މެންޗެސްޓާ (އޮގަސްޓް 4) - މެންޗެސްޓާ ސިޓީ އަށް ކުޅެމުން އަންނަ އާޖެންޓީނާ ގައުމީ ޓީމުގެ ފޯވާޑް، ހޫލިއަން އަލްވަރޭޒްއާ އެކު، ސްޕެއިނުގެ އެތުލެޓިކޯ މެޑްރިޑުން މަޝްވަރާތައް ފަށާފައިވާ ކަމަށް ރިޕޯޓްތައް ބުނެފި އެވެ.

އަލްވަރޭޒް، 24، އަށް ސިޓީން މިދިޔަ ސީޒަނުގެ ފަހުކޮޅުގައި އާ ކޮންޓްރެކްޓެއް ދިނެވެ. އެކަމަކު، އޭނާ އެ ޑީލަށް އެއްބަހެއްނުވި އެވެ. އެއީ، މިހާރު، ހަދާފައި އޮތް ޑީލަށް އިތުރު އެއް އަހަރު ހިމަނައި، މުސާރަ ބޮޑުކޮށްފަ އެެވެ. އެކަމަކު، 2029 ވަނަ އަހަރުގެ ޖޫންގެ ނިޔަލަށް ހަދަން އުޅުނު އެ ޑީލް ކުރިއަކަށް ނުދިޔަ އެވެ.

މި ފަހަރުގެ އޮލިމްޕިކްސްގައި އާޖެންޓީނާ ޓީމަށް ކުޅުނު އަލްވަރޭޒް، ވަނީ އެ މުބާރާތަށް ފަހު މުސްތަގުބަލާ ގުޅޭގޮތުން ނިންމުމެއް ނިންމާނެ ކަމަށް ބުނެފަ އެވެ. އޮލިމްޕިކްސްގެ ފުޓްބޯޅަ އިވެންޓުން އާޖެންޓީނާ ވަނީ ކުއާޓާ ފައިނަލުގައި ފްރާންސް އަތުން ކަޓައިފަ އެވެ. އެ މެޗަށް ފަހު، އަލްވަރޭޒް ޗުއްޓީ އަކަށް ގޮސްފައިވާ ކަމަށް އާޖެންޓީނާގެ މީޑިއާ އެއް ކަމަށްވާ ޓައިކް ސްޕޯޓްސް އިން ރިޕޯޓްކޮށްފައިވެ އެވެ.

ޓައިކްސް އިން ރިޕޯޓްކުރާގޮތުގައި، އަލްވަރޭޒްގެ އޭޖެންޓުން އަންނަނީ އެތުލެޓިކޯގެ އޮފިޝަލުންނާ އެކު، . މެޑްރިޑްގައި ބައްދަލުވުންތަކެއް ބާއްވަމުންނެވެ.

އެތުލެޓިކޯ އިން ޖިރޯނާ އަށް ކުޅެމުން އައި ޔޫކްރެއިންގެ ފޯވާޑް، އާޓެމް ޑޮވްބީކްގެ ރޭހުން ވަކިވީ އަލްވަރޭޒް ހޯދޭނެ ކަމުގެ ޔަގީންކަން އޮތުމުންނެވެ. ޑޮވްބީކް ވަނީ ޖިރޯނާ ދޫކޮށް، އިޓަލީގެ ރޯމާ އަށް ސޮއިކޮށްފަ އެވެ. ޑޮވްބީކް، 27،ގެ ސޮއި ހޯދަން، ރޯމާ އިން 20 މިލިއަން ޑޮލަރުގެ ފީއެއް ދައްކާނެ ކަމަށް ރިޕޯޓްތައް ބުނެ އެވެ.

އެތުލެޓިކޯ އިން ވަނީ ވިޔަރެއާލަށް ކުޅެމުން އައި ފޯވާޑް، އަލެކްސަންޑަ ސޯލޯތު ގަނެފަ އެވެ. އެއީ، ސްޕެއިނުގެ ކެޕްޓަން، އަލްވާރޯ މޮރާޓާ ދޫކޮށްލުމަށްފަހު ކުރި ޓްރާންސްފާ އެވެ.

އާސެނަލުން ވެސް އަލްވަރޭޒަށް ފާރަލަމުން އަންނައިރު، ސިޓީން އެންމެ ކުޑަކޮށް ވެސް އަލްވަރޭޒް ދޫކުރާނީ 60 މިލިއަން ޑޮލަރަށް ކަމަށް ރިޕޯޓްތައް ބުނެ އެވެ.