިވަރުން ވޭތުވެ ދިޔަ އަހަރު ތަކުގައި ދެއްކި ހިތްވަރާއި ހުނަރާއި އުފެއްދުންތެރިކަމާއި ބުރަ މަސައްކަތުގެ ހެކި،" އުދުމާ ވިދާޅުވި އެވެ.

މި މައުރަޒުގެ ތެރެއިން ސޯލާ ހަކަތައާއި، ވޮއިސް ކޮންޓްރޯލް ކޮމްޕިއުޓަރު މެޝިންއާއި އެހެނިހެން އިނޮވޭޓިވް ޕްރޮޖެކްޓްސް ހިމެނެ އެވެ.