އެލިއާ އިންވެސްޓަމަންޓުން މޯލްޑިވްސް އިންސްޓިޓީއުޓް އޮފް ޓެކްނޮލޮޖީ (އެމްއައިޓީ) އާ ގުޅިގެން ކަނޑު އުޅަނދުފަހަރުގެ ކެޕްޓަނުންނަށް އަމާޒުކޮށްގެން ބާއްވާ ބޯޓް އޮޕަރޭޓާސް ޓްރެއިނިން ޕްރޮގްރާމްގެ އަށްވަނަ އެޑިޝަން މިއަދު ފަށައިފި އެވެ.

ރާއްޖޭގައި އޮޕަރޭޓްކުރާ އެކި ރިސޯޓުތަކާއި، ކަނޑު ދަތުރުފަތުރުގެ ހިދުމަތް ދޭ ކުންފުނިތަކުގެ އިތުރުން ސަރުކާރުގެ އެކި މުއައްސަސާތަކުގެ 64 ބައިވެރިންނާއެކު އެ ޓްރެއިނިން ޕްރޮގްރާމް ކުރިއަށް ގެންދާނީ އަންނަ ބުރާސްފަތި ދުވަހުގެ ނިޔަލަށެވެ.

"މިއީ މީގެ އަށް ވަރަކަށް އަހަރު ކުރިން އެލިއާއިން އިސް ނަގައިގެން އެމްއައިޓީއާއެކު އުފެދުނު ޕްރޮގްރާމެއް. އުޅަނދުފަހަރުގެ އެކްސިޑެންޓުތައް މަދުކުރަން ޕްރޮގްރާމުގެ ސަބަބުން އެހީވެދޭނެ. ރިފްރެޝާ ޕްރޮގްރާމެއް ގޮތުގައި ޕްރޮގްރާޟް ކުރިއަށްދާނީ," އެމްއައިޓީގެ ޕްރޮޖެކްޓް އިމްޕްލިމެންޓޭޝަން މެނޭޖާ އިބްރާހިމް ޝަރީފް ހަސަން ވިދާޅުވި އެވެ.

އެލިއާއިން ބުނީ ތަފާތު ސެޝަންތަކަށް ބަހާލައިގެން ކުރިއަށްގެންދާ މި ޓްރެއިނިން ޕްރޮގްރާމުގެ މަގްސަދަކީ ކަނޑު އުޅަނދުފަހަރުގެ ކެޕްޓަނުންގެ ހުނަރު ތަރައްގީކޮށް، ކަނޑު އުޅަނދުފަހަރުގެ ސަލާމަތާއި ރައްކާތެރިކަމާ ބެހޭ ފަންނީ މައުލޫމާތު ފޯރުކޮށްދިނުން ކަމަށެވެ.

އެލިއާއިން ބާއްވާ ބޯޓް އޮޕަރޭޓަސް ޓްރެއިނިން ޕްރޮގްރާމް ފެށުން -- ފޮޓޯ: މިރާޝް ނާޝިމް / އަދަދު

ކަނޑުމަތީގެ ފަންނުވެރިކަމަށް އަމާޒުކޮށްގެން ކުރިއަށްގެންދާ އެ ޕްރޮގްރާމުގައި އައުޓްބޯޑު އިންޖީނުއެޅި އުޅަނދުތަކުގައި އިތުބާރާއެކު ދަތުރުކުރުމަށް ކެޕްޓަނުންނަށް ވަރަށް ބޭނުންތެރި ތިއަރީއާއި ހުނަރުތައް ހިމެނޭ ހާއްސަ ސެޝަންތަކެއް ހިމެނޭ ކަމަށް ވެސް އެލިއާއިން ބުނެ އެވެ.

"މި ޕްރޮގްރާމުގައި އުޅަނދު ދުއްވުމުގައި ހާއްސަ ސަމާލުކަން ދިނުން މުހިންމު ކަންތައްތަކާއި، ނެވިގޭޝަން ޗާޓާއި، ސޭފްޓީ ޕްރޮޓޮކޯލްތަކާއި، ޕެސެންޖަރަކަށް ސިއްހީ ކުއްލި ހާލަތެއް މެދުވެރިވެއްޖެނަމަ އަމަލުކުރާނެ ގޮތްތަކަށް ކެޕްޓަނުން އަހުލުވެރި ކުރުވުމާއި، އަލިފާނުގެ ހާދިސާއެއްފަދަ ކުއްލި ހާލަތެއްގައި އަމަލުކުރާނެ ގޮތުގެ އިތުރުން، އައުޓްބޯޑު އިންޖީނު ބެލެހެއްޓުމާއި މައްސަލަ ހައްލުކުރުމުގެ ސެޝަންތަކެއް ހިމެނޭ،" އެލިއާއިން ބުންޏެވެ.

އެލިއާއިން ހިންގާ ތަފާތު ޓްރެއިނިންތަކުގެ ތެރެއިން ޖަޕާނުގެ ޔަމަހާ ޓެކްނިކަލް އެކަޑަމީއާ ގުޅިގެން ރާއްޖޭގައި ހިންގާ ފަސްވަނަ ޔަމަހާ ޓެކްނިކަލް ޓްރެއިނިން 2024 ވެސް އެ ރަސްމިއްޔާތުގައި އިފްތިތާހުކުރި އެވެ.

ކަނޑުމަތީގެ ސަލާމަތާއި ޕްރޮފެޝަނަލިޒަމް އަދި އަމަލީ ތަމްރީންތައް ހިމަނައިގެން ސިނާއަތުގެ މިންގަނޑުތަކަށް ފެތޭގޮތަށް، ފަރުމާކޮށްފައިވާ އެ ޕްރޮގްރާމަށް ރިސޯޓުތަކާއި، ކަނޑު އުޅަނދުގެ ދަތުރުފަތުރުގެ ހިދުމަތް ދޭ ކުންފުނިތައް އަދި ސަރުކާރުގެ މުއައްސަސާތަކުން ދޭ އެއްބާރުލުމަށް އެލިއާއިން ވަނީ ޝުކުރު އަދާކޮށްފަ އެވެ.

މި އަހަރަކީ އެލިއާއިން ޔަމަހާ އައުޓްބޯޑް އިންޖީނު ރާއްޖެއަށް ތައާރަފްކުރިތާ 50 އަހަރު ފުރޭ ރަންޔޫބީލްއަށް ވާއިރު، އެ ކުންފުނިން އަންނަނީ މުޖުތަމައުއަށް ބޭނުންތެރި ތަފާތު ޕްރޮގްރާމްތައް ހިންގަމުންނެވެ.