ބާލިން (ޖުލައި 16) - މި އަހަރުގެ ޔޫރޯގެ މޮޅު ކުޅުންތެރިޔާގެ މަގާމު ލިބުނީ ސްޕެއިންގެ މިޑްފީލްޑަރު ރޮޑްރީއަށެވެ.

ޔޫރޯގެ ފައިނަލްގައި ރޭ އިންގްލެންޑް އަތުން 2-1 އިން މޮޅުވެ، ސްޕެއިން އިން ހަތަރު ވަނަ ފަހަރަށް މުބާރާތުގެ ތަށި ހޯދިއިރު، އެ ކާމިޔާބީގައި އެންމެ މުހިންމު ރޯލެއް އަދާކުރީ ރޮޑްރީ އެވެ.

ފައިނަލް މެޗުގެ ދެވަނަ ހާފުގައި އަނިޔާގެ ސަބަބުން ރޮޑްރީ އަށް ނުކުޅެވުނަސް، މުޅި މުބާރާތަށް ބަލާއިރު ރޮޑްރީ ވަނީ ތަފާތު ކުޅުމެއް ދައްކައިފަ އެވެ.

މެންޗެސްޓާ ސިޓީ އަށް ކުޅެމުންދާ ރޮޑްރީ އަށް ތައުރީފްކުރަމުން ސްޕެއިންގެ ކޯޗު ލުއިސް ޑެ ލަ ފުއެންޓޭ ބުނީ ރޮޑްރީ އަށް މި އަހަރުގެ ބެލޮންޑިއޯ ހައްގުވާ ކަމަށެވެ.

"ރޮޑްރީ އަށް ބެލޮންޑިއޯ ލިބެންޖެހޭނީ. މިހާރު އޭނާއަކީ ދުނިޔޭގެ އެންމެ މޮޅު ކުޅުންތެރިޔާ،" ޑެ ލަ ފުއެންޓޭ ބުންޏެވެ.

ބެލޮންޑިއޯ އާ ގުޅޭގޮތުން ރޮޑްރީ ބުނީ ސްޕެއިންގެ ކުޅުންތެރިއަކަށް ބެލޮންޑިއޯ ހައްގުވާ ކަމަށެވެ.

"ސްޕެއިންގެ ފުޓްބޯޅަ އަށް ބެލޮންޑިއޯ އެވޯޑެއް ހައްގު. އަހަންނަށް ހެޔޮ ކޮންމެ ކުޅުންތެރިއަކަށް ވިޔަސް، އެ އެވޯޑް ސްޕެއިން ފުޓްބޯޅައަށް ހައްގު،" ރޮޑްރީ ބުންޏެވެ.

"އަމިއްލަ ގޮތުން ބުނަންޏާ އަހަންނަށް ކުރެވުނު މަސައްކަތާއި ލިބުނު ތައުރީފާ މެދު ފަހުރުވެރިވޭ. އެކަމަކު (މޮޅު ކުޅުންތެރިޔާތޯ ނުވަތަ ނޫންތޯ) ނިންމާނީ އެހެން މީހުން."

ރޮޑްރީ ވަނީ މެންޗެސްޓާ ސިޓީއާ އެކު މިދިޔަ ސީޒަންގައި އިނގިރޭސި ޕްރިމިއާ ލީގުގެ ޗެމްޕިއަންކަން ވެސް ހޯދައިފަ އެވެ.