މިދިޔަ ބުރާސްފަތި ދުވަހު ހިނގި އަލިފާނުގައި އޮފީސް އިމާރަތް އަނދާ ހުލިވެ ހިދުމަތްތަކަށް ބުރޫއަރާފައިވާ އެންވަޔަރަމަންޓު މިނިސްޓްރީއަށް އާ ސިޔާސީ މުވައްޒަފަކު އައްޔަންކޮށްފި އެވެ.

މި ނޫހަށް އެނގިފައިވާ ގޮތުގައި އެ މިނިސްޓްރީގެ ސީނިއާ ޕޮލިޓިކަލް ޑިރެކްޓަރުގެ މަގާމަށް ރައީސް ޑރ. މުހައްމަދު މުއިއްޒު އައްޔަންކޮށްފައި ވަނީ އިދިކޮޅު ދަ ޑިމޮކްރެޓްސް ޕާޓީއަށް ނިސްބަތްވާ ލީލާ އިބްރާހިމް މަނިކު އެވެ.

ލީލާ އައްޔަން ކުރިކަން އެންވަޔަރަމަންޓު މިނިސްޓްރީގެ ސީނިއާ ބައެއް އޮފިޝަލުން މި ނޫހަށް ކަށަވަރުކޮށް ދެއްވި އެވެ.

މިއަހަރު ބޭއްވި ރައްޔިތުންގެ މަޖިލިސް އިންތިހާބުގައި ލީލާ ވަނީ ޑިމޮކްރެޓްސްގެ ޓިކެޓުގައި ތ. ގުރައިދޫ ދާއިރާއަށް ވާދަ ކުރައްވައިފަ އެވެ. ނަމަވެސް ވޯޓުލާން ހަފުތާއަކަށްވުރެ ކައިރިވެފައި ވަނިކޮށް އޭނާގެ ނަން ނަގައި، ތާއިދު ކުރެއްވީ، އެ ގުރައިދޫ ދާއިރާގެ މިހާރުގެ މެންބަރު، ހަނާން މުހައްމަދު ރަޝީދު އަށެވެ. ހަނާނު ވާދަ ކުރެއްވީ ޕީއެންސީގެ ޓިކެޓުގަ އެވެ.

ލީލާ އެންވަޔަރަމެންޓު މިނިސްޓްރީގެ ވަޒީފާއަށް ނުކުންނަން ފެއްޓެވީ އަލިފާނުގެ ހާދިސާއަށް ފަހު، އެ އޮފީސް ވަގުތީ ގޮތުން ދަރުބާރުގެއަށް ބަދަލުކޮށްފައި ވަނިކޮށެވެ.

މިކަމާ ގުޅިގެން ލީލާ ވާހަކަ ނުދެއްކެވި އެވެ. ކުރި މެސެޖަށް ވެސް ޖަވާބެއް ނުދެއްވި އެވެ.

ނިމިދިޔަ އެމްޑީޕީ ވެރިކަމުގައި ވަޒީފާއާ ބެހޭ ޓްރައިބިއުނަލުގެ މެންބަރަކަށް ވެސް ލީލާ ހުންނެވި އެވެ. އެ މަގާމުން އިސްތިއުފާ ދެއްވުމަށް ފަހު އޭނާ ޑިމޮކްރެޓްސްއާ ގުޅިވަޑައިގަތީ މިދިޔަ އަހަރު ބޭއްވި ރިޔާސީ އިންތިހާބުގެ ފުރަތަމަ ބުރުގެ ކެމްޕޭނު ދުވަސްވަރު އެވެ.

ހަރަދު ބޮޑުވެ، އާމްދަނީ ދެކޮޅު ނުޖެހޭ ހިސާބަށް ދައުލަތުގެ މާލީ ހާލަތު ގޮސްފާތީ، ވަޒީފާއިން މީހުން މަދުކުރުމަށް ސަރުކާރުން މަސައްކަތް ކުރާ ކަމަށް ބުނި ނަމަވެސް ސިޔާސީ ވަޒީފާ ގިނަ ބަޔަކަށް މިހާރު ވެސް ދަނީ ދެމުންނެވެ.

ރައްޔިތުންގެ މަޖިލީހުގައި ޕީއެންސީއަށް ނިސްބަތްވާ މެންބަރުން އެދިވަޑައިގެންނެވި ހުރިހާ ވަޒީފާއެއް ހަމަޖައްސާ ދެއްވާފައިވާކަން ދޭހަވާ ގޮތަށް ރައީސް ޑރ. މުހައްމަދު މުއިއްޒު، ޑިސެމްބަރު 8 ގައި މެމްބަރުންނަށް ވަނީ މެސެޖެއް ވެސް ފޮނުއްވައިފަ އެވެ.

ލީލާ އަށް ވަޒީފާ މިދިނީ ޑިމޮކްރެޓުސް ވެސް ސަރުކާރާ ދެކޮޅަށް ތެދުވެ، ފާޑުކިޔައި، ޖަލްސާތައް ބާއްވަން ފަށާފައި ވަނިކޮށެވެ.