ކޮރަޕްޝަންގެ މައްސަލަތަކުގައި ތުހުމަތުވާ މުވައްޒަފުން ވަގުތުން ވަކިކުރެވޭނެ ގޮތަށް ކުންފުނިތަކުގެ ހިއުމަން ރިސޯސަސް އޮނިގަނޑަށް ބަދަލު ގެންނަން ސަރުކާރަށް ލަފާ ދިނުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީން މިއަދުގެ ބައްދަލުވުމުގައި ފާސްކޮށްފި އެވެ.

އެ ބައްދަލުވުމުގައި ވާހަކަ ދައްކަވަމުން މަޖިލީހުގެ ނައިބު ރައީސް އަހުމަދު ނާޒިމް ވިދާޅުވީ އެންޓި ކޮރަޕްޝަން ކޮމިޝަން (އޭސީސީ) އިން ތަހުގީގުކޮށް ނިމެންދެން މުވައްޒަފުންގެ ގޮތުގައި ދެމިތިބެވޭ ގޮތަށް އޮންނާތީ، ކުންފުނި ތެރޭގައި ކޮރަޕްޝަން ހިންގަން އެ މުވައްޒަފުންނަށް އިތުރު މުއްދަތަކު ތިބެވޭ ކަމަށެވެ.

ނާޒިމް ހުށަހެޅުއްވީ އޭސީސީއަށް މައްސަލައެއް ހުށަހެޅުމުން ތަހުގީގަށް "ފްލެގް"ވާ ހިސާބުން އެ ކަން ކޮމިޝަނުން އެންގުމުން ވަގުތުން ވަކިކުރެވޭ ގޮތަށް މުވައްޒަފުންގެ އޮނިގަނޑު ބަދަލު ކުރުމަށެވެ. އޭނާގެ ހުށަހެޅުއްވުމަށް ތާއީދު ކުރެއްވީ ހަނިމާދޫ ދާއިރާގެ އެމްޑީޕީ މެންބަރު އަބްދުލްޣަފޫރު މޫސާ އެވެ.

އެ ގޮތަށް ކޮމިޓީން ފާސްކުރީ ބައްދަލުވުމުގައި ބައިވެރިވެވަޑައިގެންނެވި މެންބަރުންގެ އިއްތިފާގުންނެވެ.

އަސާސީ ހިދުމަތްތައް ފޯރުކޮށްދިނުމާއި ތަރައްގީގެ މަޝްރޫއުތައް ހިންގުމުގެ އިތުރުން އުފެއްދުންތެރިކަން އިތުރުކުރަން ސަރުކާރު ހިއްސާވާ ގޮތަށް ކުންފުނިތަކެއް އުފައްދާފައިވެ އެވެ.

ސިޔާސީ ބާރުވެރިކަން ދެމެހެއްޓުމުުގެ މަގުސަދުގައި އެ ކުންފުނިތަކުން ހިންގާ ޕްރޮޖެކްޓްތަކުގައި ކޮރަޕްޝަން ހިނގާ ކަމާއި، ބޭނުން ނެތް ގޮތެއްގައި މުވައްޒަފުން އިތުރުކުރާ ކަމަށް އަބަދުވެސް މި ފަހުން ތުހުމަތު ކުރެ އެވެ.