ވައްކަން ކުރި މީހެއް ނުވަތަ ބޮޑު ކުށްވެރިޔެއް ވިޔަސް ފިލަން އުޅުމުގެ ތެރޭގައި ފުރާނައަށް ނުރައްކާވާވަރުގެ ބޮޑު އަނިޔާއެއްވެއްޖެނަމަ، އިންސާނިއްޔަތުކަމުގެ ކަންފުޅެއް ހުރިނަމަ އެ މީހަކަށް އަވަސް ފަރުވާ ދޭން ވާނެ އެވެ. އެންމެ ފުރަތަމަ ގެންދާނީ ހޮސްޕިޓަލަށެވެ. ހާއްސަކޮށް ފުލުހުންގެ ބެލުމުގެ ދަށަށް މީހަކު ގެންދަން އުޅުމުގެ ތެރޭގައި އަނިޔާވެއްޖެނަމަ އެކަން ވެގެންދާނީ ވަރަށް ބޮޑު ކަމަކަށްވުމުން، އަމާޒުވާ ތުހުމަތުގެ އިނގިލިތަކުން ރައްކާތެރިވުމަށް ވެސް ހޮސްޕިޓަލަށް ގެންދިޔުން ވަރަށް މުހިންމެވެ.

ނަމަވެސް ޖުލައި 15، ގައި ޑްރަގް ކޯޓުގެ އަމުރެއް ފުލުހުން ތަންފީޒު ކުރަން މާފަންނު ގެއަކަށް ގޮސް ހަރަކާތްތެރިވަނިކޮށް، ހައްޔަރުކުރަން ދިޔަ މުހައްމަދު އަޒްމީލް ޖަލީލު، 38 ފިލަން އުޅުމުގެ ތެރޭގައި ގޭގެ ފުރަތަމަ ފަންގި ފިލާއިން ވެއްޓި އޭނާ ވަރަށް ބޮޑަށް ޒަހަމްވި އެވެ. އޭނާގެ އާއިލާއަށް އެކަން އެނގިގެން ހަމަ އެވަގުތު ޖެހިގެން ހުރި ގެއިން ނިކުމެ، އަވަސް ފަރުވާއަށް ހޮސްޕިޓަލަށް އޭނާ ގެންދަން އެދުމުން ފުލުހުން ދިން ޖަވާބަކީ "ދައްތާ އޭނާ އޯކޭއޭ، ހާސްނުވޭ" އެވެ.

އާއިލާއިން އެމްބިއުލާންސަކަށް ގުޅަން އާދޭސް ކުރަމުން ދަނިކޮށް ފުލުހުން ފުލުހުންގެ ވެހިކަލަށް ލައިގެން އޭނާ ގެންދިޔައީ ރިމާންޑް ސެންޓަރެއް ކަމަށްވާ އަތޮޅުވެއްސަށެވެ. އާއިލާއިން ބުނާ ގޮތުގައި އަޒްމީލް އަތޮޅުވެއްސަށް ގެންދިޔައީ ގާތްގަނޑަކަށް 2:30 ހާއިރު އެވެ. އޭނާގެ ހާލު ސީރިއަސްކަން އެނގި ފުލުހުން އޭނާ އައިޖީއެމްއެޗް ހޮސްޕިޓަލަށް ގެންދިޔައީ މައުލޫމާތު ލިބިފައިފާ ގޮތުގައި ހަވީރު 4:20 ހާއިރު އެވެ. ލިބުނު އަނިޔާތައް ސީރިއަސްކަމުން ވަގުތުން ވަގުތަށް ފުރާނަ ސަލާމަތްކުރަން މަސައްކަތް ފަށަން ޑޮކްޓަރުންނަށް މަޖުބޫރުވި އެވެ.

ފަރުވާ ލިބުން ލަސްވުމާއެކު އަޒްމީލްއަށް ލިބުނު ގެއްލުންތައް ވެސް ބޮޑުވި އެވެ. ހޮސްޕިޓަލުން ކުރި ބުރަ މަސައްކަތުން އަޒްމީލްގެ ފުރާނަ ސަލާމަތް ކުރެވުނެވެ. އެހެން ނަމަވެސް އޭނާއަށް މިހާރުވެސް ފަރުވާ ދެމުން އަންނަނީ ވެންޓިލޭޓަރުގެ އެހީގައި އައިސީޔޫގަ އެވެ. ސިކުނޑިއަށް ލޭއެޅި، ސިކުނޑި ވަނީ ގުޑައިފަ އެވެ. މައިބަދައިގެ ދެ ތަނެއް އޮތީ ބިނދިފަ އެވެ. އައިސީޔޫއަށް ލީ ފަހުން ވެސް އަޒްމީލްގެ ހާލަތަކަށް ހެޔޮ ބަދަލެއް ނާދެ އެވެ.

ފަރުވާ ލަސްވީ ފުލުހުންގެ އިހުމާލުން، ފުރާނަ ސަލާމަތްވީ ކިރިޔާ

ޖަލުގައި ބަންދުކުރާ މީހަކަށް ވިޔަސް ފުލުހުންގެ ބެލުމުގެ ދަށަށް ގެންދާ މީހަކަށް ވިޔަސް އެމީހަކަށް ބޭނުންވާ ބޭސް ފަރުވާ ލިބިދިނުމަކީ ހައްގެކެވެ. އެ ހައްގުން އެއްވެސް މީހަކު މަހުރޫމެއް ނުކުރެވޭނެ އެވެ. އެގޮތުން އަޒްމީލްއަށް ވެސް ބޭނުންވާ ފަރުވާ ވަގުތުން ވަގުތަށް ދިނުމުން މަހުރޫމްކޮށް، އޭނާ ފުލުހަށް ގެންދިޔުމަކީ މުޅި ފުލުހުންގެ މުއައްސަސާއާ މެދު ވެސް ސުވާލު އުފެދޭވަރުގެ ބޮޑު ކަމެކެވެ.

އަޒްމީލް އިމާރާތުގެ މަތިން ވެއްޓުނުކަން އާއިލާއަށް އެނގުނީ އަވަށްޓެރިޔަކު ބުނުމުންނެވެ. އެއާއެކު އާއިލާގެ މީހުން ފަސް ވަރަކަށް މިނެޓު ތެރޭ އެތަނަށް ދިޔައިރު އަޒްމީލް އޮތީ މަރަށް ތެޅި ތެޅި އެވެ. އެއާއެކު އާއިލާއިން އާދޭސްކޮށްފައި ބުނަމުންދިޔައީ އޭނަ ނުނަގައި ފުރަތަމަ ވެސް އެމްބިއުލާންސަކަށް ގުޅުމަށެވެ. ނަމަވެސް ހާޒިރުވެ ތިބި ހަތަރު ފުލުހުންނަށް ވެސް ގަބޫލުކުރެވުނީ އަޒްމީލްގެ ހާލު ރަނގަޅު ކަމަށެވެ. އޭރު އޭނާގެ ބޮލުން ލޭ އައިސް ތެދުވެވޭނެ ހިތްވަރެއް ވެސް ނެތެވެ.

"އަޒްމީލް ވެއްޓިފައި އޮތްއިރު ދިޔައީ ކުކުރަމުން. އެވަރުންވެސް ކިތްޕަތީގައި ހިފާފައި އޭނާ ކޮޅަށް ނަގަން ފުލުހުން މަސައްކަތް ކުރަމުންދިޔައީ. އިންސާނިއްޔަތު ކަމަށްޓަކައި ވެސް އޭނާ ހޮސްޕިޓަލަށް ގެންދަން އާދޭސްކުރިން. އެކަމަކު ފުލުހުން ބުނީ ދައްތާ އޭނާ އޯކޭއޭ. ހާސް ނުވާށޭ. ހޮސްޕިޓަލަށްތޯ ގެންދަނީ ސުވާލު ކުރުމުން ވެސް ބުނި ހޮސްޕިޓަލަށް ކަމަށް ގެންދާނީ،" އަޒްމީލްގެ ބޮޑުދައިތަ ބުންޏެވެ.

އަޒްމީލްގެ ބޮޑުދައިތަ ބުނީ ގޭގެ އަނެއް ކަންމަތީގައި އޮތް ފުލުހުންގެ ވެހިކަލަށް އަޒްމީލް ނަގައިގެން ގެންދަން އުޅުމުން އެކަމާ ދެކޮޅު ހެދި ކަމަށާއި އެއާއެކު ފުލުހުން އޭނާ ވެއްޓިފައި އޮތްތަނަށް ވެހިކަލް ގެނެސް އެރުވީ ކަމަށެވެ.

ފުލުހުން އަޒްމީލް ގެންދިޔަތާ ތިން ގަޑިއިރުވާން އުޅެނިކޮށް ހަވީރު 05:05 ހާއިރު ފުލުހުން އެނބުރި ގެއަށް އައި ކަމަށާއި އަދި ވީހާވެސް އަވަހަށް ހޮސްޕިޓަލަށް ދާން އެދުނު ކަމަށް އާއިލާއިން ބުންޏެވެ.

އެއާއެކު އަޒްމީލްގެ ބޮޑުދައިތަ ހޮސްޕިޓަލަށް ދިޔައިރު، އަޒްމީލްގެ ބޮލުގެ ސާޖަރީއެއް ހަދަން ތައްޔާރުވަނީ އެވެ. އެވަގުތު އާއިލާއަށް އެންގީ ފަރުވާ ލަސްވެފައިވާ ކަމަށާއި މިވަގުތު މަސައްކަތް ކުރަނީ އޭނާގެ ފުރާނަ ސަލާމަތް ކުރުމަށް ކަމަށެވެ. އެގޮތުން އެންމެން ވެސް ދިމާވެދާނެ ކަމަކަށް ތައްޔާރުވެގެން ތިބުމަށް ހޮސްޕިޓަލުން އެންގި ކަމަށް އާއިލާއިން ބުންޏެވެ.

"ސިކުނޑިއަށް ވަރަށް ބޮޑަށް ލޭ އެޅިފައި ހުރި ކަމަށް ޑޮކްޓަރުން ބުނި. މައިބަދައިގެ ދެ ތަނެއް ފްރެކްޗާވި ކަމަށް ބުނި. ކޮންމެ ދުވަހަކު ސީޓީ ހަދާ ދަނީ ޗެކް ކުރަމުން. އޭނާގެ ހާލު އިތުރަށް ރަނގަޅެއް ނުވޭ. ޑޮކްޓަރުން ބުނަނީ ރިކަވަރީއާ މެދު ނުވިސްނައި އަދިވެސް މަސައްކަތް ކުރަނީ ފުރާނަ ސަލާމަތްވޭތޯ ކަމަށް،" އާއިލާން ބުންޏެވެ.

އަޒްމީލް ހޮސްޕިޓަލަށް ގެންދިޔަ ފަހުން އޭނާ އާއިލާއާ ހަވާލުކުރަން ފުލުހުން މަސައްކަތްކުރި ނަމަވެސް، އާއިލާއިން އޭނާއާ ހަވާލުވެފައެއް ނުވެ އެވެ. އެއީ އަޒްމީލްއަށް ފަރުވާ ލިބުން ލަސްވުމުގައި ފުލުހުންގެ އިހުމާލު އޮތް ކަމަށް އާއިލާއިން ދެކޭތީ އެވެ.

އަޒްމީލްއަށް ލިބެން ޖެހޭ އެންމެ އަސާސީ އެއް ކަމަކީ އޭނާއަށް ލިބެން ޖެހޭ ބޭސްފަރުވާ ކަމަށްވާއިރު، އެކަމުން އޭނާ މަހުރޫމްވުމުން އާއިލާއިން ވަނީ އެކަމާ ކަންބޮޑުވުން ފާޅުކޮށްފަ އެވެ. އަދި އެފަދަ ކަމެއް އިތުރު މީހަކަށް ނުވުމަށް އާއިލާއިން އެދެ އެވެ.

ފުލުހުން ބޮޑީ ކެމެރާ ބޭނުމެއް ނުކުރޭ، ތުހުމަތުވާ ފުލުހުން ސަސްޕެންޑެއް ވެސް ނުކުރޭ

ފުލުހުންނަކީ ރައްޔިތުންގެ މެދުގައި އެންމެ ބޮޑަށް އިތުބާރު އޮންނަން ޖެހޭ އެއް މުއައްސަސާ އެވެ. ނަމަވެސް އެ މުއައްސަސާއަށް އޮންނަ އިތުބާރު ރައްޔިތުން ކުރިމަތީގައި އަބަދު ވެސް ގެއްލިގެން ދަނީ އިތުބާރު ދަމަހައްޓަން އެކަށީގެންވާ މަސައްކަތެއް ނުކުރެވޭތީ އެވެ. ފުލުހުންގެ މައްޗަށް ކަމެއްގައި ތުހުމަތު ކުރެވޭނަމަ އެ މައްސަލަ ކަމާބެހޭ އިދާރާތަކަށް ހުށަހެޅުމަށްފަހު، މައްސަލަ ނިމެންދެން މަގާމުން އެކަހެރި ކުރަން ޖެހެ އެވެ.

ފުލުހުންގެ މައްޗަށް ތުހުމަތު ކުރެވޭ މައްސަލަތަކުގައި، ވަކިން ހާއްސަކޮށް ޖިނާއީ މައްސަލަތަކުގައި މަގާމުން އެކަހެރި ކުރުމުން އެ ތުހުމަތު ކުރެވޭ ފުލުހުންނަށް ދެވަނަ ފަހަރަށް އެފަދަ ކަމެއް ތަކުރާރު ކުރަން ފުރުސަތެއް ނުލިބޭނެ އެވެ. ނަމަވެސް އަޒްމީލްގެ ކަންތަކުގައި އިހުމާލުވި ކަމަށް ތުހުމަތުވާ ފުލުހުން މިއަދުވެސް ތިބީ ގައުމީ ހިދުމަތުގަ އެވެ. އެ ފުލުހުން ދެވަނަ ފަހަރަށް ވެސް އެފަދަ ކަމެއް ތަކުރާރު ނުކުރާނެ ކަމުގެ އެއްވެސް ޔަގީންކަމެއް ނެތެވެ.

ފުލުހުންނަށް ރައްޔިތުން ކުރާ އިތުބާރު ދެމެހެއްޓުމަށް ބޮޑީކެމެރާ ތައާރަފްކުރި ނަމަވެސް، އަޒްމީލްގެ މައްސަލައިގައި ވެސް ފުލުހުން ބޮޑީކެމް ބޭނުން ކޮށްފައެއް ނުވެ އެވެ. ބޮޑީކެމް ބޭނުން ކޮށްފައި ނުވަނީ ބަންދުގެ އަމުރު ތަންފީޒު ކުރުމަށްދާ އޮފިސަރުން އެގޮތަށް އަމަލުކުރަން ނޯންނާތީ އެވެ. ނަމަވެސް އެ އުސޫލު ބަދަލުކޮށް، މިހާރު ވަނީ ބަންދު އަމުރު ތަންފީޒުކުރަންދާއިރު ވެސް ބޮޑީކެމް ބޭނުންކުރަން ފަށާފަ އެވެ.

"ކޯޓު އަމަރު ދަށުން ކޯޓަށް ގެންދަން ބަލާދާ މީހުންގެ ޔުނިޓުން މިހާތަނަށް ބޮޑީވޯން ކެމެރާއެއް އަޅުގަނޑުމެން ބޭނުމެއް ނުކުރޭ. ނަމަވެސް އެ ޔުނިޓުން މިހާރު ވަނީ ބޮޑީވޯން ކެމެރާ ބޭނުން ކުރަން ފަށާފައި،" ހޯމް މިނިސްޓަރު އަލީ އިހުސާން ވިދޅާުވި އެވެ.

ފުލުހުންގެ ބެލުމުގެ ދަށުގައި ހުއްޓައި ހާޓް އެޓޭކެއް ޖެހިގެން، 2022 ގައި އަބްދުﷲ ރަޝީދު މަރުވި އިރު ވެސް ފުލުހުން ބޮޑީކެމް ބޭނުން ކޮށްފައި ނުވާތީ އެ ފަހަރު ވެސް ފާޑު ކިޔުން އަމާޒުވި އެވެ. އެ މައްސަލައިގައި ފުލުހުންގެ އިހުމާލު އޮތް ކަމަށް ބުނެ، ނެޝަނަލް އިންޓަގިރިޓީ ކޮމިޝަނުން ފުލުހުންތަކެއްގެ މައްޗަށް ދައުވާ ކުރަން ޕްރޮސެކިއުޓާ ޖެނެރަލް (ޕީޖީ) އަށް ފޮނުވި އެވެ.

އިހުސާން ވިދާޅުވީ މައްސަލައިގައި ފުލުހުންގެ އެއްވެސް އިހުމާލެއް އޮތްކަން އެއްވެސް ތަހުގީގަކަށް ފާހަގަވެއްޖެނަމަ، އެ ފުލުހަކު ވަޒީފާއިން އެކަހިކޮށް އަޅަން ޖެހޭ ފިޔަވަޅުތައް އަޅާނެ ކަމަށެވެ. ނަމަވެސް ކުރެވޭ ތުހުމަތެއްގެ މައްޗަށް ތަހުގީގަކާ ނުލައި ފިޔަވަޅު ނޭޅޭނެ ކަމަށް އޭނާ ވިދާޅުވި އެވެ.

"ރިގާޑްލެސް އަސްލު ޕޮލިހުންގެ ބެލުމުގެ ދަށަށް ގެންނަ މީހަކަށް އެއްވެސް ވަރެއްގެ އަނިޔާއެއް ވެއްޖެއްޔާ އިމީޑިއެޓްލީ އެމީހަކު ހޮސްޕިޓަލަށް ގެންދިޔުން އެއީ އަޅުގަނޑަށް ގަބޫލުކުރެވޭ މިންގަނޑަކީ. އަދި އަޅުގަނޑުމެން ކުރިއަށް އޮތްތާގައި ރިވައިސްކޮށްފައި އެ ސްޓޭންޑާޑު އަޅުގަނޑުމެން މެއިންޓެއިން ވެސް ކުރާނީ،" އިހުސާން ވިދާޅުވި އެވެ.

އެޗްއާރްސީއެމްއިން މައްސަލައާ ގުޅިގެން ކަންބޮޑުވުން ފާޅެއް ނުކުރޭ

ހިއުމަން ރައިޓްސް ކޮމިޝަން (އެޗްއާރްސީއެމް) އަކީ ރާއްޖޭޣައި ހިނގާ ލާއިންސާނީ އަމަލުތަކަށް ފާރަވެރިވެ، ފިޔަވަޅު އެޅުމުގެ ޒިންމާ ކޮނޑުއަޅައިގެން އޮތް ކޮމިޝަނެވެ. އެ ކޮމިޝަނުން މީހަކަށް ލާއިންސާނީ އަނިޔާއެއް ދީފިނަމަ، ނުވަތަ ނުހައްގުން ކަމެއް ކޮށްފިނަމަ ކަންބޮޑުވުން ފާޅުކުރަން ޖެހެ އެވެ.

އަޒްމީލްގެ ކަންތަކުގައި އެޗްއާރްސީއެމްއިން މިހައިތަނަށް އެއްވެސް ކަންބޮޑުވުމެއް ފާޅުކޮށްފައެއް ނުވެ އެވެ. ނަމަވެސް ހަމަ އެ ހަފްތާގައި އައްޑޫ ޕޮލިސް ކޮލެޖުގައި ތިބި ފުލުހުން ކާނާ ވިހަވެގެން ހޮސްޕިޓަލަށް ގެންދިޔުމުން، އެކަމާ ކަންބޮޑުވުން ފާޅުކުރި އެވެ. އެހެންކަމުން އެޗްއާރްސީއެމްއިން ފުލުހުން އިހުމާލުވާ ކަންކަމުގައި އަޑު އުފުލަން ފަސް ޖެހޭ ކަމަށް ވެސް ބެލުމުގެ ފުރުސަތު އެބަ އޮތެވެ.

މަސްތުވާތަކެއްޗާ ދެކޮޅަށް މަސައްކަތް ކުރުމުގައި 16 އަހަރު ހޭދަކޮށްފައިވާ އަލީ އަދީބު "އަދަދު" އަށް ވިދާޅުވީ މިފަދަ އާންމުންގެ ކަންބޮޑުވުން ހުރި މައްސަލަތަކުގައި އެޗްއާރްސީއެމް ކަހަލަ ކޮމިޝަންތަކުން ބަސް ބުނަން ޖެހޭ ކަމަށާއި އެއީ އެ ކޮމިޝަންތަކަށް އާންމުން ކުރާ އިތުބާރު ވެސް ބޮޑުވެގެންދާނެ ކަމެއް ކަމަށެވެ.

"އެޗްއާރްސީއެމްއަކީ ރައްޔިތުންގެ އިތުބާރު ވަރަށް ބޮޑަށް އޮންނަން ޖެހޭ ތަނެއް. މިފަދަ މައްސަލަތަކުގައި ވަކިން ހާއްސަކޮށް މަސްތުވާތަކެތީގެ ފަރުވާ ބޭނުންވާ ވަރާތެއްގެ ކަމެއްގައި އެޗްއާރްސީއެމްއިން ބަސް ބުނަން ޖެހޭ،" އަދީބު ވިދާޅުވި އެވެ.

އެޗްއާރްސީއެމްގެ ސީނިއާ މީޑިއާ އޮފިސަރު އަލީ ޒާޖިލް ޝަހީދު "އަދަދު" އަށް ވިދާޅުވީ ފުލުހުންގެ ފަރާތުން އެ މައްސަލަ އެ ކޮމިޝަންގެ ސަމާލުކަމަށް ގެނައުމާއެކު، މައްސަލަ އެންޓި ޓޯޗާ ގާނޫނުގެ ދަށުން ބަލަމުން އަންނަ ކަމަށާއި ތަހުގީގު ނިމުމުން ފާހަގަވާ ކަންތައްތައް ކަމާ ގުޅުންހުރި އިދާރާތަކުގެ ސަމާލުކަމަށް ގެންނާނެ ކަމަށެވެ.

އެންޓި ޓޯޗާގެ ގާނޫނު ބުނާގޮތުން ޓޯޗާގެ އަމަލެއް ކޯޓުގައި ސާބިތުވެއްޖެނަމަ، އެކަމުގެ ޒިންމާ އުފުލަން ޖެހޭ މީހާ ނުވަތަ ބަޔަކު އެ ހުކުމަށް ބިނާކޮށް، އަނިޔާ ލިބުނު މީހާއަށް ގާނޫނުގައިވާ ގޮތުގެ މަތިން ބަދަލު ލިބިދިނުމުގެ ހައްގު ލިބިގެންވެ އެވެ.

އެގޮތުން، މި މައްސަލައިގައި އަޒްމީލްގެ ފަރުވާ ލަސްކޮށް، ފުލުހުން އިހުމާލުވިކަން ސާބިތުވެއްޖެނަމަ، ލިބުނު ގެއްލުމަށް އަޒްމީލްގެ ފަރާތުން ކޯޓަށް ހުށަހަޅައިގެން ބަދަލު ހޯދުމުގެ ފުރުސަތު ލިބޭނެ އެވެ. އަދި އެޗްއާރްސީއެމްއަށް ބަދަލު ހޯދައި ދިނުމަށް އެދި ވެސް ދައުވާ ކުރެވެ އެވެ.

މީގެކުރިން އެންޓި ޓޯޗާގެ ގާނޫނުގެ ދަށުން އެއްވެސް އިދާރާއެއް ނުވަތަ މީހެއް އަތުން ބަދަލު ހޯދިފައެއް ނުވެ އެވެ.