އެމެރިކާގެ އަސްކަރިއްޔާއާއެކު ދިވެހި ސިފައިން ބައިވެރިވާ ތަމުރީނު ޕްރޮގްރާމެއް ރާއްޖޭގައި މިއަދު ފަށައިފި އެވެ.

މޯލްޑިވްސް ނެޝަނަލް ޑިފެންސް ފޯސް އިން ބުނީ މިއަދު ފެށި ތަމުރީނަށް ކިޔަނީ "އެކްސަސައިޒް ފްލޭޝް މެޓަލް 2025-7006" ކަމަށެވެ. މިއަދުން ފެށިގެން އެއް މަސް ދުވަހުގެ މުއްދަތަކަށް އެ ތަމުރީނު ކުރިއަށްގެންދާނެ ކަމަށް ސިފައިން ބުނެ އެވެ.

އެ ތަމުރީނުގައި ދިވެހި ސިފައިންގެ ކޯސްޓްގާޑުގެ ސްޕެޝަލް ބޯޓް ސްކޮޑްރަން އާއި ސްޕެޝަލް ފޯސްގެ ސިފައިންނާއި މެރިން ސިފައިން ބައިވެރިވާނެ ކަމަށެވެ. އެ ތަމުރީނުގައި ކިޔަވައިދެނީ އެމެރިކާގެ އަސްކަރިއްޔާއިންނެވެ.

އެ ތަމުރީނު ކުރިއަށްގެންދަނީ ސިފައިން ޓްރެއިނިން ހަދާ ގިރިފުށްޓާއި ލ. އަތޮޅުގެ ބައެއް ރަށްތަކާއި އެ ހިސާބުތަކުގެ ކަނޑުގައި ކަމަށެވެ.

އެމްއެންޑީއެފް އިން ބުނީ އެއީ ދިވެހި ސިފައިންގެ ގާބިލުކަން އިތުރު ކުރަން އެމެރިކާއާއެކު ސިލްސިލާކޮށް ބާއްވަމުންދާ ތަމުރީނުތަކެއް ކަމަށެވެ.