ގޭންގު ކުށްތައް ހުއްޓުވުމަށް ޓަކައި އެކަމާއި ބެހޭ ގާނޫނަށް މުހިންމު ބަދަލުތަކެއް ގެންނާނެ ކަމަށް ރައީސް ޑރ.މުހައްމަދު މުއިއްޒު ރޭ ވިދާޅުވެއްޖެ އެވެ.

ރާއްޖޭގެ 59 ވަނަ މިނިވަން ދުވަސް ފާހަގަކުރަން ޒުވާނުންގެ މަރުކަޒުގައި ރޭ ބޭއްވި ރަސްމިއްޔާތުގައި ރައީސް ވިދާޅުވީ ގޭންގުތަކުގެ މައްސަލައަކީ ނިޒާމުގެ ތެރެއަށް ވަރަށް ބޮޑަށް ވަދެފައިވާ މައްސަލައެއް ކަމަށެވެ. އެ މައްސަަލައާ މެދު ލޯމަރާލައިގެން ތިބިތިބުން ބަދަލުކޮށް ގޭންގު ކުށްތައް މަނާކުރުމަށް ބެހޭ ގާނޫނަށް މުހިންމު އިސްލާހުތަކެއް ގެންނަވާނެކަމަށް އެމަނިކުފާނު ވިދާޅުވި އެވެ.

"ނިޒާމުގެތެރެއަށް ވަރަށް ބޮޑަށް ބޯ ވަދެފަ އޮތް މައްސަލައެއް، އެހެން ލޯމަރާލައިގެން ތިބެންޔާ ތިބެންވީ ހަމަ، އެކަމަކު އެއީ އެއް ނޫން ރައްޔިތުން ބޭނުންވާ ގޮތަކީ. ލޯ ހުޅުވަންވީ ހުރިހާ ރައްޔިތުން. އެންމެން އެކައްޗެެއް ކިޔާފަ އެކަތިގަނޑަކަށް ވާންޖެހޭ މި މައްސަލައިގަ. އިރާދަކުރެއްވިއްްޔާ ގޭންގު ކުށްތައް މަނާކުރުމާއި ބެހޭ ގާނޫނަށް މުހިންމު އިސްލާހުތަކެއް އަޅުގަނޑުމެން ގެންނާނަން" ރައީސް ވިދާޅުވި އެވެ.

ގޭންގު ކުށްތަކާއި ބެހޭ މައްސަލަތައް ހުއްޓުވަން ފުލުހުންގެ ހާއްސަ ޔުނިޓެއް މިހާރު އުފައްދާފައިވާ ކަމަށް ވެސް އެމަނިކުފާނު ވިދާޅުވި އެވެ.

ރައީސް ވިދާޅުވީ ގޭންގު ކުށްތަކުގައި ޖެހޭ ސުކޫލުކުދިންނާއި ތަންކޮޅެއް ޒުވާން ކުދިން ބޭތިއްބުމަށް ދ.ވާދޫގައި ފެސިލިޓީއެއް ގާއިމުކުރަން މިހާރު ކެބިނެޓުން ނިންމަވައިފައިވާ ކަމަށެވެ. އެ ފެސިލިޓީގައި މަަސައްކަތް ކުރާނީ އެ ގެންދެވޭ ކުދިންނަށް އެކިކަހަލަ ފަންނުތައް ދަސްކޮށްދީ މުޖުތަމައުއަށް ބޭނުންތެރި ބަޔަކަށް ހަދަން ކަމަށް ވެސް ރައީސް ވިދާޅުވި އެވެ.