ރައީސް ޑރ. މުހައްމަދު މުއިއްޒު އިއްޔެ މާލޭ ސިޓީ ކައުންސިލްއާ ބައްދަލުކުރި ހަބަރު، ޕަބްލިކް ސާވިސް މީޑިއާ (ޕީއެސްއެމް) އިން ގެނެސް ދިނީ ހަގީގަތާއި ތާރީހު އޮޅުވައިލެންގެންނެވެ.

ރައީސް ޑރ. މުއިއްޒުގެ އެ ބައްދަލުވުމާ ގުޅޭ ގޮތުން ޕީއެސްއެމްގެ ގެނެސްދީފައިވާ ހަބަރުގައި ބުނެފައި ވަނީ "މިއީ ރާއްޖޭގެ ރައީސުލްޖުމްހޫރިއްޔާއަކު ރަސްމީކޮށް މާލެ ސިޓީ ކައުންސިލާ ބައްދަލުކުރެއްވި ފުރަތަމަ ފަހަރު" ކަމަށެވެ.

މިގޮތަށް ހަބަރު ގެނެސް ދިނީ ރައީސް އޮފީހުން ރަސްމީ ގޮތެއްގައި އެ މައުލޫމާތު އެގޮތަށް ފަތުރައިގެނެއް ނޫނެވެ. އިއްޔެއަކީ ރައީސަކު ސިޓީ ކައުންސިލާ ބައްދަލުކުރި ފުރަތަމަ ފަހަރު ކަމަށް ރައީސް އޮފީހުގެ ވެބްސައިޓުގައި ބުނެފައެއް ނުވެ އެވެ.

އެހެންވެ ޕީއެސްއެމްއިން އިއްޔެ އާއި ރޭ ފެތުރީ ދޮގު ހަބަރެކެވެ.

ހަގީގަތް

ލާމަރުކަޒީ ގާނޫނުގެ ދަށުން ކައުންސިލްތަކުގެ އިންތިހާބު ފުރަތަމަ ބޭއްވީ ފެބްރުއަރީ 5، 2011 ގަ އެވެ. އެ އިންތިހާބުގައި މާލޭ ސިޓީ ކައުންސިލްގެ ގޮނޑިތައް ކާމިޔާބުކުރީ އެމްޑީޕީންނެ އެވެ. ފުރަތަމަ އިންތިހާބުކުރި މާލޭ ސިޓީ ކައުންސިލްގެ މެންބަރުން، ފެބްރުއަރީ 26، 2011 ގައި ހުވާކުރެއްވުމާއެކު ޖެހިގެން އައި ދުވަހު އޭރުގެ ރައީސް މުހައްމަދު ނަޝީދު ވަނީ އެ މެންބަރުނާ ރަސްމީކޮށް ބައްދަލު ކުރެއްވައިފަ އެވެ.

ރައީސް އޮފީހުގައި ބޭއްވި އެ ބައްދަލުވުމުގައި އާ ކައުންސިލަރުންނަށް މަރުހަބާ ވިދާޅުވެ، ސަރުކާރުގެ އަމާޒަކީ މާލޭގެ ތަރައްގީއަށް ހިންގާ ހުރިހާ ޕްރޮގްރާމެއް މާލެ ސިޓީ ކައުންސިލް މެދުވެރިކޮށް ފޯރުކޮށްދިނުން ކަމަށް ނަޝީދު ވިދާޅުވި އެވެ. އަދި ތަރައްގީގެ ޕްރޮގްރާމުތަކަށް ސިޓީ ކައުންސިލްގެ އެއްބާރުލުން ލިބޭނެ ކަމަށް ޔަގީން ކުރާ ކަމަށް އެ މަނިކުފާނު ވިދާޅުވި އެވެ.

މާލޭ ސިޓީ ކައުންސިލްގެ އޮފީސް ހުޅުވުމަށް ޖުލައި 2011 ގައި ބޭއްވި ހަފުލާއަށް ފަހު އޭރުގެ ރައީސް ނަޝީދު، ކައުންސިލްގެ މެންބަރުންނާއެކު ފޮޓޯއަކަށް ހުއްޓިވަޑައިގެން. -- ފޮޓޯ: ރައީސް އޮފީސް

އެއަށް ފަހު ޖުލައި 27، 2011 ގައި ނަޝީދު ސިޓީ ކައުންސިލަށް ވަަޑައިގަތީ ކައުންސިލްގެ އޮފީހުގެ ގޮތުގައި ހަމަޖެއްސި ބިއްލޫރިޖެހިގެ ހުޅުވުމަށެވެ. ސިޓީ ކައުންސިލްތައް އުފެއްދުމުގެ ކުރިން މިނިސްޕަލް ހިދުމަތް ދެމުންދިޔަ މާލޭ މުނިސްޕަލްޓީ އަށް ވެސް ނަޝީދު ވަޑައިއިގެންނެވި އެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ މަގާމު ޑިސެންބަރު 2018 ގައި އޭރު އޮތް މާލޭ ސިޓީ ކައުންސިލްގެ މެންބަރުންނާ ރައީސް އޮފީހުގައި ބައްދަލު ކުރައްވާފައިވެ އެވެ.

ރައީސް އިބްރާހިމް މުހައްމަދު ސޯލިހު ޑިސެންބަރު 2018 ގައި އޭރު އޮތް ސިޓީ ކައުންސިލްގެ މެންބަރުންނާ ބައްދަލު ކުރައްވަނީ. -- ފޮޓޯ: ރައީސް އޮފީސް

ކުރީގެ ރައީސް އަބްދުﷲ ޔާމީންގެ ވެރިކަމަށް ވަޑައިގެންނެވިއިރު އޮތް ސިޓީ ކައުންސިލަކީ އެމްޑީޕީގެ މެޖޯރިޓީ އޮތް ކައުންސިލެކެވެ. އެހެންވެ، އެ ކައުންސިލް އާއި ސަރުކާރާ ގުޅުން ރަނގަޅެއް ނޫނެވެ.

މި ހެކިތަކަށް ބަލާއިރު ރަސްމީކޮށް މާލޭ ސިޓީ ކައުންސިލްއާ ބައްދަލުކުރެއްވި ފުރަތަމަ ރައީސްއަކީ ޑރ. މުއިއްޒެއް ނޫނެވެ. އެ ޝަރަފު ހައްގު ވަނީ ކުރީގެ ރައީސް ނަޝީދަށެވެ.