އެންޓި ކޮރަޕްޝަން ކޮމިޝަން (އޭސީސީ) އާއެކު، ކުރީގެ ރައީސް އަބްދުﷲ ޔާމީން ސޮއިކުރެއްވި އެކްސްކްރޯ އެއްބަސްވުމުގައި ބޭންކް އޮފް މޯލްޑިވްސް (ބީއެމްއެލް) އަށް އެކްސްކްރޯ އެޖެންޓެއްގެ ދައުރު ދީފައި ނެތް ކަމަށް ގައުމީ ބޭންކުގެ ވަކީލުން ހައި ކޯޓުގެ ޝަރީއަތުގައި މިއަދު ވިދާޅުވެއްޖެ އެވެ.

އެކްސްކްރޯ އެއްބަސްވުމުގެ މުއްދަތު ހަމަވި ފަހުން އެމަނިކުފާނުގެ އެކައުންޓަށް އެއް މިލިއަން ޑޮލަރު ޖަމާނުކޮށްދީ ހިފެހެއްޓި މައްސަލާގައި، ބީއެމްއެލާއި އޭސީސީއަށް ޔާމީނުގެ ފަރާތުން ދައުވާކޮށް ސިވިލް ކޯޓަށް މައްސަލަ ހުށަހަޅާފައިވެ އެވެ. ބީއެމްއެލް ވެސް ޝާމިލުވާ ގޮތަށް މައްސަލަ ބެލުމަށް ސިވިލް ކޯޓުން ނިންމުމުން ބޭންކުން އެ ނިންމުން ހައި ކޯޓުގައި އިސްތިއުނާފުކުރީ އެވެ.

ހައި ކޯޓުގައި މިއަދު ބޭއްވި އަޑުއެހުމުގައި ބީއެމްއެލްގެ ވަކީލު ވިދާޅުވީ ޔާމީނާއި އޭސީސީއާ ދެމެދު ހިންގި މުއާމަލާތާއި އެއްބަސްވުމުގައި "އެކްސްކްރޯ" ގެ ލަފުޒު ބޭނުންކޮށްފައި އޮތް ނަމަވެސް އެ މުއާމަލާތް ހިންގީ އެކްސްކްރޯގެ މުއާމަލާތްތައް ހިންގާ ގޮތަކަށް ނޫން ކަމަށެވެ.

އެފަދަ މުއާމާލާތްތަކުގައި ދެ ފަރާތުގެ ފައިސާގެ ކަންކަން ބަލަހައްޓަން "އެކްސްކްރޯ އެޖެންޓް" އަކަށް ހަވާލުކުރާ ކަން ބީއެމްއެލުން ވެސް ގަބޫލު ކުރާ ކަމަށް އެ ބޭންކުގެ ވަކީލު ވިދާޅުވި އެވެ. ނަމަވެސް މި މައްސަލާގައި ފައިސާ ޖަމާކޮށްފައިވަނީ އޭސީސީގެ ނަމުގައި ބޭންކުގައި ހުޅުވާފައިވާ އެކައުންޓަކަށް ކަން ފާހަގަ ކުރައްވައި އޭނާ ވިދާޅުވީ އެ ފައިސާ ދޫކުރެވޭނީ އޭސީސީއަށް ކަމަށް އޭނާ ވިދާޅުވި އެވެ.

"އަޅުގަނޑުމެން ވެސް އެއްބަސްވަން އެކްސްކްރޯގެ ލަފުޒު އެބަ ހުރި ބޭނުންކޮށްފަ، އެންމެ ފަހަރަކު ވެސް ނޫން، މި އެއްބަސްވުމުގައި، އެކަމަކު އެކްސްކްރޯ ނަން ކިޔަސް އެފަދަ ކަމެއް މިއަކު ނެތް،" އޭނާ ވިދާޅުވި އެވެ.

"އެއީ އެކްސްކްރޯގެ މުއާމަލާތުގައި ފައިސާ ޖަމާކުރާނީ އެކްސްކްރޯ އެޖެންޓުގެ އެކައުންޓަކަށް، އެކަމަކު މި އެކައުންޓަކީ އޭސީސީގެ ނަމުގައި ހުޅުވާފައިވާ އޭސީސީގެ ބާރު ހިނގާ ގޮތަށް އޮތް އެކައުންޓެއް،" ވަކީލު ވިދާޅުވި އެވެ.

ބޭންކުން ދެކެނީ ކަސްޓަމަރެއްގެ އެކައުންޓުގައި ހިމެނޭ ފައިސާއެއް އެ ބޭންކަށް ތިންވަނަ ފަރާތަކަށް ދޫކުރެވޭނީ ކަސްޓަމަރު އެ ގޮތަށް އެންގުމުންނެވެ. އަދި އެ ކަސްޓަމަރަކާއި ތިންވަނަ ފަރާތާ ދެމެދު އެއްބަސްވުމެއް އޮތް ނަމަ އޭގެ ޒިންމާ ފުރިހަމައަށް ނަގަން ޖެހޭނީ ކަސްޓަމަރެވެ. އެހެންވެ، މި މައްސަލާގައި ފައިސާ އަނބުރާ ޔާމީނަށް ނުލިބޭނަމަ އޭގެ ޒިންމާ ނަގަން ޖެހޭނީ އޭސީސީ ކަމަށް ބޭންކުގެ ވަކީލު ވިދާޅުވި އެވެ.

ޔާމީންގެ ފަރާތުން ސިވިލް ކޯޓަށް ހުށަހެޅުއްވި މައްސަލާގައި އެދިވަޑައިގެންފައިވަނީ އެ ފައިސާ ބޭންކުން ހިފަހައްޓާފައިވަނީ އެކްސްކްރޯ އެއްބަސްވުމާ ހިލާފަށް ކަމަށް ކަނޑައަޅައިދިނުމަށާއި އޭގެ ސަބަބުން ލިބުނު ގެއްލުމަށް އަދުލުވެރި ބަދަލެއްގެ ގޮތުގައި އެ ފައިސާއާއެކު، އެ ފައިސާ އިންވެސްޓްމަންޓް އެކައުންޓުގައި ބެހެއްޓިނަމަ ޔާމީނަށް ލިބިވަޑައިގަންނަވާނެ ކަމަށް އަންދާޒާ ކުރެވޭ އަދަދުގެ ފައިސާ ދިނުމަށް އެންގުމަށެވެ.

ޔާމީނުގެ ވެރިކަމުގައި މި އެއްބަސްވުން އެކުލަވާލީ، ޔާމީނުގެ އެކައުންޓަށް ޖަމާކޮށްފައިވާ އެއް މިލިއަން ޑޮލަރަކީ އޭރު ހިނގި އެމްއެމްޕީއާރުސީގެ ބޮޑު ހިޔާނާތުގެ މައްސަލާގައި ހިމެނޭ ފައިސާއެއް ކަމަށް ބެލެވޭތީ އެ ކަން ސާފު ކުރެވެން ދެން ޝައްކު ކުރެވޭ ފައިސާ ބޭނުން ނުކޮށް ހިފަހައްޓާފައި ބޭއްވުމުގެ ބޭނުމުގަ އެވެ.

ކުރީގެ ރިޔާސީ ދައުރުގައި ޔާމީނަށް 11 އަހަރުގެ ޖަލު ހުކުމެއް އިއްވީ އެ ހިޔާނާތުގައި ހިމެނޭ ކަމަށް ބުނާ ވ. އާރަށް ކުއްޔަށް ދޫކުރުމުގައި ޔާމީން ރިޝްވަތު ނެންގެވި ކަމަށް ބުނާ މައްސަލާގަ އެވެ. އެ މައްސަލަ ކްރިމިނަލް ކޯޓުން އަލުން ބެލުމަށް ހައި ކޯޓުން ހުކުމް ކޮށްފައިވެ އެވެ.

ރ. ފުއްގިރި ކުއްޔަށް ދޫކުރުމުގައި ހިނގި ކަމަށް ބުނާ ހިޔާނާތުގެ މައްސަލާގައި ވެސް ޔާމީނުގެ މައްޗަށް ދައުވާކޮށްފައިވެ އެވެ. އެ މައްސަލަ ވެސް ދަށު ކޯޓުގައި އަދި ނުނިމެ އެވެ. ކްރިމިނަލް ކޯޓުގެ ޖާގައިގެ މައްސަލަ ބޮޑުއިރު، މި ފަހުން އެ މައްސަލައިގެ އަޑުއެހުމެއް ވެސް ނުބާއްވަ އެވެ. ހުޅުމާލޭން ކްރިމިނަލް ކޯޓަށް އިމާރާތެއް މި ފަހުން ހަމަޖެއްސި އިރު އޭގެ ފަހުން ވެސް މި މައްސަލައިގެ އަޑުއެހުމެއް ނުބާއްވަ އެވެ.