ސަރުކާރާއި ޕްރައިވެޓް ސެކްޓަރު ހިމަނައިގެން މުޅި ދިވެހިރާއްޖޭގެ މަސައްކަތް ކުރާ މީހުންގެ އާބާދީއަކީ 171،130 އެވެ. އޭގެ ތެރެއިން މިދިޔަ އަހަރުގެ ނިޔަލަށް ސަރުކާރު ހިއްސާވާ ކުންފުނިތަކުގައި ޖުމްލަ 34،369 މުވައްޒަފުން ތިއްބެވެ.

އޭގެ ފަހުން މިދިޔަ ރައްޔިތުންގެ މަޖިލީހުގެ އިންތިހާބުގެ ކެމްޕެއިނު ތެރޭގައި އެސްއޯއީތަކަށް އިންތިހާ ގިނައިން މުވައްޒަފުން ވެއްދި އެވެ. އެކަމަކު، އެ އަދަތުތައް ނުހިމަނައި މިދިޔަ އަހަރުގެ ނިޔަލަށް ތިބި މުވައްޒަފުންނަށް ބެލި ނަމަވެސް ދިވެހިރާއްޖޭގެ މަސައްކަތު އާބާދީގެ 20 ޕަސެންޓު މަސައްކަތް ކުރަނީ ސަރުކާރު ހިއްސާވާ ކުންފުނިތަކުގަ އެވެ.

ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަތުމުގެ ކުރިން ވެވަޑައިގެންނެވި އެންމެ މުހިންމު އަދި އެންމެ ބޮޑު ވައުދަކީ ސަރުކާރާއި އެސްއޯއީތަކުގައި ތިބި މުވައްޒަފުން ވަޒީފާ ހިމާޔަތްކޮށްދެއްވާނެ ކަމަށް ވިދާޅުވެ ވެވަޑައިގެންނެވި ވައުދެވެ.

"... ދެން އެއްވެސް މީހަކު ވަޒީފާއިން ވައްކެއް ނުކުރާނަން. އެކަމަކު މި ދެންނެވީ ސިޔާސީ ވަޒީފާއެއް ނޫން. ކުންފުނިތަކާ އެކި ގޮތްގޮތުން އާންމު ރައްޔިތުން ލާފައި ހުރި ވަޒީފާތައް. ސިޔާސީ މަގާމުތައް ފިޔަވައި ދެން ހުރި ވަޒީފާތަކަކީ އަޅުގަނޑު ހަމަ ތަކުރާރުކޮށް ހުރިހާ ރަށެއްގައި މި ދަންނަވަނީ ޔަގީންކަމާއެކީގައި އެ ބޭފުޅުން އެރަށެއްގައި ތިބި ވަޒީފާގައި ތިބެވޭނެ،" ސެޕްޓެމްބަރު 4، 2023، ގައި ލ. ކުނަހަންދޫގައި ވާހަކަ ދައްކަވަމުން ރައީސް ވިދާޅުވި އެވެ.

އެ ޔަގީންކަން ދެއްވުމަށްފަހު ރައީސް އެދިވަޑައިގެންނެވީ އެއްވެސް މީހަކު ކަންބޮޑުނުވުމަށެވެ. ވިދާޅުވީ، ވެރިކަމަށް ވަޑައިގަނެވިއްޖެ ނަމަ ވަޒީފާ ހިމާޔަތް ކުރުމުގެ އިތުރުން ކުރިއެރުމާއެކު މުސާރަ ވެސް ބޮޑުކޮށްދޭނެ ކަމަށެވެ.

"އަދި އަޅުގަނޑުމެންނަށް އާމްދަނީ އިތުރުކުރޭވޭ ވަރަކަށް އިގްތިސާދަށް ހަރުދަނާކަން ގެނެވެމުންދާ ވަރަކަށް ވަޒީފާގެ ކުރިއެރުން ލިބި މުސާރަ އިތުރުކުރެވޭނެ. އެހެންވީމާ އެއްވެސް ވަރަކަށް ކަންބޮޑުވެނުލައްވާތި،" އެމަނިކުފާނުގެ ހުވާކަށަވަރު އިއުލާނު ކުރައްވަމުން ރައީސް މުއިއްޒު ވިދާޅުވި އެވެ.

ރައީސް މުއިއްޒަށް ރިޔާސީ އިންތިހާބުގައި ލިބުނު ވޯޓުތަކުގެ ތެރެއިން ބަޔަކީ އެ ޔަގީންކަން ލިބުމުން ރައްޔިތުންގެ ފަރާތުން ލިބުނު ވޯޓުތަކަކަށް ނޫނީ ނުވާނެ އެވެ.

ވޯޓު ދިނީ އެ މުވައްޒަފުން ރައީސް މުއިއްޒުގެ ބަހަށް އިތުބާރު ކުރުމަށްފަހެވެ. ވައުދާ ހިލާފުވެވަޑައިނުގަންނަވާނެ ކަމަށް ބަލައިގެންނެވެ. ނަމަވެސް އެގޮތަށް ހީކުރެވުނު ރައްޔިތުންނަށް މި ލިބެނީ ލޮޓިއެކެވެ. ސަރުކާރު ކުންފުނިތަކުން މުވައްޒަފުން ކަނޑަމުން އެ ދަނީ ތަނެއްދޮރެއް، އެޔެއްމިއެއް ނުބަލަ އެވެ.

ރިޔާސީ ވައުދާ ހިލާފަށް ފެނަކައިން އެތައް ސަތޭކަ މުވައްޒަފުން ވަކި ކުރަނީ

ސަރުކާރުގެ ވަޒީފާތަކުގައި ތިބި މީހުން ވަޒީފާއިން ވަކި ނުކުރާނެ ވާހަކަ، ހެޔޮ ވިސްނޭ މީހަކަށް އެ ވާހަކަ ނުއޮޅޭ މިންވަރަށް ރައީސް މުއިއްޒު ދެއްކެވި އެވެ.

ރިޔާސީ އިންތިހާބުގެ ކެމްޕެއިނުގެ ތެރޭގައި ވަޒީފާއިން ވަކިވާނެ ކަމަށް ރައީސް މުއިއްޒު ވިދާޅުވީ ސިޔާސީ މުވައްޒަފުން އެކަންޏެވެ. ރައީސް ވައުދުވެވަޑައިގަތީ ސިޔާސީ މަގާމެއްގައި ނެތް އެންމެންގެ ވަޒީފާ ހިމާޔަތް ކުރުމަށެވެ. މަޝްރޫއުތަކަށް ނަގާފައި ތިބި މުވައްޒަފުންގެ ވަޒީފާ ހިމާޔަތްކޮށްދޭނެކަމުގެ ވައުދު ރައީސް ވަކި ވެވަޑައިގަތެވެ.

"އެއްވެސް މީހަކު، ސިޔާސީ މަގާމެއްގައި ނޫން މަގާމެއްގައި ހުރި އެއްވެސް ދިވެހި ރައްޔިތަކު އެއީ އަދި މަޝްރޫއުތަކަށް ނެގި މީހަކަށް ވިޔަސް [ވަތްކެއް ނުކުރާނަން]،" ސެޕްޓެމްބަރު 5، ގައި ރައީސް މުއިއްޒު ވިދާޅުވި އެވެ.

ރައީސްގެ ވައުދުތަކާ ހިލާފަށް ފެނަކަ ކޯޕަރޭޝަން ލިމިޓެޑުން އެކަނި ވެސް 700 އަށް ވުރެ ގިނަ މުވައްޒަފުން ވަކި ކުރަން އެ ކުންފުނިން ވަނީ މިހާރު ނިންމައިފަ އެވެ.

"ހުރިހާ ރަށަކުން ވެސް އެބަ ދޫކޮށްލަން ކޮންޓްރެކްޓަށް ނަގާފައި ތިބި މުވައްޒަފުން. މި ހަފްތާ ތެރޭގައި ހުރިހާ މުވައްޒަފުންނަށް އެކަން އަންގާ ނިމޭނެ. ޖުމްލަ 731 މުވައްޒަފުން އެބަ ދޫކޮށްލަން،" ފެނަކައިގެ މެނޭޖިން ޑިރެކްޓަރު މުއާޒް މުހައްމަދު ރަޝީދު މި ނޫހާ ވާހަކަ ދައްކަވަމުން ވިދާޅުވި އެވެ.

ފެނަކައިން ވަކި ކުރަން ނިންމި މުވައްޒަފުންގެ ތެރޭގައި ހއ. ދިއްދޫ އާއި ޏ. ފުވައްމުލަކުގެ މުވައްޒަފުން ހިމެނެ އެވެ. އޭގެ ތެރެއިން ދިއްދޫގެ 22 މުވައްޒަފުން ކަނޑާލީ ދެ ވަނަ ފަހަރަށެވެ. ފުރަތަމަ ފަހަރަ އެ މީހުން ވަކި ކުރީ މި ސަރުކާރު ވެރިކަމަށް އައިތަނާ އެވެ. ފަހުން މަޖިލީހުގެ ކެމްޕެއިނަށް އަނެއްކާ އެ މުވައްޒަފުން ނެގި އެވެ. އެކަމަކު އަނެއްކާ ވެސް މި ހަފުތާގެ ތެރޭގައި ހަމަ އެ މުވައްޒަފުން ވަނީ ކަނޑާލައިފަ އެވެ.

"އަޅުގަނޑު މިހާ ދުވަހު އުޅުނީ ފެނަކައިން ލިބޭ އެއްޗަކުން ދިރިއުޅުން ހަމަޖައްސައިގެން. ކޮންޓްރެކްޓް މިގޮތަށް ކުރިއަށް ނުގެންދާކަން ކުރީބައިގައި އެންގިނަމަ ގޮތެއް ހޯދުނީސް. އަންހެނުން އިނީ ބަނޑުބޮޑުވެ ނޮވެމްބަރު މަހު ވިހާނެ. އެހެންކަމުން ވަރަށް ބޮޑު ހާސްކަމެއް އަދި ނިކަމެތި ކަމެއް ލިބިގެން މިދިޔައީ،" މަ ހަފުތާގައި ފެނަކައިން ވަކި ކުރި މުވައްޒަފަކު މި ނޫހާ ވާހަކަ ދައްކަމުން ބުންޏެވެ.

ބައެއް މުވައްޒަފުންގެ ޝަކުވާއަކީ ކެމްޕެއިނަށް ވައުދުވި ގޮތާއި ފެނަކައިގެ މެނޭޖްމަންޓުން ވައުދުވި ގޮތާ ހިލާފަށް މުވައްޒަފުން ވަކި ކުރުމެވެ.

"އަޅުގަނޑު ވަކިކުރީ މި ސަރުކާރު ފެށުނުތަނާ މިދިޔަ އަހަރު ނޮވެމްބަރު މަހު. އޭރު ވަކިކުރި މުވައްޒަފުންނަށް ގޮތެއް ހޯދައިދޭނަމޭ ވެސް ބުނި މަޖިލިސް އިންތިހާބު ތެރޭގައި. ކެމްޕެއިން ތެރޭގައި ބުނި އެއްޗަކާ މިހާރު ދިމައެއް ނުވޭ. ނަމަވެސް މިއަދާއި ހިސާބަށް ވެސް އަޅުގަނޑު މިއުޅެނީ ވަޒީފާއެއް ނެތި. ވަކިކުރި ލިޔުމެއް އަދި ވަކިކުރި މަހުގެ މުސާރައެއް ވެސް ނުދޭ،" މަހުމޫދު ޝަފީގު (މަންޑޭ)، 30، މި ނޫހާ ވާހަކަ ދައްކަމުން ބުންޏެވެ.

ވަޒީފާއިން ވަކި ނުކުރާނެ ކަމަށް ވިދާޅުވެ ރައީސް މުއިއްޒު ވެވަޑައިގެންނެވި ބައެއް ވައުދުތައް

އޯގަސްޓު 14، 2023

"އެހެންވީމާ ވަޒީފާއިން ވަތްކެއް ނުކުރެވޭނެއޭ. އެހެންނަމަވެސް ބަދަލުތަކެއް އަތުވެދާނޭ. އިގްތިސާދީ ގޮތުން ކުންފުނިތަކަށް ގެންނަންޖެހޭ ހެޔޮ ބަދަލުގެ ތެރެއިން ބަދަލުތަކެއް އަޔަސް ވަޒީފާއެއް ނުގެއްލޭނެއޭ."

އޯގަސްޓް 29، 2023

"އަދި ހަމަ އެއާ އެކީގައި ވަޒީފާތައް. ކުންފުނިތަކުގައި ތިއްބެވި ސިޔާސީ މަގާމުތައް ފިޔަވައި ހުރިހާ މަގާމުތަކެއްގައި ތިއްބެވި ރައްޔިތުން ވެސް ހަމަ އެ މަގާމުތަކުގައި. އެ މަގާމުތަކޭ މިދެންނެވީ އެ ވަޒީފާއިން ވަކިކުރުމެއްނެތި ހަމަ ރަށުގައި ތިބޭނެ. އެކަމުގެ ޔަގީންކަން ވެސް އަޅުގަނޑު ދެން."

ސެޕްޓެމްބަރު 5، 2023

"އަޅުގަނޑެއް ނޫޅެން އެއްވެސް މީހަކު ވަޒީފާއިން ވަކިކުރާކަށް. ހަމަ ތާއަބަދު އެބަ ކިޔާ ވަޒީފާއިން ވަކި ވާނޭ ތިމަންނަމެން ނޫން ބަޔަކު ވެރިކަމަށް އައީމާ. އަޅުގަނޑުމެން މިއަންނަނީ ވަޒީފާދޭން ނޫންތޯ. އެވާހަކަ ނޫންތޯ މިދައްކަނީ މިތާ ހުރެ ވެސް. އެއްވެސް މީހަކު، ސިޔާސީ މަގާމެއްގައި ނޫން މަގާމެއްގައި ހުރި އެއްވެސް ދިވެހި ރައްޔިތަކު އެއީ އަދި މަޝްރޫއުތަކަށް ނެގި މީހަކަށް ވިޔަސް [ވަތްކެއް ނުކުރާނަން]."

ސެޕްޓެމްބަރު 14، 2023

"ދެން ކޮންމެއަކަސް ވަޒީފާ ލިބިފައި ތިބި ފަރާތްތައް ވެސް ވަޒީފާއިން ވަކިކުރާ ވާހަކަ ދައްކަނީ. އެއީ ވެސް ހަގީގަތެއް ނޫން. އަޅުގަނޑުމެން ރައްޔިތުންނަށް ލިބިފައި ހުރި އެއްވެސް ކަހަލަ ކުރިއެރުމެއް އެއީ ވަޒީފާއެއް ކަމަށް ވިޔަސް އެއީ އެކި ކަހަލަ ލޯނު ނޫނީ އެކި ކަހަލަ ވިޔަފާރި ކުރަން ދީފައި ހުރި ފުރުސަތަކަށް ވިޔަސް ގެދޮރުވެރިކަން ކަމަށް ވިޔަސް އެއްވެސް ކަމަކުން މަހުރޫމެއް ނުކުރާނަން."

ސެޕްޓެމްބަރު 17، 2023

"އަޅުގަނޑަށް ހީވަނީ މިހެން މިވާގޮތަކީ މިސަރުކާރުން ކެމްޕެއިން ކުރާއިރު މުޅިން ވެސް ބިރު ވައްދަން ތަކުރާރުކޮށް ބިރު ދައްކަނީ. ތަކުރާރުކޮށް ދޮގު ހަދަނީ. ތަކުރާރުކޮށް މިގޮތަށް ހަގީގަތާ ހިލާފަށް ހަމަ ތަކުރާރުކުރަނީ. އެހެންވީމާ ހިތުގައި ޝައްކު އުފެދިދާނެ. އެއީ ހަމަ ތަބީއީ ކަމެއް. އެހެންނަމަވެސް އަޅުގަނޑު ޔަގީންކަން މިދެނީ ވަޒީފާއިން ވަކިނުކުރާނެ ވާހަކަ."

ސެޕްޓެމްބަރު 20، 2023

"އެހެންވީމާ މިގޮތަށް ބޭއްވޭ ޖަލްސާއެއްގައި މީޑިއާ ކުރިމަތީގައި ލައިވް ވެގެންދާއިރު އަޅުގަނޑު އެދެނީ ހަމަ ހުރިހާ ރައްޔިތުންނަށް މިމެސެޖް ލިބިގެން ދިޔުން. ޔަގީން ކުރެއްވުން. އެއްވެސް ރަށެއްގެ އެއްވެސް މަގާމެއްގައި ހުރި އެއްވެސް ބޭފުޅަކު ސިޔާސީ މަގާމެއް ނޫން ކަމަށް ވަންޏާ ވަޒީފާއިން ވަކިނުކުރާނަމޭ. ވަޒީފާގައި ހުންނާނެ ވާހަކަ އަޅުގަނޑު ޔަގީންކޮށް ހަމަ ދަންނަވަން."

-

ރިޔާސީ އިންތިހާބުގެ ކެމްޕެއިނުގެ ތެރެއިން ކެންޑިޑޭޓުން ވެވަޑައިގަންނަވާ ވައުދުތަކަކީ ކުޅޭކުޅޭ އެއްޗަކަށް ވެގެންނުވާނެ އެވެ. ރައްޔިތުން އެ ކެންޑިޑޭޓަކަށް ވޯޓުލަނީ ވައުދުތަކަށް ބަލައިގެންނެވެ. ވެރިކަމަށް ވަޑައިގެން ވައުދާ ހިލާފުވުމުން ރައްޔިތުންނަށް އެ ލިބެނީ ވަރަށް ލަނޑެކެވެ. އޭގެ ޒިންމާ ކެންޑިޑޭޓު ސީދާ ނަންގަވަންޖެހެ އެވެ.