ރާއްޖޭގެ ހިއުމަން ރައިސްޓްސް ކޮމިޝަން (އެޗްއާރުސީއެމް) ގެ ހުސްވެފައިވާ މެންބަރުކަމަށް އިލެކްޝަންސް ކޮމިޝަން (އީސީ) ގެ ކުރީގެ ނައިބު ރައީސް އިސްމާއިލް ހަބީބު އައްޔަނުކުރުމަށް ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީން ފާސްކޮށްފި އެވެ.

މިއަދު އޮތް ކޮމިޓީ ބައްދަލުވުމުގައި މިކަމަށް ނެގި ވޯޓުގައި ރުހުން ދޭން ފާސްކުރީ ހުރިހާ މެންބަރުންގެ އިއްތިފާގުންނެވެ.

ކޮމިޓީން އޭނާއާ އިންޓަވިއު ކުރީ އިއްޔެ އެވެ. އެ އިންޓަވިއުގައި 75 ޕަސެންޓުން މަތިން އޭނާއަށް ލިބިވަޑައިގަތެވެ.

އެޗްއާރުސީއެމްގެ ގޮނޑިއެއް ހުސްވީ އެ ކޮމިޝަނުގެ ނައިބު ރައީސް ޑރ. އަހުމަދު އަދުހަމް އަބްދުالله އިސްތިއުފާ ދެއްވުމުންނެވެ. އެ މަގާމަށް ކުރިމަތިލުމުގެ ފުރުސަތު ރައީސް އޮފީހުން ތިން ފަހަރެއްގެ މަތިން ހުޅުވާލި އެވެ. ފުރަތަމަ ތިން ފަހަރު އެކަށީގެންވާ ވަރަށް މީހުން ކުރިމަތިނުލަ އެވެ.

ހަބީބު ވޭތުވެދިޔަ 10 އަހަރު ހުންނެވީ އީސީގެ މެންބަރެއްގެ ގޮތުގަ އެވެ. އެންމެ ފަހުން ހުންނެވީ އެ ކޮމިޝަނުގެ ނައިބު ރައީސްގެ މަގާމުގަ އެވެ. ނިމިދިޔަ ރިޔާސީ އިންތިހާބުގައިވެސް އޭނާ ހުންނެވީ އެ މަގާމުގަ އެވެ.

އީސީގެ ގާނޫނު ބުނާގޮތުން ކޮމިޝަނުގެ މެންބަރަކަށް ގިނަ ވެގެން ފުރިހަމަ ކުރެވޭނީ ދެ ދައުރެވެ. އީސީއަށް ހަބީބު ފުރަތަމަ އައްޔަންކުރީ މާޗު 13، 2014 ގަ އެވެ. ދެވަނަ ދައުރަކަށް އައްޔަންކުރީ މާޗު 13، 2019 ގަ އެވެ.