ކުރިން އުވާލައިފައި އޮތް މިސްކިތްތަކާއި ބެހޭ ގައުމީ މަޖިލިސް އަލުންއެކުލަވާލައި އެ މަޖިލީހުގެ ގަވާއިދު އިއުލާނުކޮށްފި އެވެ.

ގެޒެޓުގައިވާ ގޮތުގައި މި މަޖިލީސް އަލުން އެކުލަވައިލުމުގެ މަގުސަދުތަކުގެ ތެރޭގައި ހިމެނެނީ މިސްކިތްތަކާއި އިމާމުންނާއި އަދި މުދިމުންނަށް ބޭނުންވާ ކަންކަމުގައި މިނިސްޓަރަށް އިސްތިޝާރީ ލަފާ އެރުވުމާއި މިސްްކިތްތަކާއި އަޅުކަމާ ގުޅުންހުރި ކަންތައްތައް ދީނީގޮތުން އެއް މިންގަނޑެއްގައި ހިފަހައްޓުމެވެ.

އޭގެ އިތުރުން މިސްކިތްތަކުގެ ހާލަތު ރަގަޅަށް މެދުނުކެނޑި ދެނެގަނެވޭނެ ނިޒާމެއް ގާއިމުކުރުމަކީ ވެސް މި މަޖިލިސް އެކުލަވާލުމުގެ މަގުސަދެއް ކަމަށް އެ ގަވާއިދުގައި ވެ އެވެ.

މިސްކިތަކާއި ބެހޭ ގައުމީ މަޖިލިސް އެކުލަވާލަނީ އިސްލާމިކް މިނިސްޓަރެވެ. އަދި މަޖިލީހުގައި ތިއްބަވާ މެންބަރުން ޖަވާބުދާރީވާނީ މިނިސްޓަރަށެވެ.

ގައުމީ މަޖިލީހުގެ މެންބަރުންގެ ގޮތުގައި ތިއްބަވަނީ މަސްޖިދުއްސުލްތާން މުހައްމަދު ތަކުރުފާނުލްއައުޒަމަށް ރައީސް އައްޔަނުކުރައްވާ އިސް އިމާމް، މިނިސްޓްރީގެ މޮސްކް މެނޭޖެމެންޓް ސެކްޝަނުގެ އިސްވެރިޔާ، ސިޓީތަކާއި ބެހޭ ވުޒާރާއިން ކަނޑައަޅާ ފަރާތެއް، މާލެ ސިޓީ ކައުންސިލުން ކަނޑައަޅާ ފަރާތެކެވެ.

މީގެ އިތުރުން ގައުމީ ތަރިކައާއި ބެހޭ ވުޒާރާއިން ކަނޑައަޅާ ފަރާތަކާއި އާންމު ރައްޔިތުންގެ ތެރެއިން މިނިސްޓަރު ކަނޑައަޅާ ފަރާތެއް ވެސް މަޖިލީހުގައި މެންބަރެއްގެ ގޮތުގައި ހުންނާނެ އެވެ.

ރަށްރަށުގަ އާއި ސިޓީތަކުގައި ވެސް ގައުމީ މަޖިލިސް އުފެދުމާއި ގުޅިގެން ވަނީ މިސްކިތަތަކުގެ ހާލަތު ދުވަހުން ދުވަހަށް ބަލާ މޮނީޓަރުކުރުމަށްޓަކައި ތިން މެންބަރުންގެ މައްޗަށް އެކުލެވޭ މިސްކިތު ކޮމެޓީއެއް ހަދަން ނިންމައިފަ އެވެ.

މި މިސްކިތު ކޮމެޓީގައި ތިބޭނީ ކައުންސިލް ފަރާތުން މަންދޫބަކާއި ރަށު މިސްކިތަތަކުގެ އިމާމުންގެ ތެރެއިން ކައުނސިލުން ކަނޑައަޅާ އިމާމަކާއި އަދި އާންމު ރައްޔިތުންގެ ތެރެއިން އިމާމުން ކަނޑައަޅާ މިސްކިތުގެ އަހުލުވެރިއެކެވެ.

މިސްކިތްތައް ރަގަޅަށް ބެލެހެއްޓުމަށްޓަކައި އުވިފައިވާ ގައުމީ މަޖިލިސް އަލުން ވުޖޫދަށް ގެނެސް މިވަނީ އާ ގަވާއިދުތަކަކާއި އެކީ މަސައްކަތް ފެށިފަ އެވެ.