އިއްޔެ ރާއްޖެއަށް ކުރި ވިއްސާރައިގައި ލިބުނު ގެއްލުންތައް މޮނީޓާ ކުރަން ރައީސް ޑރ. މުހައްމަދު މުއިއްޒު ހާއްސަ ޓާސްކް ފޯހެއް އުފެއްދެވީ އެފަދަ ހާލަތްތައް މެނޭޖުކުރުމަށް ޑިޒާސްޓާ މެނޭޖްމަންޓު ކައުންސިލެއް އޮއްވާކަން އެނގިއްޖެ އެވެ.

ވިއްސާރާއާ ގުޅިގެން ކުރިމަތިވަމުންދާ ކަންކަން މޮނިޓާކޮށް ރައްޔިތުންނަށް ކުރިމަތިވާ ކަންކަމަށް އަވަސް ހައްލެއް ހޯދައިދިނުމަށް ކަމަށް ބުނެ ރައީސް ޓާސްކްފޯހެއް އުފެއްދެވީ ރޭގަ އެވެ. ޓާސްކް ފޯހުގައި ހިމެނެނީ ފަސް ވަޒީރަކާއި ރައީސް އޮފީހުގެ ޗީފް އޮފް ސްޓާފްގެ އިތުރުން ސިފައިންގެ ޗީފު އަދި ކޮމިޝަނާ އޮފް ޕޮލިސް އެވެ.

މިކަން އިއުލާނުކޮށް ރައީސް އޮފީހުގެ އިސް ތަރުޖަމާނު ހީނާ ވަލީދު ކުރެއްވި ޕޯސްޓާއެކު ބައެއް މީހުން ވަނީ، ޑިޒާސްޓާ މެނޭޖްމަންޓު ކައުންސިލްގެ ވާހަކަ ފެންމަތިކޮށްފަ އެވެ.

މި ކައުންސިލަކީ ސެޕްޓެމްބަރު، 2015، ގައި ތަސްދީގުކުރި ކާރިސާއާބެހޭ ކަންކަން ބެލެހެއްޓުމުގެ ގާނޫނުގެ ދަށުން އެކުލަވާލާފައިވާ ކައުންސިލެކެވެ. ޗެއާ ކުރައްވަނީ އޭރަކު ހުންނަވާ ރައީސުލްޖުމްހުރިއްޔާ އެވެ. މެންބަރުންގެ ގޮތުގައި ޑިފެންސް، ހޯމް، ފޮރިން، ފިނޭންސް، ހެލްތު، ހައުސިން، ކޮންސްޓްރަކްޝަން އަދި ތިމާވެއްޓާ ބެހޭ މިނިސްޓަރުގެ އިތުރުން، ނޭޝަނަލް ޑިޒާސްޓާ މެނޭޖްމަންޓު އޮތޯރިޓީ (އެންޑީއެމްއޭ) ގެ ސީއީއޯ އެވެ.

ރޭ އެކުލަވާލި ޓާސްކް ފޯހުގައި އެންޑީއެމްއޭގެ އެއްވެސް އޮފިޝަލަކު ނެތެވެ. މޫސުން ގޯސްވެ ދިމާވި މި ހާލަތާ ގުޅޭ ގޮތުން އުފެއްދެވި ޓާސްކް ފޯހުގައި މޫސުމާ ބެހޭ ގައުމީ އިދާރާ (މެޓް އޮފީސް) ގެ އެއްވެސް މީހަކުވެސް ނެތެވެ.

ގާނޫނަކު ލާޒިމުކޮށް އުފައްދާފައިވަ ޑިޒާސްޓާ މެނޭޖްމަންޓު ކައުންސިލްގެ ޒިންމާތަކާއި މަސްއޫލިއްޔަތުތައް ވެސް ޓާސްކު ފޯހަކަށްވުރެ ވެސް ބޮޑެވެ. އެކަންކަން ތަސްދީގުކުރި ކާރިސާއާބެހޭ ކަންކަން ބެލެހެއްޓުމުގެ ގާނޫނުގެ ހަތަރުވަނަ ބާބުގެ އެއްވަނަ ބައިގައި ބަޔާންކޮށްފައިވެ އެވެ.

ރައީސްގެ ނިންމެވުމާއެކު، ނިމިދިޔަ އެމްޑީޕީ ސަރުކާރުގެ ތިމާވެއްޓާ ބެހޭ މިނިސްޓަރު އާމިނަތު ޝައުނާ ވެސް ވަނީ ސުވާލުތަކެއް އުފައްދަވާފަ އެވެ. އެގޮތުން އެކްސްގައި ކުރެއްވި ޕޯސްޓެއްގައި އޭނާ ވިދާޅުވީ، މި މަސައްކަތްތައް ކުރުމަށް ގާނޫނުން މަތިކޮށްފައިވަނީ އެންޑީއެމްއޭ އާ ކަމަށެވެ. އަދި މިފަދަ ހާލަތްތަކުގައި އަމަލުކުރާނެ ގާނޫނެއް އޮތް އިރު ޓާސްކް ފޯހެއެއް އެކުލަވާލެއްވި ބޭނުމާމެދުވެސް ޝައުނާ ސުވާލު އުފެއްދވި އެވެ.

ޝައުނާގެ އިތުރުން، އެމްޑީޕީ ސަރުކާރުގައި ރައީސް އޮފީހުގެ ޕޮލިސީ ސެކްރެޓަރީކަން ކުރެއްވި އަހުމަދު ހަމްދާން މިކަމާ ގުޅިގެން ރޭ ކުރެއްވި ޕޯސްޓެއްގައި ފާހަގަކުރެއްވީ، ގާނޫނުން ރައީސް ޗެއާ ކުރައްވާ ގޮތަށް ނޭޝަނަލް ޑިޒާސްޓަރ މެނޭޖްމަންޓް ކައުންސިލްއެއް އެކުލަވާލާފައި އޮންނާނެ ކަމެވެ.

"މި ފަދަ ހާލަތްތަކުގައި ކައުންސިލް ޙަރަކާތްތެރިކޮށް ކާރިސާގެ ކަންކަން ވިލަރެސްކުރުމުން މިފަދަ ކަންކަން އިންސްޓްޓިއުޝަނަލައިޒް ވާނެ،" ހަމްދާން ލިޔުއްވާފައިވެ އެވެ.

ރޭ އެކުލަވާލި ޓާސްކް ފޯހުގައި އެންޑީއެމްއޭގެ ބޭފުޅަކު ނެތް ސަބަބާއި ކައުންސިލް އޮއްވައި ޓާސްކް ފޯސް އެކުލަވާލި ސަބަބު ސާފުކުރުމަށް މި ނޫހުން ވާނީ ރައީސް އޮފީހުގައި އެދިފަ އެވެ. އެކަމާ ގުޅިގެން އެ އޮފީހުން މިހާތަނަށް ސާފު ޖަވާބެއް ނުދެ އެވެ.

އިތުރަށް ކިޔާލަން