ރިސޯޓު ހަދަން ދޫކޮށްފައިވާ ރަށްތައް ތަރައްގީކުރަން ދީފައިވާ މުއްދަތު (ކޮންސްޓްރަކްޝަން ޕީރިއަޑު) އިތުރުކުރުމުގެ ކުރިން ހުރިހާ ފައިސާއެއް ޓޫރިޒަމް ޓްރަސްޓު ފަންޑަށް ޖަމާކުރަން ޖެހޭ ގޮތަށް އަންގާރަ ދުވަހު ގަވާއިދު ބަދަލުކޮށްފި އެވެ.

ރިސޯޓު ހަދަން ދޫކޮށްފައިވާ ތަންތަނުގެ ކޮންސްޓްރަކްޝަން މުއްދަތު އިތުރުކުރުމާ ގުޅޭ ގަވާއިދުގައި ކުރިން އޮތީ، އެ މުއްދަތު އިތުރުކޮށްދިނުމުގެ ގޮތުން ސަރުކާރަށް ދައްކަން ޖެހޭ ކޯޕަރޭޓް ސޯޝަލް ރެސްޕޮންސިބިލިޓީ (ސީއެސްއާރު) ފައިސާ ތިން އަހަރަށް ބަހާލައިގެން ދެއްކޭ ގޮތަށެވެ. އަދި އެ ފައިސާ ވެސް އަހަރަކު ހަތަރު ކުއާޓަރަށް ހަމައަށް ކުރިން ބަހާލައިވެ އެވެ.

ނަމަވެސް ޓޫރިޒަމުން ގަވާއިދަށް ގެނައި ބަދަލާއެކީ، ދެން ކޮންސްޓްރަކްޝަން މުއްދަތު އިތުރުކޮށްދޭނީ ކުރިން ޓޫރިޒަމް ޓުރަސްޓު ފަންޑަށް ސީއެސްއާރު ފައިސާ ޖަމާކުރީމަ އެވެ. ސީއެސްއާރުގެ ގޮތުގައި ދައްކަން ޖެހޭ އަދަދު ބިނާވަނީ ރަށް އޮންނަ ޒޯނާއި އިތުރުކުރަން އެދޭ މުއްދަތާއި ރަށުގެ ބޮޑުމިނަށެވެ.

ސީއެސްއާރުގެ ގޮތުގައި ދައްކަން ޖެހޭ އަދަދު އުޅެނީ 1500 ޑޮލަރުން ފެށިގެން 10،000 ޑޮލަރާ ދޭތެރޭގަ އެވެ.

ރިސޯޓުތައް ތަރައްގީނުކޮށް ލަސްވާ މައްސަލައިގައި ހަދާފައިވާ މި ގަވާއިދަކީ ކުރިން ހުރި ބޮޑެތި ޖޫރިމަނާތައް މައާފުކޮށް، ރަށްތައް ނަގާފައިވާ މީހުންނަށް ރިސޯޓުތައް ނިންމަން ފަހިކޮށްދޭން ހެދި ގަވާއިދެކެވެ.