ރަނގަޅު އަހުލާގުގެ މަތީގައި ސާބިތުވެ، ޑިސިޕްލިން ހިފަހައްޓައިގެން ކޯޗުންގެ އިރުޝާދުތަކަށް ބޯލަނބައިިފިނަމަ ކާމިޔާބީއަކީ ދުރުގައި އޮތް ކަމެއް ނޫން ކަމަށް ކުޅިވަރާ ބެހޭ ވަޒީރު އަބްދުالله ރާފިއު (ރާއްޕެ) ވިދާޅުވެއްޖެ އެވެ.

މިނިސްޓަރު ރާފިއު މި ގޮތަށް ވިދާޅުވީ، 20 އަަހަރުން ދަށުގެ ގައުމީ ފުޓްބޯޅަ ޓީމު، ނޭޕާލުގެ ކަތުމަންޑޫ އަށް 20 އަހަރުން ދަށުގެ ސާފް ޗެމްޕިއަންޝިޕްގައި ކުޅެން ފުރުމުގެ ކުރިން އެ ޓީމާ ބައްދަލުކޮށް، ހިތްވަރު ދިނުމުގެ ގޮތުންނެވެ.

މި މަހުގެ ކުރިއަށްދާ ސާފް ޗެމްޕިއަންޝިޕަށް ގައުމީ ޒުވާން ސްކޮޑް އިއްޔެ ހަވީރު ފުރިއިރު, ފުރަތަމަ މެޗުގައި ގައުމީ ޓީމުން ނުކުންނާނީ ބޫޓާން އާ ދެކޮޅަށެވެ. އަދި ދެ ވަނަ މެޗުގައި ގައުމީ ޓީމުން ނުކުންނާނީ, އިންޑިއާ އާ ދެކޮޅަށެވެ. މީގެ ކުރިން ޒުވާން ގައުމީ ޓީމުން ވަނީ ސާފް ޗެމްޕިއަންޝިޕުގެ ލޯ މެޑަލް ކާމިޔާބު ކޮށްފަ އެވެ.

ގައުމީ ފުޓްބޯޅަ ޓީމުގެ ޑޮކްޓަރުގެ ޒިންމާ މީގެ ކުރިން އަދާކުރެއްވި ރާފިއު ވިދާޅުވީ، ކުރިން ބައެއް މުބާރާތްތަކުގައި ކުޅުންތެރިންގެ ފަރާތުން ރަނގަޅަށް ޑިސިޕްލިން މެއިންޓެއިން ނުކޮށް ހުރި މަންޒަރު ފެނިފައިވާ ކަމަށެވެ. އަދި އޭގެ ސަބަބުން އޭގެ ގެއްލުން މުޅި ޓީމަށް ވެފައިހުރި ކަމަށާއި ބައެއް ފަހަރު ޓީމާ ހަވާލުވެ ހުންނަ ކޯޗުގެ އިރުޝާދުތަކަށް ބޯނުލެނބުމުން ކޯޗު ޓީމު ދޫކޮށް ގޮސްފައި ހުރި މަންޒަރު ވެސް ފެނިފައިވާ ކަމަށް ރާފިއު ވިދާޅުވި އެވެ.

މިނިސްޓަރު ރާފިއު، 20 އަަހަރުން ދަށުގެ ޓީމުގެ ކުޅުންތެރިންނާ މުހާތަބުކޮށް ވާހަކަ ދައްކަވަނީ،---- ފޮޓޯ: ސްޕޯޓްސް މިނިސްޓްރީ

"ކާމިޔާބު ހޯދުމުގައި ވަރަށް ގިނަ ކަންކަން އެބަހުރޭ ފުރިހަމަ ކުރަން ޖެހޭ. އޭގެ ތެރެއިންވެސް އެއް ކަމަކީ، ރަނގަޅަށް ޑިސިޕްލިން މެއިންޓެއިން ކުރުން. އަޅުގަނޑަށް ފެނިފައި އެބަހުރި މިކަންކަން ނުވެ, އޭގެ އަސަރު މުޅި ޓީމަށް ކޮށްފައިހުރި މަންޒަރު ވެސް" ރާފިއު ވިދާޅުވިއެވެ.

ރާފިއު ވިދާޅުވީ، މުބާރާތައް ޓީމު ދާއިރު, ހަމަ ބައިވެރިވެލަން ދިޔުމުގެ ބަދަލުގައި ޓާގެޓެއް ކަނޑައަޅާ ކާމިޔާބީ އަށް މަސައްކަތް ކުރަން ޖެހޭ ކަމަށެވެ.

"ސިކުނޑީގައި އަބަދުވެސް ބަހައްޓާށޭ، މި ދަނީ ޕާޓިސިޕޭޓް ވާކަށް (ހަމަަައެކަނި ބައިވެރިވެލާލަށް) ނޫނޭ. މި ދަނީ ވިން ކުރާށޭ. އަޅުގަނޑުމެން މިދަނީ ކޮމްޕެޓިޓިވް ސްޕޯޓްސްއެއްގައި ކޮމްޕީޓްކުރަން (ވާދަވެރި ކުޅިވަރެއްގައި ވާދަކުރަން). ކޮމްޕީޓްކުރުމުގެ ބޭނުމަކީ މެޗުން މޮޅުވުން. ކޮމްޕެޓިޝަނެއްގެ ޓާގެޓަކީ އެ ވިން ކުރުން (މުބާރާތެއްގެ ޓާގެޓަށް ވާން ޖެހޭނީ މޮޅުވުން). އެއަށް ޓާގެޓް ނުކޮށްފިއްޔާ ވީވިލް ބީ ލޫޒިން (ބަލިވާނީ)،" 2021 ވަނަ އަހަރުގެ ސާފް ޗެމްޕިއަންޝިޕްގެ ކުރިން ގަަތަރުގައި ބޭއްވި ޓްރެއިނިން ކޭމްޕްގައި ޓީމުގެ މެނޭޖަރެއްގެ ޒިންމާ ވެސް އުފުއްލެވި ރާފިއު ވިދާޅުވި އެވެ.

ސަރުކާރުގެ ފަރާތުން ފުޓުބޯޅަ ކުރިއެރުވުމަށް ދޭން ޖެހޭ ފުރިހަމަ އެއްބާރުލުން ލިބޭނެ ކަމަށާއި ޒުވާން ޓީމުން މިކުރާ ދަތުރާ އެކު، މިއީ ރާއްޖޭގެ ފުޓްބޯޅައިގެ ކުރިމަގަށް ރަނގަޅަށް ކުރެވޭ ކަންތައްތަކުގެ ފެށުމެއް ކަމަށް، ހެދުމަށް ރާފިއު ވިދާޅުވި އެވެ.