ރޭ ދަންވަރު ކަރަންޓު ކެނޑުނު ގޮތަށް އަދިވެސް އެހިދުމަތް ނުލިބި، މ.މުލީ ރައްޔިތުން މިރޭ ވެސް ކަނު އަނދިރީގައި ހޭދަކުރަން ޖެހިއްޖެ އެވެ.

މުލީގައި ކަރަންޓު ކެނޑުނީ އިއްޔެ ހެނދުނުގެ ވަގުތެއްގަ އެވެ. ނަމަވެސް ދެ ދުވަސް ކުރިން ފެށިގެން މައްސަލަ ދިމާވާތީވެ، ކަރަންޓު ދެމުންދިޔައީ ބައެއް ވަގުތުތަކު އެވެ.

މުލިން މިރޭ "އަދަދު"އާ ވާހަކަ ދެއްކި މީހުން ބުނި ގޮތުގައި އެއްގޮތަކަށް ވެސް ކަރަންޓް ނުލިބި އެރަށު ރައްޔިތުން މިރޭ ތިބީ ވަރަށް ބޮޑު ހާސްކަމެއްގަ އެވެ. ސައްވީސްގަޑިއިރު ކަރަންޓް ލިބެން ފެށި ފަހުން އެއްގޮތަކަށް ވެސް ކަރަންޓް ނުލިބި މިހާ ގިނަ ވަގުތު ހޭދަކުރާ މިއީ ފުރަތަމަ ފަހަރު ކަމަށް ވެސް އެމީހުން ބުންޏެވެ.

މުލީ ރައްޔިތުންނަށް ކަރަންޓްގެ ހިދުމަތް ލިބުން ލަސްވާތީ ހިއުމަން ރައިޓްސް ކޮމިޝަން އޮފް ދަ މޯލްޑިވްސް އިން މިއަދު ކަންބޮޑުވުން ފާޅުކުރި އެވެ.

ސޯޝަލް މީޑިއާ އެކްސްގައި އެ ކޮމިޝަނުން ކުރި ޕޯސްޓެއްގައި ބުނީ ކަރަންޓުގެ ހިދުމަތްފަދަ އަސާސީ ހައްޤެއް ދިގު މުއްދަތަކަށް ރައްޔިތުންނަށް ނުލިބި މެދުކެނޑިފައިވުމަކީ އެކަމުގެ ސަބަބުން އެހެނިހެން އަސާސީ ހައްގުތަކަށްވެސް އެކަމުގެ އަސަރު ކުރާނެކަމެއްކަމުގައިވާތީ އެކަމާ ކަންބޮޑުވާ ކަމަށެވެ.

"މި މައްސަލައަށް އަވަސް ހައްލެއް ހޯއްދަވައިދެއްވުމަށް ކަމާގުޅުންހުރި އެންމެހާ އިދާރާތަކަށް ގޮވައިލަން. އަދި މި މައްސަލައަށް ހައްލެއް ލިބުމާއިހަމައަށް މިކަން ކޮމިޝަނުން ވަރަށް ގާތުން މޮނީޓަރ ކުރަމުންދާނެ ކަމުގައި ދަންނަވަން،" އެޗްއާރްސީއެމްގެ ޕޯސްޓްގައި ބުންޏެވެ.

މުލިން ކަރަންޓުގެ ހިދުމަތް މެދުކެނޑިފައިވާ މައްސަލަ ކޮމިޝަނުގެ ސަމާލުކަމަށް އައުމާއި ގުޅިގެން އެކަން މޮނީޓަރކުރަމުން އަންނަ ކަމަށާއި އިދާރާތަކާއިއެކު މަޝްވަރާކޮށް އަވަސްހައްލެއް ލިބޭތޯބަލަމުން އަންނަ ކަމަށް ވެސް އެކޮމިޝަނުން ބުންޏެވެ.

މ. އަތޮޅުގެ ވެރިރަށް، މުލީގައި ކަރަންޓު ކެނޑިފައި އޮތުމުގެ ސަބަބުން ރަށުގައި ހުރި ސަރުކާރު އޮފީސްތަކާއި ސްކޫލްގެ ކިޔެވުން ވެސް މިއަދު ބަންދުކުރި އެވެ.

"ކަރަންޓު ނެތި އޮފީސްތައް ނުހިންގޭނެ. ސްކޫލުގައި ކިޔެވުން ވެސް ބަންދުކުރީ އެހެންވެ. އަދި ކަރަންޓު ނެތުމުން އާންމު ވިޔަފާރިތަކަށް ވެސް ގެއްލުންތައް އެބަ ލިބޭ. އައިސްކޮށްފައި ބަހައްޓަންޖެހޭ ތަކެތި ހަލާކު ވަމުން އެބަދޭ،" ކައުންސިލްގެ ރައީސް ޝަމްއޫން ރަމީޒު ވިދާޅުވި އެވެ.

މުލީގައި ކަރަންޓު ދިޔައީ ރޭ ދަންވަރު އެވެ. ނަމަވެސް ދެ ދުވަސް ކުރިން ފެށިގެން މައްސަލަ ދިމާވާތީވެ، ކަރަންޓު ދެމުންދިޔައީ ބައެއް ވަގުތުތަކު އެވެ.

"އަސްލު މައްސަލައަކީ ލޯޑު ބޮޑުވުމާއި، [ޖަނަރޭޓަރުތައް] މަރާމާތު ނުކުރުން،" ޝަމްއޫން ވިދާޅުވި އެވެ.

އެ ރަށަށް ކަރަންޓުގެ ހިދުމަތް ދެނީ ފެނަކަ ކޯޕަރޭޝަނުންނެވެ.

އެ ކޯޕަރޭޝަންގެ މެނޭޖިން ޑިރެކްޓަރު މުއާޒު މުހައްމަދު ރަޝީދު "އަދަދު" އަށް ވިދާޅުވީ ކަރަންޓު ދިޔައީ ޖަނަރޭޓަރު ސެޓަކަށް ދިމާވި މައްސަލައެއްގެ ސަބަބުން ކަމަށެވެ. އެ ރަށަށް ގެންގޮސްފައި ހުރި އާ ޖެންސެޓު ގުޅުމުގެ މަސައްކަތްކޮށް، މިއަދު މުޅި ރަށަށް އަލުން ކަރަންޓު ދެވޭނެ އޭނާ ވިދާޅުވި އެވެ.

މުލިން ވާހަކަ ދެއްކި މީހަކު ބުނީ ބައެއް ފިހާރަތައް ހުރީ ބަންދުކޮށްފައި ކަމަށާއި، އަދި ހޫނުގަދަވެގެން ރޭ ބައެއް މީހުން ނިދީ މަގުމަތީގައި ކަމަށެވެ.

"ބައެއް ފިހާރަތަކުގެ ވެރިން ތިބީ ވެސް ފިހާރަތަކުގެ ދޮރުމަތީގައި ގޮދަޑި އަޅައިގެން ނިދަން،"

މުލީގެ އާބާދީއަކީ 1014 އެވެ. އެއީ 520 ފިރިހެނުންނާއި 492 އަންހެނުންނެވެ. އަތޮޅު ހޮސްޕިޓަލް އެ ރަށުގައި ހިންގަމުން އަންނައިރު، މިހާރު ވަނީ އެއާޕޯޓެއް ވެސް ތަރައްގީކޮށް، ރަށުގެ އިގުތިސޯދު ފުޅާކޮށްފަ އެވެ.