ފުލުހުންގެ ބެލުމުގެ ދަށުން ޑްރަގު ކޯޓަށް ގެންދަން އުޅުނު މީހަކު އިމާރާތެއްގެ އެއްވަނަ ފަންގިފިލާއިން ވެއްޓި އަނިޔާވި މައްސަލަ ހިއުމަން ރައިޓްސް ކޮމިޝަން (އެޗްއާރްސީއެމް) އިން ބަލަމުންދަނީ އެންޓި ޓޯޗާ ގާނޫނުގެ ދަށުން ކަމަށް އެ ކޮމިޝަނުން ބުނެފި އެވެ.

އެންޓި ޓޯޗާގެ ގާނޫނުގެ ދަށުން ކުށެއް ސާބިތުވެއްޖެނަމަ އެއީ ޖިނާއީ ކުށެކެވެ. އެ ގާނޫނުގެ ދަށުން ދައުވާ ކުރުމާއި ބަދަލު ހޯދުމުގެ ފުރުސަތު ލިބެ އެވެ. އަދި އެ ގާނޫނުގެ ދަށުން ގިނަ ހައްގުތަކެއް އަނިޔާ ލިބޭ ފަރާތްތަކަށް ލިބެ އެވެ.

ޖުލައި، 15 ގައި އިމާރާތުގެ މަތިން ވެއްޓި އަނިޔާވީ އަޒްމީލް ޖަލީލު، 38 އެވެ. އެ ހާދިސާ އެ ދުވަހު ހިނގީ މެންދުރު 2:15 ހާއިރެވެ. ނަމަވެސް އޭނާއަށް ފަރުވާ ދިނުމަށް ހޮސްޕިޓަލަށް ގެންދިޔައީ އެ ދުވަހު ހަވީރު 4:20 ހާއިރެވެ.

އަޒްމީލްގެ އާއިލާއިން ބުނީ އެ ހާދިސާގައި އަޒްމީލްގެ ބޯ ފަޅައިގެން ގޮސް ސިކުނޑިއަށް ލޭ އެޅުމުގެ އިތުރުން، މައިބަދައިން ދެ ތަނެއް ފްރެކްޗާވެފައިވާ ކަމަށާއި ހާލު ސީރިއަސް ކަމުން މި ވަގުތު އޮތީ ވެންޓިލޭޓަރުގައި ކަމަށެވެ.

އެޗްއާރްސީއެމްގެ ސީނިއާ މީޑިއާ އޮފިސަރު އަލީ ޒާޖިލް ޝަހީދު "އަދަދު" އަށް ވިދާޅުވީ ފުލުހުންގެ ފަރާތުން އެ މައްސަލަ އެ ކޮމިޝަންގެ ސަމާލުކަމަށް ގެނައުމާއެކު، މައްސަލަ އެންޓި ޓޯޗާ ގާނޫނުގެ ދަށުން ތަހުގީގު ކުރަމުންދާ ކަމަށެވެ.

"މި މައްސަލަ އާއިލާގެ ފަރާތުން ކޮމިޝަނަށް ހުށަހަޅާފައި ނުވި ނަމަވެސް، މި މައްސަލައިގެ ތަހުގީގަށް އާއިލާއާ ވާހަކަ ދައްކާފައިވާނެ،" އޭނާ ވިދާޅުވި އެވެ.

މައްސަލައިގެ ތަހުގީގު ވީހާވެސް އަވަހަށް ނިންމުމަށް ކޮމިޝަނުން މަސައްކަތް ކުރަމުން އަންނަކަން ފާހަގަކުރައްވާ ޒާޖިލް ވިދާޅުވީ ތަހުގީގު ނިމުމުން ފާހަގަވާ ކަންތައްތައް ކަމާ ގުޅުންހުރި އިދާރާތަކުގެ ސަމާލުކަމަށް ގެންނާނެ ކަމަށެވެ.

އެންޓި ޓޯޗާގެ ގާނޫނު ބުނާގޮތުން ޓޯޗާގެ އަމަލެއް ކޯޓުގައި ސާބިތުވެއްޖެނަމަ، އެކަމުގެ ޒިންމާ އުފުލަން ޖެހޭ މީހާ ނުވަތަ ބަޔަކު އެ ހުކުމަށް ބިނާކޮށް، އަނިޔާ ލިބުނު މީހާއަށް ގާނޫނުގައިވާ ގޮތުގެ މަތިން ބަދަލު ލިބިދިނުމުގެ ހައްގު ލިބިގެންވެ އެވެ.

އެގޮތުން، މި މައްސަލައިގައި އަޒްމީލްގެ ފަރުވާ ލަސްކޮށް، ފުލުހުން އިހުމާލުވިކަން ސާބިތުވެއްޖެނަމަ، ލިބުނު ގެއްލުމަށް އަޒްމީލްގެ ފަރާތުން ކޯޓަށް ހުށަހަޅައިގެން ބަދަލު ހޯދުމުގެ ފުރުސަތު ލިބޭނެ އެވެ. އަދި އެޗްއާރްސީއެމްއަށް ބަދަލު ހޯދައި ދިނުމަށް އެދި ވެސް ދައުވާ ކުރެވެ އެވެ.