ޓެކްސް އެޕީލް ޓްރައިބިއުނަލްގެ ފަސް މެންބަރުންގެ ތެރެއިން ހަތަރު މެންބަރުން ވަކިކުރުމަށް ރައީސް ޑރ. މުހައްމަދު މުއިއްޒަށް ލަފާ ދިނުމަށް ރައްޔިތުންގެ މަޖިލީހުގެ ޖުޑީޝަރީ ކޮމިޓީން މިއަދު ފާސްކޮށްފި އެވެ.

ޓެކްސް އެޕީލް ޓްރައިބިއުނަލްގެ މި މެންބަރުންގެ މައްސަލަތަކެއް މަޖިލީހުގެ ސަމާލު ކަމަށް ގެނައީ އެ ޓްރައިބިއުނަލްގެ އެއް މެންބަރު ކަމަށްވާ އިސްމާއީލް ސާޖިދެވެ. މަޖިލީހުގެ ކޮމިޓީން އެ ކަންކަން ބަލަން ފެށީ ސާޖިދުގެ ސިޓީއެއް އެ ކޮމިޓީއަށް ލިބިގެންނެވެ.

އެ ކަންކަން ޖުޑިޝަރީ ކޮމިޓީން ބަލަމުން ދިޔައީ ސިއްރުކޮށްގެންނެވެ.

އެގޮތުން, ވަކިވަކި މެންބަރުން ކޮމިޓީއަށް ހާޒިރުކޮށް ސުވާލު ކޮށްފައިވެ އެވެ. އެ ތަނުގެ ރަޖިސްޓްރާ އަބްދުﷲ ހިލްމީ ވެސް ހާޒިރުކޮށް ސުވާލުކޮށްފައިވެ އެވެ. އަދި ޖުޑިޝަރީ ކޮމިޓީގެ މެންބަރުން އެ ތަނަށް ވަޑައިގެން ތަނުގެ ހާލަތު ވެސް ބެއްލެވި އެވެ.

ޖުޑިޝަރީ ކޮމިޓީގެ މިއަދުގެ ބައްދަލުވުމުގައި ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދު (ސަޓޯ) ހުށަހެޅުއްވީ ކޮމިޓީގެ ސަމާލު ކަމަށް ތަނުގެ މައްސަލަތައް ގެނެސްދެއްވި މެންބަރު ސާޖިދު ފިޔަވައި އެ ޓްރައިބިއުނަލްގެ އެހެން މެންބަރުން ވަކިކުރުމަށެވެ.

ކޮމިޓީ ބައްދަލުވުމުގައި ބައިވެރިވެވަޑައިގެންނެވި މެންބަރުންގެ އިއްތިފާގުން ވަކިކުރަން ލަފާ ދިނުމަށް ފާސްކުރީ ޓްރައިބިއުނަލްގެ ރައީސް މުހައްމަދު މުނައްވަރު އަލީއާއި، ޓްރައިބިއުނަލްގެ ނައިބު ރައީސް ހުސައިން ޒައިދާން ޖަލީލްއާއި، މެންބަރު އަހުމަދު އަޝްރަފު، އަދި މެންބަރު ހަޖީދާ ނައީމެވެ.

މި މެންބަރުންގެ މައްސަލަތައް ތަހުގީގު ކުރުމަށް އެންޓި ކޮރަޕްޝަން ކޮމިޝަން (އޭސީސީ) އަށް ލަފާ ދިނުމަށް ވެސް ކޮމިޓީން މިއަދު ފާސްކުރި އެވެ.