މެޑްރިޑް (ޖުލައި 18) - ރެއާލް މެޑްރިޑަށް ކުޅެމުންދާ ކްރޮއޭޝިއާގެ މިޑްފީލްޑަރު ލޫކަ މޮޑްރިޗްގެ ކޮންޓުރެކްޓް އެ ކްލަބުން އިތުރު އަހަރަކަށް އާކޮށްފިއެވެ.

މޮޑްރިޗް ،38، ޓޮޓެންހަމް ހޮޓްސްޕާ ދޫކޮށް ރެއާލަށް ބަދަލުވީ 2012 ވަނަ އަހަރެވެ. އޭގެ ފަހުން އެ ކްލަބުގައި އޭނާ މިހާތަނަށް ހޭދަކުރި މުއްދަތުގައި ޖުމްލަ 26 ތަށި ވަނީ ހޯދައިފައެވެ. އޭގެ ތެރޭގައި ހަ ފަހަރު ޗެމްޕިއަންސް ލީގު ކާމިޔާބުކުރުމާއި ސްޕެނިޝް ލީގު ހަތަރު ތަށި ހިމެނެއެވެ.

ރެއާލްއާއެކު މޮޑްރިޗް ކުރިން ހަދާފައިވާ ކޮންޓުރެކްޓް ވަނީ ޖޫންގެ ނިޔަލަށް ހަމަވެފައެވެ. އެހެން ނަމަވެސް ކޮންޓުރެކްޓް އާކުރުމާއެކު، ރެއާލްގައި 13 ވަނަ ސީޒަނެއް ހޭދަކުރުމުގެ ފުރުސަތު މޮޑްރިޗަށް ވަނީ ލިބިފައެވެ.

ބެލޮންޑޯ އެވޯޑް 2018 ވަނަ އަހަރު ހޯދި މޮޑްރިޗް ވަނީ ރެއާލަށް ޖުމްލަ 534 މެޗު ކުޅެ، 39 ލަނޑު ޖަހައިފައެވެ.

އެހެން ނަމަވެސް މިދިޔަ ސީޒަންގައި މޮޑްރިޗް ކުޅުނު 46 މެޗުގެ ތެރެއިން ރެއާލްގެ ފުރަތަމަ 11ގައި ކުޅުނީ 23 މެޗުގައެވެ.

ރެއާލްގެ މެދުތެރޭގައި މޮޑްރިޗާޢެކު ގިނަ އަހަރުތަކެއް ވަންދެން ކުޅުނު ޖަރުމަންގެ މިޑްފީލްޑަރު ޓޯނީ ކްރޫސް ވަނީ ރިޓަޔާކޮށްފައެވެ.

ރެޢާލް އިން ދަނީ އަންނަ ސީޒަނަށް ސްކޮޑް ވަރުގަދަކުރަމުންނެވެ. އެގޮތުން ފްރާންސްގެ ތަރި ކިލިއަން އެމްބާޕޭ ވަނީ އެ ޓީމަށް ގުޅިފައެވެ. އަދި އަރަމުން އަންނަ ބްރެޒިލްގެ ޒުވާން ތަރި އެންޑްރިކްވެސް އަންނަ ސީޒަންގައި ފެންނާނީ ރެއާލް އިންނެވެ.