ކޮމިޝަނާ ޖެނެރަލް އޮފް ކަސްޓަމްސްގެ މަގާމުން ވަކިކޮށް ހޯމް މިނިސްޓަރީގެ ސްޓޭޓު މިނިސްޓަރެއްގެ މަގާމަށް ބަދަލު ކުރި ޔޫސުފް މާނިއު އެ މަގާމުން އިސްތިއުފާ ދީފި އެވެ.

ފޯނަށް ޖަވާބު ނުދެއްވާތީ މާނިއު އިސްތިއުފާ ދިނީ ކޮން ސަބަބަކާހުރެ ކަމެއް ނޭނގެ އެވެ. އެކަމަކު އޭނާ އެ މަގާމުން އިސްތިއުފާ ދިންކަން ސަރުކާރުގެ އިސް އޮފިޝަލަކު ވަނީ "އަދަދު" އަށް ކަށަވަރު ކޮށްދީފަ އެވެ.

ކަސްޓަމްސްގެ ކޮމިޝަނަރުކަމުން މާނިއު ކުއްލިއަކަށް ވަކި ކުރި މިދިޔަ ހޯމަ ދުވަހު އެވެ. އޭނާ އެ މަގާމުން ވަކިކޮށް ކަސްޓަމްސްގެ ޑެޕިއުޓީ ކޮމިޝަނަރުގެ މަގާމުގައި ހުންނެވި ފާތިމަތު ދިޔާނާ އައްޔަނު ކުރެއްވީ މާނިއުއަށް އެކަން ނާންގަ އެވެ.

ކަސްޓަމްސްގެ ކޮމިޝަނަރުކަމުން މާނިއު ވަކި ކުރީ ކޮން ސަބަބަކާ ހުރެ ކަމެއް ސަރުކާރުން ހާމައެއް ނުކުރެ އެވެ. ރައީސް އޮފީހުން ބުނި ގޮތުގައި ކޮމިޝަނާ ޖެނެރަލްގެ މަގާމަށް ދިޔާނާ އައްޔަންކުރީ ކަސްޓަމްސް ގާނޫނުގެ ދަށުން ރައީސް ޑރ. މުހައްމަދު މުއިއްޒުއަށް ލިބިވަޑައިގަންނަވާ ބާރުގެ ދަށުން ކަމަށެވެ.

ކަސްޓަމްސްގެ ކޮމިޝަނަރުކަމުން މާނިއު ވަކި ކުރީ، އެ މަގާމުގައި ހުންނަވައިގެން ދެއްކެވި ގިނަ ވާހަކަތަކަކަށް ގިނަ ބައެއްގެ ފާޑުކިޔުން އަމާޒުވެފައިވަނިކޮށެވެ.

އެގޮތުން ކަސްޓަމްސް އިން އަތުލާ މަސްތުވާތަކެތި ފުލުހުންނާ ހަވާލުނުކޮށް، އެ އިދާރާއިން އެތަކެތި 24 ގަޑީރުގެ ތެރޭގައި ނައްތާލަން ބޭނުންވާ ކަމަށް މި ފަހުން ރައްޔިތުންގެ މަޖިލީހުގެ ސަލާމަތީ ކޮމިޓީގައި މާނިއު ވިދާޅުވުމުންވެސް ފާޑުކިޔުން އަމާޒުވި އެވެ.

އެ ދުވަހުގެ ކޮމިޓީ ބައްދަލުވުމުގައި މާނިއު ވަނީ ރާއްޖޭގެ ބޯޑަރު ބެލެހެއްޓުމުގައި ކުރިމަތިވެފައިވާ ގިނަ ގޮންޖެހުންތަކެއް ފާހަގަކުރައްވައިފަ އެވެ.

އެގޮތުން ރާއްޖޭގެ ބޯޑަރު ބެލެހެއްޓުމުގެ ފުރިހަމަ ގާބިލުކަން މިވަގުތު ކަސްޓަމްސްގައި ނެތް ކަމަށާއި ރާއްޖެ ވަންނަ އުޅަނދުތައް މޮނީޓާކޮށް އެ އުޅަނދުތަކާ ހަމައަށް ދަތުރުކުރުމުގެ ގާބިލުކަންވެސް ކަސްޓަމްސްގައި ނެތް ކަމަށް އޭނާ އެދުވަހު ވިދާޅުވި އެވެ.