ގއ. މާނަގަލާގައި ގާއިމުކުރާ ހެޗަރީއަށް ސާމާނު ހޯދުމުގައި ލަސްތަކެއް ދިމާވެ، އެތަނުން އެން ވިއްކަން ފެށޭނެ ކަމަށް ލަފާކުރާ ތާރީހު އަހަރުގެ ފަހުކޮޅަށް ފަސްވެއްޖެ ކަމަށް ފިޝަރީޒް މިނިސްޓްރީން ބުނެފި އެވެ.

މާނަގަލާގައި ތަރައްގީކުރާ މަލްޓި-ސްޕީޝީސް ހެޗަރީއަކީ ރާއްޖޭގެ ކަނޑުފަޅުގެ މުއްސަނދިކަން ތަރައްގީކޮށް ހެޔޮގޮތުގައި ބޭނުންކުރުމުގެ މަގުސަދުގައި ވާލްޑް ބޭންކުގެ އެހީތެރިކަމާ އެކު 2017 ގައި ފެށި "ސަސްޓެއިނަބަލް ފިޝަރީޒް ރިސޯސަސް ޑިވެލޮޕްމަންޓް ޕްރޮޖެކްޓު" ގެ ބައެކެވެ.

މި ޕްރޮޖެކްޓުގެ ފުރަތަމަ ފިޔަވަހީގެ ދަށުން އެކޮމޮޑޭޝަނާއި އިންޖީނުގެ ފަދަ ސަޕޯޓް ސްޓްރަކްޗާތައް މާނަގަލާގައި ގާއިމުކޮށް ނިމިއްޖެ އެވެ. ދެން އޮތީ ހެޗަރީއަށް ބޭނުންވާ ނާސަރީތަކާއި ލައިވް ފީޑް ޕްރޮޑަކްޝަން ފެސިލިޓީތަކާއި ލެބޯޓަރީތަކުގެ އިތުރުން ފަޅުތެރޭގައި ފާނަ އާލާކުރަން މޫދު ކޮށިތައް ގާއިމުކުރުމެވެ.

މާނަގަލާ ހެޗެރީގެ ދެވަނަ ފިޔަވަހީގެ ބިންގާ އެޅީ މިދިޔަ އަހަރުގެ ޑިސެމްބަރު، 12 ގަ އެވެ. އޭރު ފިޝަރީޒް މިނިސްޓްރީން ބުނީ ހެޗަރީ ގާއިމުކުރުމުގެ މަސައްކަތް ކުރަނީ ދެ ފިޔަވައްސަކަށް ބަހާލައިގެން ކަމަށާއި ފުރަތަމަ ފިޔަވަހީގެ މަސައްކަތް ޖުލައިއަށް ނިމި، އެން ވިއްކަން ފެށޭނެ ކަމަށެވެ.

ނަމަވެސް ހެޗަރީއަށް ބޭނުންވާ ބައެއް ޓެކްނިކަލް ސާމާނު ހޯދުމަށާއި އެ ތަކެތި ރާއްޖެ ގެންނަން ދަތިވެ، ކުރިން ބުނި ތާރީހަށް އެ މަސައްކަތް ނުނިމުނީ ކަމަށް "އަދަދު" އަށް މައުލޫމާތު ދިން ފިޝަރީޒް މިނިސްޓްރީގެ އޮފިޝަލަކު ބުންޏެވެ.

"[އެކުއާ ބްރިޖު] ކުންފުންޏަށް ބައެއް ސާމާނު ގެނައުމުގައި ލޮޖިސްޓިކްސް މައްސަލަތެއް ދިމާވެގެން މަސައްކަތް ލަސްވީ" އޮފިޝަލް ބުންޏެވެ.

ފިޝަރީޒް މިިނިސްޓްރީން ބުނި ގޮތުގައި، ސަރުކާރުން މިހާރު އަމާޒު ހިފާފައި ވަނީ މި އަހަރުގެ މަސްވެރިންގެ ދުވަހުގެ ކުރިން އެތަން ހުޅުވުމަށެވެ. މަސްވެރިންގެ ދުވަހަކީ ޑިސެމްބަރު، 10 އެވެ.

މާނަގަލާ ހެޗަރީ މަސައްކަތް ހަވާލުކޮށްފައިވާނީ ދުބާއީގެ އެކުއާ ބްރިޖު ކުންފުންޏާ އެވެ. އެކުއާ ބްރިޖަކީ ހެޗަރީ ގާއިމުކުރުމުގެ ފަންނީ ގާބިލުކަން ލިބިފައިވާ، މި ދާއިރާއިން އެންމެ ކުރިއަރާފައިވާ އެއް ކުންފުންޏެވެ.

އެކުއާ ބްރިޖަށް މާނަގަލާ ދިނީ 21 އަހަރުގެ މުއްދަތަށް، ފުރަތަމަ ފަސް އަހަރު އެއްވެސް ކުއްޔެއް ނުނަގާ ގޮތަށެވެ. އެއަށް ފަހު އޮންނަ މުއްދަތުގައި އަކަފޫޓަކަށް 20 ލާރި މަގުން ކުލި ހިނގާނެ އެވެ. މިއީ 16 މިލިއަން ޑޮލަރު (246.8 މިލިއަން ރުފިޔާ) ގެ އަގުހުރި މަޝްރޫއެކެވެ.

މިއީ މަލްޓި-ސްޕީޝީސް ހެޗަރީއެއް ރާއްޖޭގައި ގާއިމުކުރެވޭ ފުރަތަމަ ފަހަރެވެ. މި ހެޗަރީގެ މަސައްކަތް ނިމުމުން އަހަރެއްގެ ތެރޭގައި މަދުވެގެން 100 ޓަނުގެ އެމުގެ ބާވަތް، އެއް މިލިއަން ކުދި ކަސްފާނަ އަދި ހަ ލައްކަ ހުއިފިލަނޑާ އާލާކުރެވޭނެ އެވެ.

ފިޝަރީޒް މިނިސްޓްރީން ބުނި ގޮތުގައި މެރިކަލްޗާގެ ސިނާއަތު އިތުރަށް ފުޅާކޮށް ތަރައްގީ ކުރުމަކީ، އަތޮޅުތެރޭގައި ދިރިއުޅޭ ފަރާތްތަކަށް، ރަށްރަށާއި ކައިރިން އާމްދަނީ އާއި ވަޒީފާގެ އިތުރު ފުރުސަތުތައް ފަހިވެ، ރާއްޖޭގައި ކުރެވޭ އިގުތިސޯދީ މަސައްކަތްތައް އިތުރަށް ފުޅާވެގެންދާނެ ކަމެކެވެ.

ހަމައެހެންމެ، މިއީ މަސްވެރިންނަށް އެން ހޯދުމުގައި ދިމާވެފައިވާ އުނދަގޫތަކަށް ކޮންމެވެސް ވަރެއްގެ ލުޔެއް ލިބޭނެ ކަމެއް ވެސް މެ އެވެ.