މާލޭގައި ފެން ރައްކާކުރެވޭ ކެޕޭސިޓީ އިތުރުކުރަން މީގެ ހަތަރު ވަރަކަށް އަހަރު ކުރިން އެމްޑަބްލިޔުއެސްސީ އިން ފެށި މަޝްރޫއަށް ބޭނުންވާ ފައިސާ ނެތިގެން އެ މަސައްކަތް ހުއްޓިފައިވާ ކަމަށް އެ ކުންފުނިން ބުނެފި އެވެ.

އެމްޑަބްލިޔުއެސްސީގެ މި މަޝްރޫއަކީ މީގެ އަށް ވަރަކަށް އަހަރު ކުރިން މާލެއަށް ދިމާވި ފެނުގެ ކާރިސާއާ ގުޅިގެން، އެފަދަ ކަމަކުން ރައްކާތެރިވުމަށާއި، މާލޭގެ ފެނުގެ ރައްކާތެރިކަން ކަށަވަރުކުރަން އެ ކުންފުނިން އެކުލަވާލި "ވޯޓާ ސެކިއުރިޓީ ޕްލޭން" ގެ ދަށުން 2020 ގެ ސެޕްޓެމްބަރުގައި ފެށި މަޝްރޫއެކެވެ.

އޭރު އެމްޑަބްލިޔުއެސްސީ އިން ބުނީ 82 މިލިއަން ރުފިޔާ ހަރަދުކޮށްގެން ހިންގާ މި މަޝްރޫއުގެ ދަށުން 13،648 ކިޔުބިކް މީޓަރުގެ ފެން ރައްކާ ކުރެވޭ ދެ ތާންގީ ބަހައްޓާނެ ކަމަށެވެ. އަދި މުޅި މަޝްރޫއުގެ މަސައްކަތް 2021 ގެ ނިޔަލަށް ނިމޭނެ ކަމަށް ވެސް ބުންޏެވެ.

އެކަމަކު މިއަދާ ހަމައަށް އައިއިރު، އެ މަސައްކަތް ކުރަމުންދާ މާލޭގެ 378 ނަމްބަރު ކޮށީ (ކުރިން އެސްޓީއޯގެ ރެޑީ މިކްސް ކޮންކްރީޓް ހުރި ތަން) ގައި، އެންމެ ތާންގީއެއް ވެސް ނުބެހެއްޓެ އެވެ.

މިކަމާ ގުޅޭ ގޮތުން "އަދަދު" އިން ސުވާލުކުރުމުން އެމްޑަބްލިޔުއެސްސީގެ މެނޭޖިން ޑިރެކްޓަރު އަބްދުލް މަތީން މުހައްމަދު ވިދާޅުވީ، އެ މަޝްރޫއު ހުއްޓުނީ އެކި ސަބަބުތަކާ ހުރެ ކަމަށެވެ. އޭގެ ތެރޭގައި ކުރީ ސަރުކާރުން މަޝްރޫއަށް ފައިސާ ހަމަޖައްސާފައި ނެތުމާއި، މިހާރު ފައިސާ ހޯދަން ހުރި ދަތިތައް އޭނާ ނަންގަތެވެ.

"ކުރީ ސަރުކާރަކުން މިކަމަށް ބަޖެޓް ހަމަޖެހިފައެއް ނެތް. މި ސަރުކާރުން ވެސް ބަޖެޓު ހަމަޖެހިފައި ނުވާތީ މިހާރު ދަނީ ބަޖެޓް ހަމަޖެއްސުމުގެ މަސައްކަތް،" މަތީން ވިދާޅުވި އެވެ.

އަނެއް ސަބަބަކަށް މަތީން ފާހަގުރެއްވީ ތާންގީތައް ބަހައްޓަން ޖެހޭ ސައިޓުގައި ހުރި ޓެކްނިކަލް މައްސަލަތަކެވެ. އޭނާ ވިދާޅުވީ އެ ބިމަކީ ކުރިން ކުނި ހުރި ތަނަކަށް ވުމުން ގިނަ ގޮންޖެހުންތަކާ ދިމާވެ، އިތުރު މަސައްކަތް ކުރަން ޖެހިފައިވާ ކަމަށެވެ.

"އެ ބިމަކީ ކުރިން ކުނި ހުރިތާކަށް ވުމުގެ ސަބަބުން އެ ބިން ވަނީ ވަރަށް ބޮޑަށް ތަގައްޔަރުވެފައި. އެހެންވީމަ ޖެހެނީ އެތާގަ ފައުންޑޭޝަންއެއް އަޅާފަ ދެން އެ ތާންގިތައް ބަހައްޓަން،" އޭނާ ވިދާޅުވި އެވެ.

ފެން ތާންގީތައް ބެހެއްޓުމުގެ ޕްރޮޖެކްޓުގައި ގޮންޖެހުންތައް ހުރި ނަމަވެސް، މި މަހުގެ ތެރޭގައި މި މަޝްރޫއުގެ މަސައްކަތް އަލުން ފެށޭ ވަރު ވާނެ ކަމަށް މަތީން ވިދާޅުވި އެވެ.

އެމްޑަބްލިޔުއެސްސީ އިން ކުރިން ބުނެފައިވާ ގޮތުގައި މި މަޝްރޫއު ނިމުމުން މާލޭގައި ފެން ރައްކާކުރެވޭ ކެޕޭސިޓީ ޖުމްލަ 50،296 ކިޔުބިކް މީޓަރަށް އިތުރުކުރެވޭނެ އެވެ. މިއީ މިހާރު މާލޭގައި ފެން ރައްކާކުރެވޭ ކެޕޭސިޓީގެ ދެ ގުނައަށް ވުރެ ބޮޑު އަދަދެކެވެ.