މާލޭ މަސް މާރުކޭޓުގައި ދުވަސްތަކަކަށް ފަހު ކަނޑު މަސް ތިޔާގިވެ، އެތައް ދުވަހެއް ވަންދެން މަސް ގަންނަން ބޭނުންވެފައި ތިބި މީހުންނަށް ބޮޑު އީދެއް އައިސްފި އެވެ.

މިއަދު ހެނދުނުން ފެށިގެން މަސް މާރުކޭޓުގައި ކިއު ޖެހިގެން އެތައް ބަޔަކު މަސް ގަނެފައި ވަނީ 20ރ. އާއި 30ރ. އާ ދެމެދު އެވެ. ގަންނަ މަސް ކަނޑާފައި ވަނީ ކިލޯއެއް 5ރ. އަށެވެ.

މަސް ގަންނަން ގޮސް ހުރި މީހަކު "އަދަދު" އާ ވާހަކަ ދައްކަމުން ބުނީ ގިނަ ދުވަސްތަކަށްފަހު މާރުކޭޓުން ރަނގަޅު މަސް ލިބެން ހުރުމަކީ ލިބޭ ހިތްހަމަ ޖެހުމެއް ކަމަށާއި ބޭނުންވާ ވަރަށް މަސް ނުގަނެވޭތާ ދުވަސްތަކެއް ވެފައިވާ ކަމަށެވެ.

"މަސް ކަނޑާ ކިއު ދިގުވުމުން ވަރަށް އުނދަގޫ. އަވަހަށް މަސްކޮޅު ކަނޑާލެވޭނެ ގޮތެއް އޮތް ނަމަ އިތުރަށް ހިތްހަމަ ޖެހުނީސް. ކިއުގައި ޖެހިގެން މިހާރު އެތައް ވަގުތެއް އެބަ ނަގާ،" އޭނާ ބުންޏެވެ.

މަސް ވިއްކަން ހުރި މީހަކު "އަދަދު" އާ ވާހަކަ ދައްކަމުން ބުނީ މިއީ މާރުކޭޓު ފަޅުކޮށް އޮތުމަށްފަހު އެތައް ދުވަހެއް ފަހުން އެންމެ ގިނައިން މަސް ލިބުނު އެއް ދުވަސް ކަމަށެވެ.

"މިއީ މި އަހަރު އެންމެ ގިނައިން މަސް ލިބުނު އެއް .ދުވަސް. ވަރަށް ގިނަ މީހުން ހެނދުނުން ފެށިގެން މަސް ގަންނަން އެބަ އާދޭ. މަސް ތިޔާގިވެގެން މި އުޅެނީ މި ސަރަހައްދުން މަހަށް ދިޔަ ދޯނިތަކަށް މަސް ބޭނުމުން،" އޭނާ ބުންޏެވެ.

ރާއްޖޭގައި މަސްވެރިކަން ދަށްވެ މަހަށް ދޯނިތައް ނުފުރައި ދުވަސްތަކެއް ދިޔަ އެވެ. އޭގެ ސަބަބުން މަސް ނުލިބި، މަހުން އުފައްދާ ބައެއް އުފެއްދުންތަކުގެ އަގު ވެސް ބޮޑުވި އެވެ.

އޭގެއިތުރުން ސަރުކާރުގެ މަސް ކުންފުނި މިފްކޯއަށް މަސް ލިބުން ދަތިވެ، ފިހާރަތަކުގެ ހަރުން ކަނޑު މަސް ހުސްވި އެވެ. ނަމަވެސް މިހާރު މިފްކޯއަށް ވެސް ވަނީ މަސް ލިބި ހަރުތައް ފުރެން ފަށާފަ އެވެ.

މިފްކޯއިން ވަނީ އެ ކުންފުންޏަށް ގަނޑުކުރި މަސް ކިލޯއެއް 16ރ. އަށް ގަނޑު ނުކުރާ މަސް ކިލޯއެއް 14ރ. އަށް ގަންނަން ފަށާފަ އެވެ. ސަރުކާރުގެ ވައުދަކީ އެ އަގު 20ރ. އަށްވުރެ ކުޑަވިޔަ ނުދިނުމެވެ.