މި ސަރުކާރުން ވެރިކަމާ ހަވާލުވީ ފަހުން، ފުރަތަމަ ހަތް މަހުގެ ތެރޭގައި ވޭސްޓު މެނޭޖުމަންޓު ކޯޕަރޭޝަން (ވެމްކޯ) އަށް އަލަށް 671 މުވައްޒަފުން ނަގާފައިވާކަން ހާމަވެެއްޖެ އެވެ.

ވެމްކޯއަށް ނެގި މުވައްޒަފުންގެ އަދަދުތައް އެ ކުންފުނިން ހިއްސާ ކުރީ މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން އަމިއްލަ ފަރާތަކުން ހުށަހެޅި އާރުޓީއައި ރިކުއެސްޓެއްގެ ޖަވާބުގަ އެވެ.

އެ ފަރާތުން އެދުނީ ނޮވެމްބަރު 17، 2023 އިން ޖުލައި 3، 2024 އަށް އެ ކުންފުންޏަށް އަލަށް ނެގި މުވައްޒަފުންގެ އަދަދާއި ވަކިވި ނުވަތަ ވަކިކުރި މުވައްޒަފުންގެ އަދަދު ހިއްސާކޮށްދިނުމަށެވެ.

ނޮވެމްބަރު 17، 2023 އިން ޖުލައި 3، 2024 އަށް ވެމްކޯގެ ޑިޕާޓްމަންޓުތަކަށް ނެގި މުވައްޒަފުން:

• ދެކުނުގެ އޮޕަރޭޝަންސް: 221 މުވައްޒަފުން
• މާލެ އޮޕަރޭޝަންސް: 99 މުވައްޒަފުން
• ހުޅުމާލެ އޮޕަރޭޝަންސް: 92 މުވައްޒަފުން
• އުތުރުގެ އޮޕަރޭޝަންސް: 59 މުވައްޒަފުން
• ކޯޕަރޭޓް އެޑްމިނިސްޓްރޭޝަން: 55 މުވައްޒަފުން
• މާފުށި އޮޕަރޭޝަންސް: 33 މުވައްޒަފުން
• މެއިންޓަނަންސް އެންޑް އިންޖިނޭރިން: 27 މުވައްޒަފުން
• ވިލިމާލެ އޮޕަރޭޝަންސް: 25 މުވައްޒަފުން
• ފިނޭންސް: 22 މުވައްޒަފުން
• ބިޒްނަސް ޑިވެލޮޕްމަންޓް އެންޑް މާކެޓިން: 15 މުވައްޒަފުން
• އެގްޒެކެޓިވް: ތިން މުވައްޒަފުން
• ހިއުމަން ރިސޯސަސް: އެއް މުވައްޒަފަކު
• އިންޓާނަލް އޮޑިޓު: އެއް މުވައްޒަފަކު
• މެނޭޖިން ޑިރެކްޓަރުގެ ބިއުރޯ: ހަތަރު މުވައްޒަފުން
• ޕްރޮކިއުމަންޓު: ފަސް މުވައްޒަފުން
• ޕްރޮޖެކްޓްސް: ދެ މުވައްޒަފުން
• ޓްރާންސްޕޯޓް އެންޑް ލޮޖިސްޓިކްސް: ފަސް މުވައްޒަފުން
• ވެމްކޯ އެކަޑަމީ: ދެ މުވައްޒަފުން

މި ސަރުކާރުގެ ދައުރު ފެށުނު ފެށުނު ފަހުން އެންމެ ގިނަ މުވައްޒަފުން ނެގީ ދެކުނުގެ އަތޮޅުތަކާއި މާލެ އާއި ހުޅުމާލޭގެ އޮޕަރޭޝަންސްތަކަށެވެ. މި މުއްދަތުގައި އެ ކުންފުނީގެ ވަޒީފާއިން ކެނޑި/ދުރުކުރި މުވައްޒަފުންގެ އަދަދަކީ 65 އެވެ. އެންމެ ގިނަ މުވައްޒަފުން ވަކިވީ ނުވަތަ ވަކިކުރީ މާލެ އާއި ހުޅުމާލޭގެ އޮޕަރޭޝަންތަކުންނެވެ.

ކުނި މެނޭޖުކުރުމުގެ މަސައްކަތަށް އުފައްދާފައިވާ ވެމްކޯއަކީ ސައްތައިން ސައްތަ ދައުލަތުގެ ހިއްސާ އޮންނަ ކުންފުންޏެކެވެ. އެ ކުންފުނިން ރާއްޖޭގެ އެކި ކަންކޮޅުތަކުގައި ކުނި އުކާލުމާއި ކުނި ނައްތާލުމުގެ ހިދުމަތްދެ އެވެ.

ވެމްކޯއަކީ މިހާރު ވެސް ގެއްލުމުގައި ހިންގަމުން އަންނަ، ދައުލަތުގެ ބަޖެޓުން ދޭ ފައިސާއިން ހިންގުމުގެ ހަރަދުތައް ހަމަޖައްސަން ޖެހޭ ކުންފުންޏެކެވެ. އެ ކުންފުނިން ފޯރުކޮށްދޭ ހިދުމަތްތަކުން އަގު ނަގައިގެން ކުންފުނީގެ ހަރަދުތައް ދެކޮޅު ނުޖެހެ އެވެ.