ސްޕޯޓްސް މިނިސްޓަރު، އަބްދުﷲ ރާފިއު (ރާއްޕެ)، ކެބިނެޓަށް ހުށަހަޅުއްވައިގެން، ވަޒީރުންގެ މަޖިލީހުގެ މަޝްވަރާގެ މަތިން، "ގައުމީ ކުޅިވަރު ފަންޑް"ގެ މަސައްކަތް ކުރިއަށްގެންދަވަން ރައީސުލްޖުމްހޫރިއްޔާ، ޑރ. މުހައްމަދު މުއިއްޒު ނިންމަވާފައިވާއިރު، މި ފަންޑުގެ ބޭނުން ހެޔޮގޮތުގައި ހިފައިގެން، މެނުވީ ރާއްޖޭގެ ކުޅިވަރު ރަނގަޅު މިސްރާބަކަށް ދިއުމަކީ ދުރުގައި އޮތް ކަމެކެވެ.

އެއީ، މީގެ ކުރިން ވެސް ފަށާފައިވާ މި ފަދަ، ސްކޮލަޝިޕް ނޫނީ ފަންޑްތަކުގެ ކަންކަން ކުރިއަށްގޮސްފައި ހުރި ގޮތަށް ބަލާއިރު، މީގެ މަންފާ ރާއްޖޭގެ ކުޅިވަރަށް ޖުމްލަކޮށް ކުރާ މިންވަަރުން ފެންނަން އޮތް ހަގީގަތެވެ.

"...."ގައުމީ ކުޅިވަރު ފަންޑު"ގެ ނަމުގައި ފަންޑެއް ގާއިމުކުރެއްވުމަށް ރައީސުލްޖުމްހޫރިއްޔާ ނިންމެވީ، ދިވެހި ކުޅުންތެރިންނާއި އެތުލީޓުން އިތުރުކޮށް، ކުޅިވަރު ކުރިއަރުވައި ތަރައްގީ ކުރުމަށާއި، ދިވެހި ކުޅިވަރު ޖަމާއަތް ނުވަތަ ކުޅިވަރު އާއިލާ ބާރުވެރިކުރުވުމުގެ މަގުސަދުގަ އެވެ." ރައީސް އޮފީހުގެ ވެބްސައިޓުގައި ލިޔެފައިވެ އެެވެ.

މީގެ ތިން މަސް ކުރިން، "އަދަދު ސްޕޯޓްސް" އަށް ސްޕޯޓްސް މިނިސްޓަރު، ރާފިއު ދެއްވި އިންޓަވިއުއެއްގައި ވަނީ "ކުޅިވަރު ފަންޑް"ގެ ވާހަކަތައް ހިއްސާކުރައްވައިފަ އެވެ.

މިނިސްޓަރު ރާފިއު ވިދާޅުވީ، ގެންނަން މަަސައްކަތްކުރަމުން އަންނަ ކުޅިވަރު ގާނޫނުގެ އިސްލާހުގެ ތެރެއިން އެންމެ ބޮޑު ތަފާތެއް ގެނުވާނެ އެއް ކަމަކީ ސްޕޯޓްސް ފަންޑް ކަމަށެވެ.

ސްޕޯޓްސް ފަންޑަކީ އަސްލު މިނިވަން މުސްތަގިިއްލު ގޮތެއްގައި، މިނިސްޓްރީގެ ދަށުން ހިނގާނެ ބައެއް ކަމަށް މިނިސްޓަރު ވިދާޅުވި އެވެ.

"(ސްޕޯޓްސް ފަންޑްގެ) މެމްބަރުންނަކީ އިންޑިޕެންޑެންޓް މެމްބަރުން ނަގައިގެން، ފަސް މެމްބަރުންގެ މައްޗަށް އެކުލެވޭ ބޮޑީއެއް. މީގެ ބޭނުމަކީ ފަންޑް އެކުލަވާލާފައި ސްޕޯޓްސް ޑިވެލޮޕްމަންޓަށް ސްޕެންޑް ކުރުން (ހަރަދުކުރުން) މީގެއިން. އެންމެ މުހިންމު ކަމަކީ ބަޖެޓަށް ލޯޑުކުޑަވާގޮތް ހެދުން. މި ފަންޑަށް އަންނާނީ އެސްއޯއީން ސަޕޯޓް ދިނަސް، އެސްއޯއީން ކްލަބްތަކަށް ނޫނީ ފެޑެރޭޝަން ނޫނީ އެސޯސިއޭޝަނަށް ގިނައިން ދިނުމުގެ ބަދަލުގައި، މި ފަންޑަށް އަންނާނީ. ފަންޑަކީ ސްޕޯޓްސް ޑިވެލޮޕްކުރާ އެތި،" ރާފިއު ވިދާޅުވި އެވެ.

"މިސާލަކަށް އަޅުގަނޑު ކެބިނެޓަށް ހުށަހަޅަން ޕޭޕަރެއް ލިޔެފައި އޮންނާނެ، މިހާރު ފަންޑަށް ލާރި ހޯދާނެ ގޮތެއް، މިސާލަކަށް ހަށިގަނޑަށް ނުރައްކާ ނޫނީ ގެއްލުންދެނިވި މާއްދާތަށް ހިމެނޭ އެއްޗެހީގެ ޑިއުޓީން ވަކި ޕަސަންޓެއް މި ފަންޑަށް އަންނަ ގޮތަށް. އެއީ އަޅުގަނޑުމެން މި އުޅެނީ ހަށިހެޔޮ މުޖުތަމައު އެއް ބިނާކުރަން،"

އެ ގޮތުން، މިހާރު ކުޅިވަރު ކުޅުންތެރިންނަށް ކުރިއަށްގެންދާ "އަރުތަ" ޕްރޮގްރާމް ފަދަ ކަންކަމާއި ގައުމީ ޓީމުތަކުގެ ކޯޗުންގެ ކަންކަން ހަމަޖެއްސުމާއި ކުޅިވަރުގެ މީހުން ބިނާކުރުމުގެ ކަންކަން މައިގަނޑު ގޮތެއްގައި ކުރާނީ މި ފަންޑްގެ ތެރެއިންނެވެ.

ފުރަތަމަ މަޝްވަރާ ކުރެވުނު އެއް ކަމަކީ، ކިޔާނީ ސްޕޯޓްސް ފަންޑް ތޯ ނޫނީ ސްޕޯޓްސް ފައުންޑޭޝަން ތޯ އެވެ.

ރާފިއު ވިދާޅުވީ، ނަމުގެ ގޮތުގައި ފަންޑް ބޭނުންކުރަން ނިންމީ "ރީފައިނޭންސް" ކުރެވޭ މޮޑަލަކަށް ކުރިއަށްގެންދާ ކަމަކަށް ވާތީ އެވެ.

"ފަންޑް ވީމަ ފަސޭހަ އަކީ އެ މެދުވެރިކޮށް ރީ-ފައިނޭންސް ކުރެވޭނެ. ފަންޑްގައި ހުރި ފައިސާ ބޭނުންކޮށްގެން ފައިސާ ޖެނެރޭޓް ކުރެވޭނެ. ކުރެވޭތީވެ މިކަން ކުރަނީ ވެސް، އެހެން ނޫނީ ހަމަ ބަޖެޓަށް ބަރޯސާވާން މި ޖެހެނީ. ބަޖެޓަށް ލުއިކަމެއް ލިބޭނީ މި މޮޑެލް އިންޑިޕެންޑެންޓްވާ ވަރަކަށް. ފަންޑަކީ އޭގެ ޒާތުގައި އޮޕަރޭޓްކުރެވޭ އެއްޗަކަށް ވާން ޖެހޭނެ. ރީފައިނޭންސްކޮށްގެން އެ ލިބޭ ޕްރޮފިޓާ އެކު، ސްޕޯޓްސް ޑިވެލޮޕްމަންޓަށް އިންވެސްޓްކުރުން،" ރާފިއު ވިދާޅުވި އެވެ.

މީގެ ކުރިން ވެސް އެކި ސިފަ ސިފައިގައި ކުޅިވަރު ފަންޑެއްގެ ވާހަކަ ދެކެވުނެވެ. އެކަމަކު، އޭގެ ކުރިން ވުޖޫދުވީ، ކުޅިވަރު ފަންޑެކޭ ދާދި އެއް ކަހަލަ ޒިންމާތަކެއް އުފަލަމުން އަންނަ "އަރުތަ" ޕްރޮގްރާމް އެވެ.

"އަރުތަ" ޕްރޮގްރާމްގެ ތެރެއިން، އެތުލީޓުން/ކުޅުންތެރިންނަށް ކުރު އަދި ދިގު މުއްދަތުގެ ކޮންޓްރެކްޓްތައް ދީފައިހުރީ، ބަލަން ޖެހޭ މިންގަނޑަށް އެކަށީގެންވާ މިންވަރަށް ބެލުމެއް ނެތި ކަމީ މިކަމުގައި ޝާމިލުވާ ގިނަ ބަަޔަލު މިއަދު ވެސް ދައްކަމުން އަންނަ ވާހަކަ އެވެ.

އަދި "އަރުތަ" ޕްރޮގްރާމްގެ ތެރެއިން ކުޅުންތެރިންނަށް ލިބެންޖެހޭ ފައިސާ ނުލިބި ހުރި ކަމަށް، "އަދަދު ސްޕޯޓްސް"އާ މައުލޫމާތު ހިއްސާކުރި ބައެއް އެތުލީޓުން ވަނީ ބުނެފަ އެވެ. އެހެންކަމުން، އަލަށް މި އަންނަ "ގައުމީ ކުޅިވަރު ފަންޑް" ގެ ކަންކަން ހިންގުމުގައި ވެސް ދެމެހެއްޓެނިވި އުސޫލުތަކެއް ހުރުން ވަރަށް މުހިންމެވެ.

"ހަގީގަތުގައި މިހެން އަންނަ ކުޅިވަރުގެ ފަންޑްތައް، ނޫނީ، އެތުލީޓުންނާ ގުޅޭ ފައިސާއާ ބެހޭ ކަންކަން ކުރާއިރު، އެސޯސިއޭޝަންތަކާއި މި ފައިސާ ހަރަދުކުރެވޭ އެތުލީޓަށް މީގެ ފައިދާ ކުރަނީ ކިހާ މިންވަރަކަށްތޯ ބެލޭނެ ނިޒާމެއް އޮންނަން ޖެހޭ،" ކުޅިވަރުގެ އެޑްމިނިސްޓްރޭޝަނުގައި މަސައްކަތްކުރި ފަރާތެއް، "އަދަދު ސްޕޯޓްސް" އަށް އޭނާގެ ހިޔާލު ހިއްސާކުރި އެވެ.

"ރަނގަޅު ނިޒާމެއްގެ ތެރެއިން، ޖަވާބުދާރީ ކުރުވުމާއި ޕްރޮގްރެސް ފެންނަން އޮންނަ އުސޫލުތަކެއް ފެންނާނެ ގޮތްތަކެއް ވެސް އޮތް ގޮތަކަށް މި ކަހަަލަ ކަންކަން އައިސްގެން ނޫނީ މި ކަހަލަ ކިތަންމެ ފަންޑެއް އައި ކަމުގައި ވިޔަސް، އެންމެ ފަހުން ބަލާއިރު ފެންނާނީ ދެކޮޅު ނުޖެހޭ މައްސަލަތަކެއް،"

އޭނާ، ދެން، މިސާލު ދެއްކީ، މޯލްޑިވްސް އޮލިމްޕިކް ކޮމިޓީ (އެމްއޯސީ) އާއި ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް)ގެ ދެމެދުގައި، އެއްބަސްވުމެއް ހަދައިގެން، ބެޑްމިންޓަން ކުޅުންތެރިޔާ، ނިބާލް އަހުމަދުގެ އޮލިމްޕިކް ސްކޮލަޝިޕް ފައިސާ އަށް އެސޯސިއޭޝަނުން ހިޔާނަތްތެރިވިއިރު، އެ ކަމުގެ މައްސަލަތައް އެކަށޭނެ ގޮތަށް ބެލޭނެ ނިޒާމެއް، ޖަވާބުދާރީ ކުރެވޭނެ ގޮތެއް ފެންނަން ނެތުމުންނެވެ.