ޕްރޮސެކިއުޓާ ޖެނެރަލް (ޕީޖީ) ހުސެއިން ޝަމީމަށް ހަމަލާ ދިންތާ ހަ މަހަށް ވުރެ ގިނަ ދުވަސްވީއިރު އެ މައްސަލައިގެ ތަހުގީގު އަދިވެސް ނުނިމޭ ކަމަށް ތަހުގީގުގައި ބައިވެރިވާ އިދާރާތަކުން ބުނެފި އެވެ.

މިދިޔަ ޖެނުއަރީ 31، ގައި ޝަމީމަށް ހަމަލާ ދީފައި ވަނީ ސައިކަލު ޕާކޮށްފައި ގެެއަށް ވަދެވަޑައިގަންނަވަނިކޮށްނެވެ. ހަމަލާ އެރީ ޝަމީމްގެ ވައަތުގެ މުލައްދަނޑިއަށެވެ. މަރުތޭލައިން ޖެހުމުގެ ސަބަބުން ޝަމީމްގެ ވައަތު މުލައްދަނޑީގެ ކަށިގަނޑެއްގައި ރެނދެއްލާފައި ވާތީ އެ އަތުގައި އޭޑީކޭ ހޮސްޕިޓަލުން ޕްލާސްޓަރު އަޅައި، ފަރުވާ ދިނެވެ.

އެ މައްސަލާގައި މިހާތަނަށް ހަތް މީހަކު ހައްޔަރުކޮށް ޝަރީއަތް ނިމެންދެން ވަނީ ބަންދުކޮށްފަ އެވެ.

މައްސަލައިގެ އެންމެ ފަހުގެ މައުލޫމާތަށް އެދުމުން ފުލުހުންނާއި ޕްރޮސެކިއުޓަ ޖެނެރަލް އޮފީހުން ވެސް ބުނީ ދައުވާތަކެއް ކޯޓަށް ހުށަހެޅޭ ވަރަށް މައްސަލައިގެ ތަހުގީގު އަދިވެސް ނުނިމޭ ކަމަށެވެ.

ޝަމީމަށް ހަމަލާ ދިނުމުގައި އަމަލީ ގޮތުން ބައިވެރިވީ ދެ މީހެކެވެ. އެއީ މާލޭގެ ގޭންގަކަށް ނިސްބަތްވާ ދެ މީހެއް ކަން އެނގިފައިވެ އެވެ. ޝަމީމަށް ދިން ހަމަލާގެ މައްސަލައަކީ، އޭނާ އަވަހާރަކޮށްލަން އުޅުމުގެ މައްސަލައެއް ގޮތަށް ބަލައި އެ ގޮތަށް ތަހުގީގު ބައްޓަންކޮށްފައިވާ ކަން ޕީޖީ އޮފީހުން ބުނީ މިދިޔަ މާޗު މަހު 26، ގަ އެވެ.