ފިރިހެނުންގެ ޖިންސީ އެދުންވެރިކަން ވަރުގަދަކޮށްދޭ ކަމަށް ބުނެ އެކި ޕްލެޓްފޯމްތަކުގައި ވިއްކަމުންދާ މާމުޔެއް އެތެރެކޮށް ވިއްކުމާއި ބޭނުންކުރުން މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން މިއަދު މަނާކޮށްފި އެވެ.

ސެކްޝުއަލް އެންހޭންސްމަންޓް އަދި އިރެކްޓައިލް ޑިސްފަންކްޝަން އަށް ބޭނުންކުރާ ޑޮކްޓަރީ މާމުއިގެ ބާވަތެއް ރާއްޖޭގައި ހުއްދަ ނެތި ވިއްކަމުންދާ ކަމަށް އެމްއެފްޑީއޭއިން އިއުލާނުކުރީ ސެޕްޓެމްބަރު 2022, ގަ އެވެ.

މިއަދު އެ އިދާރާއިން ނެރުނު ބަޔާނުގައި ވަނީ އޮންލައިން ޕޯޓަލްތަކާއި ސޯޝަލް މީޑިއާ ޕްލެޓްފޯމްތަކުގައި ވިއްކަމުންދާ މާމުއިގައި ބޭހުގެ މާއްދާއެއް ކަމަށްވާ "ޓަޑަލަފިލް" އަދި "ސައިލްޑެނަފިލް" ހިމެނޭ ކަމަށް އެ އޮތޯރިޓީއަށް ފާހަގަވެފައިވާ ކަމަށެވެ.

"ވީމާ މިފަދަ ތަކެތި ބޭނުން ކުރުމުގެ ސަބަބުން ލިބިދާނެ ސިއްހީ ގެއްލުންތަކުން ރައްޔިތުން ސަލާމަތް ކުރުމަށްޓަކައި މިފަދަ އުފެއްދުންތައް އިމްޕޯޓް ކުރުމާއި ވިއްކުމާއި އަދި ބޭނުންކުރުމަކީ މަނާ ކަމެއް ކަމުގައި ދެންނެވީމެ," އެ ބަޔާނުގައި ބުނެފައިވެ އެވެ.

މި އުފެއްދުންތަކަކީ ޔޫއެސް އެފްޑީއޭ އިން ވެސް ރައްކާތެރި ނޫން ކަމަށް ފާހަގަކޮށްފައިވާ އުފެއްދުންތައް ކަމަށް ވެސް އެ ބަޔާނުގައިވެ އެވެ.