ކުރީގެ ދެ ބަންޑާރަނައިބުން ކަމަށްވާ ދިޔާނާ ސައިދާއި އާޒިމާ ޝުކޫރު އިސްވެ ތިއްބަވާ ރާއްޖޭގެ ދުސްތޫރީ އޮނިގަނޑާއި އެ އޮނިގަނޑުގެ ދަށުން ދައުލަތް ހިންގުމާ ގުޅޭ ދިރާސާއެއް ކުރަން ނިންމައިފި އެވެ.

މި ދިރާސާއާ ގުޅޭގޮތުން "އަދަދު" އާ ވާހަކަދައްކަވަމުން އެ ދެ ބޭފުޅުން ވިދާޅުވީ މިއީ އިލްމީ އަދި ފަންނީ މަސައްކަތެއް ކަމަށެވެ. ފެހި ގާނޫނު އަސާސީ ތަސްދީގުކުރި ފަހުން މިފަދަ ދިރާސާއެއް ކުރެވިފައި ނުވާތީ މިއީ މުހިންމު، އަދި ދުސްތޫރީ މުސްތަގުބަލު ކަނޑައެޅުމުގައި ފައިދާވާނެ ކަމެއްކަންވެސް އެބޭފުޅުން ފާހަގަކުރެވި އެވެ.

"ގާނޫނުއަސާސީ އެކުލަވާލުމުގެ މަސައްކަތުގައި ބައިވެރިވި. އަދި ގާނޫނުއަސާސީ ތަންފީޒުކުރުމުގައި މަސައްކަތްކުރުމުގެ ފުރުސަތު ލިބުނު ބައެއްގެ ހައިސިއްޔަތުން، މިފަދަ މަސައްކަތެއްކޮށް، ލިޔެ، ރިކޯޑުކޮށް، މިހާރުގެ ދިވެހި މުޖްތަމައަށާއި، ކިޔަވާކުދިންނަށާއި އަދި މުސްތަގުބަލަށް ފޯރުކޮށްދިނުމަކީ ކޮންމެހެން ކުރަންޖެހިފައިވާ ކަމެއް" ލިޔުމުން މި ނޫހަށް ދިން މައުލޫމާތުގައި ކުރީގެ ދެ އޭޖީއިން ވިދާޅުވި އެވެ.

މި ދިރާސާގައި ގާނޫނު އަސާސީ ބަޔާންކުރާ ހަމަތަކާއި ދައުލަތް ހިންގުމާއި ގާނޫނަށް އަމަލުކުރުމުގާ މިހާތަނަށް ކަން ހިނގާފައިވާ ގޮތްތަކަށް ބަލާ ކުރިއަށް އޮތްތަނުގައި ގާނޫނަށް ގެންނަން ފެންނަ ބަދަލުތައް ފާހަގަކުރާނެ އެވެ.

އާޒިމާ އަދި ދިޔާނާގެ އިތުރުން މި މަސައްކަތުގައި ބައިނަލްއަގުވާމީ ފަސް ތަޖުރިބާކާރަކު ބައިވެރިވާނެ އެވެ. ދިރާސާގެ ޕްލެޓްފޯމެއްގެ ގޮތުގައި ކަނޑައަޅާފައިވަނީ މޯލްޑިވްސް ސެންޓާ ފޯ ޕޮލިސީ ސްޓަޑީޒް އެވެ.

ދިރާސާއާ ގުޅޭ އިތުރު މައުލޫމާތު އަންނަ ހަފުތާގެ ތެރޭ އާންމު ކުރާނެ ކަމަށްވެސް ދެ ބޭފުޅުން ވިދާޅުވި އެވެ.