ރައީސުލްޖުމްހުރިއްޔާގެ ރަސްމީ ގެކޮޅު މުލީއާގޭގައި މަސައްކަތްކުރާ މުވައްޒަފުންގެ އަދަދު ހާމަކުރެވެން ނެތް ކަމަށް ރައީސް އޮފީހުން ބުނި ކަމަށް އިއްޔެ ރިޕޯޓުކުރި އެވެ.

މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން "އަދަދު" އިން މެއި 14، ގައި ހޯދަން ހުށަހެޅީ މުލީއާގޭގައި ވަޒީފާ އަދާކުރާ މީހުންގެ އަދަދާއި މުސާރަ އާއި އިނާޔަތްތައް ހޯދުމަށެވެ. މި ހުށަހެޅުމަށް ރައީސް އޮފީހުން ޖަވާބު ދިނީ، އަވަސް އަރުވާލައިގެން ބުރާސްފަތި ދުވަހާއި ހުކުރު ދުވަހު ދިން ޖަވާބުތަކުގެ ތެރެއިންނެވެ.

އެ މައުލޫމާތު ހިއްސާކުރަން ދެކޮޅު ހަދައި ރައީސް އޮފީހުން ދިން ޖަވާބުގައި ބުނީ "ސަލާމަތީ ސަބަބުތަކަށް ޓަކައި އެދުނު މައުލޫމާތު މި ވަގުތަށް ހިއްސާކުރެވެން ނެތް" ކަމަށެވެ. ނަމަވެސް, މައުލޫމާތު ނުދީ ހިފެހެއްޓީ އާރުޓީއައި ގާނޫނުގެ ކޮން މާއްދާއަކަށް ރިއާޔަތްކޮށް ކަމެއް ރައީސް އޮފީހުގެ ޖަވާބުގައި ބުނެފައެއް ނެތެވެ.

ރިޔާސީ އިންތިހާބު ކާމިޔާބު ކުރުމަށްފަހު މި ސަރުކާރުގެ ސިޔާސީ މުވައްޒަފުންގެ އަދަދު 700 އަށްވުރެ އިތުރު ނުވާކަމަށް ވައުދުވި އިރު އޭގެ ތެރޭގައި މުލީއާގޭގެ މުވައްޒަފުން ހިމެނޭ ކަމަށް ވަނީ ބުނެފަ އެވެ.

"މި އަދަދު ނިންމާފައި މިވަނީ ސަރުކާރުގެ ވުޒާރާތަކާއި ރައީސް އޮފީހާއި ރައީސްގެ ގެކޮޅާއި ނައިބު ރައީސްގެ ގެކޮޅާއި، މިހުރިހާ ތަނެއްގައި މަސައްކަތް ކުރާ އިދާރީ މުވައްޒަފުން ހިމެނޭހެން," އިންތިހާބީ ރައީސްގެ ތަރުޖަމާނަކަށް އޭރު ހުންނެވި މުހައްމަދު ފިރުޒުލް އޮކްޓޯބަރު 10، 2023 ގައި ވިދާޅުވި އެވެ.

ސިޔާސީ މުވައްޒަފުންގެ އަދަދާ ގުޅޭ ގޮތުން ނޫސްވެރިންގެ ބައްދަލުވުންތަކުގައި ސަރުކާރާ ސުވާލުކުރިމަތިކުރުވާ ކޮންމެ ފަހަރަކު ބުނަނީ އެ އަދަދުތައް ސިއްރުކޮށްފައި ނުބާއްވާނެ ކަމަށެވެ. ރައީސް އޮފީހުން އެންމެ ފަހުން ބޭއްވި ނޫސްވެރިންގެ ބައްދަލުވުމުގައި ވެސް އެ އޮފީހުގެ ތަރުޖަމާނު ހީނާ ވަލީދު ވިދާޅުވީ އެ މައުލޫމާތު ވަރަށް އަވަހަށް ހާމަކުރާނެ ކަަމަށެވެ.

ނަމަވެސް ރައީސް އޮފީހުގެ ސިޔާސީ މުވައްޒަފުންގެ އަދަދު ހާމަކުރަން އެދި ހުށަހެޅި އާރުޓީއައި އަށް ޖަވާބު ދޭން ދެކޮޅު ހަދައި ފޮނުވި ލިޔުމުގައި އެންގީ އެ އޮފީހުގެ އަދާހަމަ ނުކޮށް އޮތް ވެބްސައިޓު ބެލުމަށެވެ. އެ ވެބްސައިޓުގައި ސިޔާސީ ހުރިހާ މުވައްޒަފުންގެ ނަމާއި މަގާމު އާންމުކޮށްފައި ނުވެ އެވެ.

ރައީސް ވެރިކަމަށް ވަޑައިގެންނެވިތާ ދެ މަސް ނުވަނީސް އެމަނިކުފާނުގެ އޮފީހުގެ ވެބްސައިޓުގައި އެ މައުލޫމާތު ހިއްސާކުރުން ވަނީ ހުއްޓާލާފަ އެވެ.

މުހިއްމު ބައެއް ހަބަރު