ލަންޑަން (ޖުލައި 16) - އިންގްލެންޑްގެ ގައުމީ ޓީމުގެ ކޯޗުގެ މަގާމުގައި އަށް އަހަރު ހޭދަކުރުމަށްފަހު، ގަރެތު ސައުތުގޭޓް އެ މަގާމުން ވަކިވެއްޖެއެވެ.

ސައުތުގޭޓް މަގާމުން މި ވަކިވީ މި އަހަރުގެ ޔޫރޯގެ ފައިނަލްގައި އާދިއްތަ ދުވަހު ރޭ ސްޕެއިން އަތުން އިންގްލެންޑް ބަލިވެ، ކުރިމަތިވި ނާކާމިޔާބާ އެކު އެވެ. މިއީ، އިންގްލެންޑް ޔޫރޯގެ ފައިނަލްގައި ޖެހިޖެހިގެން ބަލިވި ދެ ވަަނަ ފަހަރެވެ.

ސައުތުގޭޓް ،53، އިންގްލެންޑްގެ ގައުމީ ޓީމުގެ އަށް އަހަރު ހޭދަކޮށްފައިވާއިރު، އޭނާ ވަނީ ބައިނަލްއަޤްވާމީ ހަތަރު މުބާރާތުގައި އެ ޓީމަށް އިރުޝާދު ދީފައެވެ. ޖުމްލަ 102 މެޗުގައި އޭނާ ވަނީ އިންގްލެންޑަށް އިރުޝާދު ދީފައެވެ.

"ފަހުރުވެރި އިނގިރޭސިއެއްގެ ހައިސިއްޔަތުން އަހަރެން ބުނާނީ ހަޔާތުގައި ލިބުނު އެންމެ ބޮޑު ޝަރަފަކީ އިންގްލެންޑަށް ކުޅެ، އެ ޓީމަށް ކޯޗުކޮށްދިނުން،" ސައުތުގޭޓް ބުންޏެވެ.

"އަހަންނަށް ކުރެވެން އޮތް ހުރިހާ މަސައްކަތެއް (އިންގްލެންޑްގެ ޓީމުގައި) ކުރިން. އެކަމަކު މިހާރު މިއީ ބަދަލެއް ބޭނުންވާ ވަގުތު."

އިންގްލެންޑްގެ 21 އަހަރުން ދަށުގެ ޓީމުގެ ކޯޗަކަށް މަސައްކަތްކުރުމަށް ފަހު، ސީނިއާ ޓީމުގެ ކޯޗުކަމާ ސައުތުގޭޓް ހަވާލުވީ 2016 ވަނަ އަހަރެވެ. އޭނާގެ އިރުޝާދުގެ ދަށުން 2018 ވަނަ އަހަރުގެ ވޯލްޑް ކަޕްގެ ސެމީ ފައިނަލަށް އިންގްލެންޑް ދަތުރުކުރިއެވެ.

އޭގެ ފަހުން، 2020 ވަނަ އަހަރުގެ ޔޫރޯގެ ފައިނަލަށް އާއި 2022 ވަނަ އަހަރުގެ ވޯލްޑް ކަޕްގެ ކުއާޓާ ފައިނަލް ސައުތުގޭޓްގެ އިރުޝާދުގެ ދަށުން އިންގްލެންޑް ކުޅުނެވެ.

އިނގިރޭސި އެފްއޭ އާ އެކު ސައުތުގޭޓް ހަދާފައިވާ ކޮންޓުރެކްޓް ހަމަވާނީ މި އަހަރުގެ ނިޔަލަށެވެ. އެކަމަކު ޔޫރޯގެ ޗެމްޕިއަންކަން ނުލިބިއްޖެނަމަ، މަގާމުގައި ނުހުންނާނެ ކަމަށް އޭނާ ވަނީ ކުރިން ވެސް ބުނެފަ އެވެ.