ސޯޝަލް މީޑިއާ އެޕްލިކޭޝަން ޓިކްޓޮކްގައި ކުރިއަށްދިޔަ ލައިވް ސްޓްރީމަކާ ގުޅިގެން މާލޭގެ ގެއަކަށް ވަދެ ބަޔަކު ހަމަނުޖެހުން ހިންގައިފި އެވެ.

ފުލުހުން މިއަދު ބުނީ މާފަންނު ގެއަކަށް ވަދެ ބަޔަކު ހަމަނުޖެހުން ހިންގީ ޓިކްޓޮކް ލައިވް އެއްގައި ކުރި ޒުވާބަކާ ގުޅިގެން ކަމަށެވެ. އަދި މި މައްސަލާގައި ދެމީހަކު ފުލުހުންގެ ބެލުމުގެ ދަށަށް ގެންދިޔަ ކަމަށްވެސް ފުލުހުން ބުންޏެވެ.

އެ ދެ މީހުން މިހާރު ދޫކޮށްލާފައިވާއިރު އެ މީހުންނާ ގުޅޭ އެއްވެސް ތަފުސީލެއް ފުލުހުން ހާމަކޮށްފައެއް ނުވެ އެވެ. އަދި ހަމަނުޖެހުމުގައި ތަނަކަށް ނުވަތަ މީހަކަށް ގެއްލުންވި ކަމަކަށް ފުލުހުން ނުބުނެ އެވެ.

ޓިކްޓޮކް އަކީ ހުރިހާ އުމުރެއްގެ ދިވެހިން ބޭނުންކުރާ ސޯޝަލް މީޑިއާ ޕްލެޓްފޯ މެއް ކަމަށް ވާއިރު، އެ ޕްލެޓްފޯމުގައި ހިނގާ ކަންކަމާ ގުޅިގެން މީގެ ކުރިންވެސް ހަމަނުޖެހުންތަކެއް ހިނގާފައި އެބަހުއްޓެވެ. އެގޮތުން މިދިޔަ އަހަރުގެ ތެރޭ ޓިކްޓޮކުގައި މަޝްހޫރު ދެ ދިވެއްސެއްގެ މެދުގައި މާރާމާރީއެއްވެސް ހިނގި އެވެ.

މީގެއިތުރުން އެ ޕްލެޓްފޯމުގައި އަންހެން ހެދުން އަޅައިގެން ވީޑިއޯ ކުޅެ ޕޯސްޓުކުރި ދިވެހި ފިރިހެނަކުވެސް ތަކުރާރުކޮށް ފުލުހުން ހައްޔަރުކޮށްފައިވެ އެވެ.