ހަރަދުކުޑަކުރުމުގެ ގޮތުން ގިނަ ފިޔަވަޅުތަކެއް އަޅަން އެޑިއުކޭޝަން މިނިސްޓްރީން ސުކޫލުތަކަށް ސާކިއުލާއެއް ފޮނުވައިފި އެވެ.

އަދަދު އަށް ކޮޕީއެއް ލިބިފައިވާ އެ ސާކިއުލާ އަކީ ސައްހަ ލިއުމެއްކަން އެޑިއުކޭޝަން މިނިސްޓްރީގެ އިސް އޮފިޝަލަކު "އަދަދު" އަށް ކަށަވަރުކޮށްދެއްވި އެވެ. އޭނާ ވިދާޅުވީ މިއަހަރު އެކަނިން އަޅާ ފިޔަވަޅެއް ނޫންކަމަށާއި ކޮންމެ އަހަރެއްގެ ވެސް މިހިސާބުގައި އިރު އަޅާ ފިޔަވަޅުތަކެއްކަ ކަމަށެވެ.

"މިއީ ހަމަ ކޮންމެ އަހަރެއްގެ ވެސް މިހާތަނަށް އަންނައިރު އަޅަމުންދާ ފިޔަވަޅުތަކެއް. ހަމައެކަނި މިއަހަރު ހަރަދު ކުޑަކުރުމަށް އަޅައިގެން އުޅޭ ފިޔަވަޅުތަކެއް ނޫން" އޭނާ ވިދާޅުވި އެވެ.

ހަރަދުކުޑަކުރުމުގެ ގޮތުން ކުރަން އެންގި ބައެއް ކަންތައްތައް

• އިދާރީ އޮފީސް ބޭނުންކުރާ ވަގުތު މަދުކުރުމަށްޓަކައި އެދުވަހެއްގެ މަސައްކަތްތައް ރަސްމީ މަސައްކަތު ގަަޑީގައި ނިންމުން
• ކޮންމެހެން ބާއްވަން ޖެހޭ މުނާސަބަތެއް ނޫނީ ނުބޭއްވުން.
• ބަޖެޓުން ހަރަދުކޮށްފައި ކޮންމެހެން ކުރަންޖެހޭ ދަތުރެއް ނޫނީ ނުކުރުން.
• ސުކޫލު އިމާރަތްތަކުގައި ބޭނުންކުރާ އޭސީތައް 25 ޑިގްރީއަށްވުރެ ދަށްނުކުރުމާއި ރަސްމީ ގަޑި ނިމުމުން އެ އޭސީތައް ނިއްވައިލުން.
• ކުލާސްރޫމްތަކުގައި ހުންނަ ފަންކާތަކާއި ލައިޓުތައް ބޭނުންކޮށް ނިމުމުން ނިއްވައިލުން.
• ޗާޕުކުރަންޖެހޭ ލިޔުންތައް ވީހާވެސް މަދުކުރުމާއި، ޗާޕުކުރާއިރު ދެފުށަށް ޗާޕުކުރުމާއެކު ކަޅު ކުލައިން ޗާޕުކުރުން
• 2 ގަޑިއިރަށް ވުރެ ކުރު ޖަލްސާތަކަށް ސައި،ކެއުން ފަދަ އެއްޗެހި ތައްޔާރު ނުކުރުމާއި އަދި މިފަދަ ޖަލްސާތަކަށް އަގުބޮޑެތި މާބޮނޑި ފަދަ އެއްޗެހި ބޭނުން ނުކުރުން.

ދައުލަތަށް މިހާރު ކުރިމަތިވެފައިވާ މާލީ ދަތިކަމާ ގުޅިގެން، ހަރަދު ކުޑަކުރުމުގެ ގިނަ ފިޔަވަޅުތަކެއް އަޅާނެކަން ސަރުކާރުން ކުރިން ވަނީ ހާމަކޮށްފަ އެވެ. ކައުންސިލަރުންނާއި މަޖިލިސް މެންބަރުންގެ އަދަދު މަދުކުރުމާއި އަދި ހުރިހާ އިންތިހާބުތަކެއް އެއްކޮށްލުން އޭގެ ތެރޭގައި ހިމެނެ އެވެ.