މިއަދު ހެނދުނުން ފެށިގެން މެދުނުކެނޑި ވާރޭވެހެމުންދާއިރު، މިރެއާ ހަމައަށްވެސް ބޯކޮށް ވާރޭވެހޭނެ ކަމަށް ލަފާކޮށް މެޓް އޮފީހުން މާލެ ސަރަހައްދަށް އޮރެންޖު އެލާޓު ނެރެފި އެވެ.

މިވަގުތުން ފެށިގެން އިރުއޮއްސި 6:15 އާ ހަމައަށް އޮރެންޖު އިންޒާރު ނެރުނީ މާލެ އަތޮޅުން ފެށިގެން ދ. އަތޮޅާ ހަމައަށެވެ. އެ އިންޒާރުގައި މެޓުން ވަނީ މި ސަރަހައްދުތަކަށް ވާރޭވެހޭއިރު ގުގުރާ، ފެންބޮޑުވާނެ ކަމަށްވެސް ލަފާކޮށްފަ އެވެ.

މިއަދު މެންދުރު މާލެއަށް ވެހެން ފެށި ވާރޭ އަދިވެސް މެދުކެނޑިފައި ނުވާއިރު މާލޭގެ މަގުތަކުގައި ހިނގާބިނގާވެ އުޅެން ދަތިވާ ވަރަށް ވަނީ ފެން ބޮޑުވެފަ އެވެ. ބައެއް ގެތަކަށާއި ފިހާރަތަކަށް ފެން ވަނުމުގެ ސަބަބުން ގެއްލުންތަކެއް ވެސް ވަނީ ލިބިފަ އެވެ.

"ބޯކޮށް ވާރޭވެހި ކަނޑުތައް ވެސް ގަދަވާނެ ކަމަށް މޫސުމާ ބެހޭ ގައުމީ އިދާރާއިން ވަނީ ލަފާކޮށްފައި. އެހެންކަމުން ކޮންމެހެން ކުރަން ޖެހިއްޖެ ހާލަތުގައި މެނުވީ ކަނޑުދަތުރު ނުކުރުމަށް އިލްތިމާސްކުރަން," ފުލުހުން އެކްސްގައި ބުނެފައިވެ އެވެ.

މިއަދު މާލޭގެ މަޖީދީ މަގުގައި ފެންބޮޑުވެފަ --- ފޮޓޯ: އަދަދު

އެމްއެންޑީއެފުން ބުނީ މާލޭގައި ފެންބޮޑުވެ، ތިން ސަރަހައްދެއްގައި ފެން ހިންދުމަށް ޕަމްޕު ޖައްސައިގެން ސިފައިން ހަރަކާތްތެރިވަމުންދާ ކަމަށެވެ. އެއީ ވެސްޓު ޕާކު ސަރަހައްދާއި އައިޖީއެމްއެޗް ސަރަަހައްދުގެ އިތުރުން މަޖީދީމަގުގެ އިރުމަތީ ސަރަހައްދެވެ.

މާލޭގައި އާންމުކޮށް ފެންބޮޑުވަނީ މާފަންނު ކޮޅުގަ އެވެ. ނަމަވެސް މިއަދު އާދަޔާ ހިލާފަށް ވާރާވެހި މުޅި މާލޭގައިހެން ވަނީ ފެންބޮޑުވެފަ އެވެ.

ފުލުހުން ބުނީ ވާރޭވެހި މާލޭގެ މަގުތަކުގައި ފެންބޮޑުވުމުގެ ސަބަބުން ދަތުރުފަތުރު ކުރުމުގައި ސަމާލުވުމަށް އިލްތިމާސްކުރާ ކަމަށާއި ފުލުހުން ދަނީ މަގުތަކުގައި ހަރަކާތްތެރިވަމުން ކަމަށެވެ.