މިހާރު ކުރަމުންދާ ވިއްސާރާގައި ރާއްޖޭގެ އެންމެ އުތުރަށް މޫސުން ގޯސްވެ ހއ. ހދ. އަދި ށ. އަތޮޅަށް އޮރެންޖު އިންޒާރު ނެރެފި އެވެ.

މެޓުން ދެންމެ ނެރުނު އިންޒާރުގައި ވަނީ އެ އަތޮޅުގެ ރަށްތަކަށް މިހާރުން ފެށިގެން މިރޭ 7:00 އާ ހަމައަށް ގުގުރުމާއެކު ބޯކޮށް ވާރޭވެހޭނެ ކަމަށް ލަފާކުރެވޭ ކަމަށެވެ. އަދި އެންމެ އުތުރުގެ ރަށްތަކުގައި ފެންބޮޑުވާނެ ކަމަށްވެސް މެޓުން ލަފާކުރެ އެވެ.

އިއްޔެއިން ފެށިގެން ކުރަމުންދާ ހުޅަނގު މޫސުމުގެ ވިއްސާރާގައި މިއަދު އެއްކޮށްހެން މުޅި ރާއްޖެއަށް އޮތީ ހުދު ސަމާލު ނެރެފަ އެވެ. އަދި މިއަދު ފަތިހު ވަނީ ހއ. އިން ފެށިގެން ގދ. އަތޮޅަށް ރީނދޫ އެލާޓު ނެރެފަ އެވެ. ރީނދޫ އެލާޓު ނެރެފައި ވަނީ ހެނދުނު 9:00 އާ ހަމައަށެވެ.

އޯގަސްޓު 9 ވަނަ ދުވަހު މޫސުމާ ބެހޭ ގައުމީ އިދާރާއިންނާއި ނޭޝަނަލް ޑިޒާސްޓާ މެނޭޖުމެންޓު އޮތޯރިޓީން ވަނީ ހުޅަނގު މޫސުމުގެ ބާރު ގަދަވެ، ވަޔާއި ކަނޑުތައް ގަދަވުމާއެކު ބޯކޮށް ވާރޭ ވެހޭނެ ކަމަށް ލަފާކޮށް ދުރާލައި ސަލާމަތީ ފިޔަވަޅުތައް ވަރުގަދަކޮށް އިލްތިމާސްކޮށްފަ އެވެ.

އެ ދުވަހު، މޫސުމާ ބެހޭ ގައުމީ އިދާރާއިން އެކްސްގައި ކުރި ޕޯސްޓެއްގައި ބުނީ އާދީއްތަ ދުވަހުން ފެށިގެން ކުރިއަށް އޮތް ފަސް ދުވަހު ވިލާގަނޑުގައި ގަޑިއަކު 40 މޭލާއި 45 މޭލާ ދެމެދުގެ ބާރު މިނަކަށް ވައިގަދަވެ ކަނޑުތައް ވެސް ގަދަވާނެ ކަމަށް ލަފާ ކުރެވޭ ކަމަށެވެ.

މެޓް އޮފީހުގެ އިލްތިމާސްއާ ގުޅިގެން އެންޑީއެމްއޭއިން ވަނީ ރައްކާތެރިކަމުގެ އިރުޝާދު ކަރުދާހެއް އާންމު ކޮށްފަ އެވެ. އެ ކަރުދާހުގައި ރައްކާތެރިވުމުގެ ގޮތުން އެޅިދާނެ ބައެއް ފިޔަވަޅުތައް ވެސް ހިމަނައިފައިވެ އެވެ.

އެންޑީއެމްއޭއިން ދިން އިރުޝާދުގައި ބުނީ ވާރޭވެހި ފެންބޮޑުވެދާނެ ކަމަށް ތައްޔާރުވުމުގެ ގޮތުން ގޯތިގެދޮރަށް ފެން ނުވަންނާނޭހެން ގޭގޭގެ ދޮރުމަތީގައި ވެލިބަސްތާ ފަދަ ތަކެތި ޖެހުމަށް އިލްތިމާސް ކުރާ ކަމަށެވެ.