މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އާއި ސްރީލަންކާގެ އެއާފޯސް އާއި އެމެރިކާގެ ޕެސިފިކް އެއާފޯސްގެ އިތުރުން މޮންޓާނާ ނެޝަނަލް ގާޑް ގުޅިގެން ލަންކާގައި "އެޓްލަސް އެންޖަލް" ނަމުގައި ތަމްރީންތަކެއް ފަށައިފި އެވެ.

އަންނަ ހުކުރު ދުވަހުގެ ނިޔަލަށް އެމެރިކާއިން ކުރިއަށް ގެންދާ އެ ތަމްރީން ޕްރޮގްރާމުތަކުގައި އެމެރިކާގެ 70 އަށް ވުރެ ގިނަ ސިފައިންނާއެކު ދެ އަސްކަރީ އެއާކްރާފްޓް ބައިވެރިވެ އެވެ.

"ދުނިޔޭގެ އެކި ކަންކޮޅުގައި ކާރިސާތައް އަންނަނީ ދުވަހަކަށްވުރެ ދުވަހެއް އިތުރުވަމުން. ދިމާވާ ކާރިސާތަކުން ގެއްލުން ކުޑަކުރަން އެމެރިކާގެ އެހީތެރިކަމާއި ތަޖުރިބާއާއެކު މަސައްކަތްތަކެއް ކުރެވޭނެ،" އެ ތަމްރީނުތަކާ ބެހޭ ގޮތުން އެމެރިކާއިން ލަންކާއަށް ކަނޑައަޅުއްވާފައި ހުންނަވާ ސަފީރު ޖޫލީ ޗަންގް ވިދާޅުވި އެވެ.

ތަމްރީންތަކުގެ ސަބަބުން ތަޖުރިބާ ލިބިފައިވާ މީހުންގެ ފަރާތުން ކާރިސާތައް މެނޭޖްކުރަން ދަސްވެ، އާ ކަންތައްތައް ވެސް ދަސްވެގެންދާނެ ކަމަށް އުންމީދު ކުރެވޭ ކަމަށް ޖޫލީ ވިދާޅުވި އެވެ.

މި ތަމްރީންތައް އަމާޒުކޮށްފައި ވަނީ ކާރިސާތަކުން ސަލާމަތްވުމަށް ކުރަން ޖެހޭ މަސައްކަތަށެވެ. އެގޮތުން ޖުމްލަ ހަ ތަމްރީނެއް އޭގެ ދަށުން ފުރިހަމަ ކުރަން ވަނީ ހަމަޖެހިފަ އެވެ.

ތަމްރީން ޕްރޮގްރާމާ ގުޅޭ ގޮތުން ލަންކާގެ އެއާފޯސް ކޮމާންޑާ އެއާ މާޝަލް އުދެނި ރާޖަޕަކްސަ ވިދާޅުވީ މި ތަމްރީން ޕްރޮގްރާމާއެކު އެކި ހާދިސާތަކާ ގުޅިގެން ރެސްކިއު އޮޕަރޭޝަންތައް ހިންގުމަށާއި ސާޗް އޮޕަރޭޝަން ހިންގުމަށް ބައިވެރިންނަށް އިތުރު ތަޖުރިބާ ލިބިގެންދާނެ ކަމަށެވެ.

އެމްއެންޑީއެފްއިން މީގެ ކުރިން ރާއްޖޭގެ އިތުރުން ރާއްޖެއިން ބޭރުގައި ވެސް އެކި ކަހަލަ ތަމްރީން ޕްރޮގްރާމުތަކުގައި އަންނަނީ ބައިވެރިވަމުންނެވެ. ނަމަވެސް އެމެރިކާއާއެކު ތަމްރީން ޕްރޮގްރާމްތައް ހެދުން ފަހަކަށް އައިސް ވަނީ ގިނަވެފަ އެވެ.