އެކިއެކި މައްސަލަތަކުގައި ތިމާވެއްޓަށް ގެއްލުން ލިބޭތީ ޖޫރިމަނާކޮށްފައިވާ ފަރާތްތަކުން ފައިސާ ނުދައްކާ މައްސަލައިގައި ރައްޔިތުންގެ މަޖިލީހުގެ އެންވަޔަރަމަންޓް އެންޑް ކްލައިމެޓް ޗޭންޖް ކޮމިޓީއަށް އެންވަޔަރަމަންޓް ޕްރޮޓެކްޝަން އެޖެންސީ (އީޕީއޭ) އަންނަ ހޯމަ ދުވަހު ހާޒިރުކުރަން މިއަދު ފާސްކޮށްފި އެވެ.

ޖޫރިމަނާ ފައިސާ ނުދައްކާ މައްސަލައާ ގުޅިގެން ކޮމިޓީން ބޭއްވި މަޝްވަރާ ބައްދަލުވުމުގައި އީޕީއޭ ހާޒިރުކުރަން ހުށަހެޅުއްވީ ގެމަނަފުށީ ދާއިރާގެ މެންބަރު އަސަދުﷲ ޝިހާބު އެވެ. އެ ހުށަހެޅުއްވުމަށް ތާއީދު ކުރެއްވީ މަތިވެރި ދާއިރާގެ މެންބަރު ހަސަން ޒަރީރު އެވެ.

"އަޅުގަނޑަށް ހީވަނީ މިހާ ގިނަ ދުވަސް ވަންދެން ފައިސާ ނުލިބި އަދި ކޭސްތަކާ މެދު ގޮތެއް ނުނިންމި މިހިރީ ކޮންމެވެސް އިދާރާތަކެއްގެ މައްސަލަތަކެއް އުޅެގެންހެން. އެހެންވީމަ މި ފައިސާ ލިބުމުގައި ދަތިވެފައި ހުރި ކަންކަން ކީއްވެގެންތޯ މި ފައިސާ ނުލިބި ހުރީ އަޅުގަނޑުމެން ބަލާލަން މަސައްކަތްކުރާއިރުގައި އަޅުގަނޑަށް ހީވަނީ އެންމެ ފުރަތަމަ އީޕީއޭއާ ކަންނޭގޭ މަޝްވަރާ ކުރަންވީ،" އަސަދުﷲ ވިދާޅުވި އެވެ.

އަސަދުﷲ ވިދާޅުވީ އީޕީއޭއިން ބައެއް ފަހަރު ވަރަށް ފަރުވާ ކުޑަކޮށް މައްސަލަތައް ނިންމާފައި އެބަހުރި ކަމަށާއި އީޕީއޭ ކޮމިޓީއަށް ހާޒިރުކޮށްގެން އެކަންތައްތައް ސާފުކުރަން ވެސް ޖެހޭ ކަމަށެވެ.

އެޓާނީ ޖެނެރަލް އޮފީހުން ކޮމިޓީއާ ހިއްސާކޮށްފައިވާ ޝީޓުން ޖޫރިމަނާގެ ގިނަ މައްސަލަތައް ކޯޓުގައި ނިމިފައި ހުރިކަން އެނގެން ނެތްކަން ފާހަގަކުރައްވައި ޒަރީރު ވިދާޅުވީ އީޕީއޭ ހާޒިރުކުރާއިރު ހެދިފައި ހުރި ގާނޫނުތަކާއި ގަވާއިދުތައް ރަނގަޅަށް ދިރާސާކުރަން ޖެހޭ ކަމަށެވެ.

ތިމާވެއްޓަށް ގެއްލުން ލިބޭ އެކިއެކި މައްސަލަތަކާއި ގުޅިގެން އީޕީއޭއިން އެކި ކުންފުނިތައް ޖޫރިމަނާ ކޮށްފައި އެބަހުއްޓެވެ. އޭގެ ތެރޭގައި ސަރުކާރުގެ ކުންފުނިތަކާއި އަމިއްލަ ކުންފުނިތައް ވެސް ހިމެނެ އެވެ. ނަމަވެސް, އޭގެ ތެރެއިން ބައެއް ކުންފުނިތަކުން ޖޫރިމަނާ ފައިސާ ނުދައްކާތީ، އީޕީއޭއިން ކުރިން ކަންބޮޑުވުން ފާޅުކޮށްފައިވެ އެވެ.