ޕޮލިސް ކްލަބް 3-1 ސެޓުން ބަލިކޮށް، ކްލަބް ވެމްކޯ އިން ޖެހިޖެހިގެން ހަތަރު ވަނަ ފަހަރަށް ވޮލީބޯލް އެސޯސިއޭޝަން (ވީއޭއެމް) ކަޕްގެ އަންހެން ޑިވިޝަންގެ ތަށި އުފުލާލައިފި އެވެ.

ހަތަރު ފައިނަލުގައި ވެސް ވެމްކޯ އިން ބަލިކުރީ ޕޮލިސް ޓީމެވެ. އެ ގޮތުން، 2019 ވަނަ އަހަރުގެ ފައިނަލުގައި ވެމްކޯ އިން ޕޮލިސް ބަލިކުރީ 3-1 ސެޓުންނެވެ. އޭގެ ފަހުން، މިދިޔަ ދެ އަހަރު (2022 އާއި 2023 ގައި) ކުޅުނު ދެ ފައިނަލުން ވެސް ވެމްކޯ މޮޅުވީ ސީދާ ތިން ސެޓުންނެވެ. މި ފަހަރުގެ ފައިނަލުގައި ޕޮލިހުން ވަނީ ކުޅުން ރަނގަޅުކޮށް، ޖުމްލަކޮށް ވެމްކޯ އަށް އެކަށީގެންވާ ފައިޓެއް ދީފަ އެވެ.

މެޗުގެ ސެޓުތައް ދިޔައީ، 25-19، 25-23، 13-25 އަދި 25-21 އިންނެވެ.

ޒުވާނުންގެ މަރުކަޒު އެތެރެ ކޯޓުގައި މިރޭ ކުޅުނު މެޗުގެ ފުރަތަމަ ސެޓު ފަށައިގެން، ވެމްކޯ އިން 6-0 އިން ލީޑެއް ނެގުމާ އެކު، ޕޮލިހުގެ ކޯޗު ފަތުހުﷲ ވަހީދު (ފައްލޯ) ވަނީ ޓައިމް-އައުޓެއް ނަގައި، ޓީމުގެ މައްސަލަތައް ހައްލުުުކުރަން މަސައްކަތް ކޮށްފަ އެވެ. އޭގެ ނަތީޖާ ރަނގަޅަށް ފެނި، ޕޮލިހުން ވަނީ 12-12 އިން އެއްވަރުކޮށް، ފަހުން އެއް ޕޮއިންޓުގެ ލީޑެއް ވެސް ނަގައިފަ އެވެ. އެކަމަކު، ފަހުން 17-17 އިން އެއްވަރުވެ، އޭގެ ފަހުން، ވެމްކޯ އިން ރަނގަޅު ލީޑެއްގައި އޮވެގެން، ސެޓު ކާމިޔާބުކުރީ، 25-19 އިންނެވެ.

ފުރަަތަމަ ސެޓުގައި، ވެމްކޯގެ އައިމިނަތު އަރީޝާ އާއި އައިޝަތު މާޖިދާ (މާޖީ) އަދި ޖޫޒާން ޒަރީރް ވަނީ މުހިންމު ވަގުތުގައި މޮޅު ކުޅުމެއް ދައްކައިފަ އެވެ. ވެމްކޯގެ ކުޅުންތެރިން ޓީމެއްގެ ގޮތުގައި ރަނގަޅަށް މަސައްކަތްކޮށް ދެ ވަނަ ސެޓު ވެސް ކޮންޓްރޯލް ނަގައިގެން ކުޅެ، މި ސެޓު، 25-23 އިން ކާމިޔާބުކޮށް މެޗު ކާމިޔާބު ކުރުމުގެ އުންމީދު ބޮޑުކުރި އެވެ.

މިރޭގެ މެޗުގެ ތެރެއިން، ވެމްކޯ ޓީމުގެ އަރީޝާ ބޯޅަ ފޮނުވާލަނީ.--- ފޮޓޯ: އަތޫފް އާތިފް / އަދަދު

އެކަަމަކު، ދެ ވަނަ ސެޓުގެ ފަހުކޮޅުގައި، ވެމްކޯގެ ކުޅުންތެރިންގެ ފަރާތުން ފަރުވާ ކުޑަކޮށްުލުމުގެ ކަންތައްތަކެއް ޑިފެންސްގައި ފާހަަގަވެ، އޭގެ އަސަރު ތިން ވަނަ ސެޓުގައި އެ ޓީމަށް ވަރަށް ބޮޑަށް ކުރި އެވެ. އޭގެ ފައިދާ ޕޮލިހުން ވަރަށް ރަނގަޅަށް ނެގި އެވެ. ޕޮލިހުގެ ކެޕްޓަން، ހައްވާ ރާޝިދާ (ހައްވަ) އާއި އެޓޭކަރު، ޝަހާ ޝާމިން ރަނގަޅު ކުޅުމެއް ދައްކައި، މި ސެޓުގައި، ޕޮލިހުންނަށް ކާމިޔާބު ހޯދައިދިނެވެ. ޕޮލިހުގެ ލިބަރޯ އަކަށް އެރި މާސާ ފާރޫގް ވަނީ އެ ޓީމަށް މޮޅު ކުޅުމެއް ދައްކައިފަ އެވެ. އޭނާގެ ވެސް މަސައްކަތާ އެކު، ޕޮލިހުން މި ސެޓު، 13-25 އިން ކާމިޔާބުކުރި އެވެ.

ހަތަރު ވަނަ ސެޓު ފަށައިގެން ވެސް ޕޮލިހުގެ ކޮންފިޑެންސް ފެނުނީ ވަރަށް ރަނގަޅަށެވެ. އެ ޓީމުގެ ޑިފެންސް ވަރަށް ރަނގަޅަށް ފެނުނުއިރު، 10-14 އިން ކުރީގައި އޮއްވައި، ވެމްކޯގެ ކޯޗު އަހުމަދު އަދީލް (ބޭބެ) ވަނީ ޓައިމްއައުޓެއް ނަގައިފަ އެވެ.

ޓައިމް އައުޓަށް ފަހު ކުޅެން އަރައި، ވެމްކޯ އިން ނަތީޖާ އަނބުރާލި އެވެ. އެއީ 15-14 އިންނެވެ. ނަތީޖާ އަނބުރާލުމުގައި އެ ޓީމުގެ މާޖިދާ ރަނގަޅު ކުޅުމެއް ދެއްކި އެވެ. އެކަަމަކު، ޕޮލިހުން އަނެއްކާ ވެސް މަސައްކަތް ރަނގަޅުކޮށް، 15-16 އިން ލީޑެއް ނެގި އެވެ. އޭގެ ފަހުން، ދެން ވެސް، ފެނިގެންދިޔައީ، ދެ ޓީމަށް ލީޑުގައި އޮވެ، ރަނގަޅަށް މަސައްކަތް ނުކުރެވިދާތަނެވެ.

ވެމްކޯގެ ސެޓަރު ޖޫޒާން ޕޮއިންޓެއް ހޯދުމަށް ފަހު އުފާފާޅުކުރަނީ.--- ފޮޓޯ: އަތޫފް އާތިފް / އަދަދު

ސެޓުގެ މެދަކާ ހަމައިން ފެށިގެން، ވަރަށް ހަމަހަމަކޮށް، ދެ ޓީމަށް ޕޮއިންޓް ލިބެމުންދިޔައިރު، ވެމްކޯ އިން ވަނީ 22-20 އިން ލީޑެއް ނަގައި، ހަަމަޖެހުމެއް ހޯދައިފަ އެވެ. އެއާ އެކު، ޕޮލިހުން ވަނީ ޓައިމް-އައުޓެއް ނަގައިފަ އެވެ. އެކަމަކު، ޓައިމްއައުޓަށް ފަހު ވެސް ވެމްކޯ ކުރީގެ ވަރުގަދަ ކުޅުން ދަމަހައްޓައި، 25-21 އިން ސެޓު ގެންގޮސްގެން، މެޗުން މޮޅުވި އެވެ. މި ސެޓުގެ ފަހު ކޮޅުގައި، ވެމްކޯގެ ޒުވާން ކުޅުންތެރިޔާ، މާޔާ ހުސެއިން ވަނީ މޮޅު ކުޅުމެއް ދައްކައިފަ އެވެ.

ފައިނަލް މެޗުގެ މޮޅު ކުޅުންތެރިއަކީ ވެމްކޯގެ މާޖިދާ އެވެ.

ވެމްކޯގެ ކޯޗު އަދީލް ބުނީ ޖުމްލަކޮށް ބަލާއިރު އެ ޓީމުން ވަރުބަލިކަން އިހުސާސް ކުރެވުނު ވަގުތުތަކެއް ދިއުމުން ޕޮލިހަށް މެޗުގެ ތެރެއަށް ވަންނަން ފުރުސަތު ލިބުނަސް، ވެމްކޯ އިން ދެއްކީ ޗެމްޕިއަންކަން ހައްގުވާ ވަރުގެ ކުޅުމެއް ކަމަށެވެ.

ޕޮލިސް ޓީމުގެ ކޯޗު ފައްލޯ ބުނީ ވެމްކޯ އަކީ ވަރުގަދަ ޓީމެއް ކަން އެނގޭ ކަަމަށާއި އަދި އެއްކޮށް ގިނަ މުބާރާތްތަކެއް ކުޅެފައި ތިބި ކުުޅުންތެރިންތަކެއް ތިބުމުން އެ ޓީމަށް އޭގެ ފައިދާތަކެއް ފެނިގެންދިޔަ ކަމަށެެވެ. އަދި އެ ލެވަލްގެ ޓީމަކާ ދެކޮޅަށް ކުޅެވޭ ވަރަށް އެއްކޮށް، ޕޮލިސް ޓީމަށް ޕްރެކްޓިސް ނުކުރެވުމުން، އޭގެ އުނދަގޫތަކެއް ކުރިމަތިވި ކަމަށް ފައްލޯ ފާހަގަކުރި އެވެ.

ޑްރީމް ޓީމުގައި ހިމެނެނީ، ވެމްކޯގެ މާޖިދާ، ޕޮލިހުގެ ހައްވަ، ޕޮލިހުގެ މަރިޔަމް އަޒުމާ، ވޮލީބޯލް ޔޫތު ނިއުޖެނެރޭޝަންގެ އައިމިނަތު ރިޔާޝާ، ވެމްކޯގެ ޖޫޒާން، ވެމްކޯގެ މާޔާ، ވެމްކޯގެ ފައިހާ މުހައްމަދު އެވެ. އެންމެ އުންމީދީ ކުޅުންތެރިއަކަށް، ޕޮލިހުގެ މާސާ ހޮވުނުއިރު، އެންމެ މޮޅު ކޯޗަކީ ވެމްކޯގެ ކޯޗު އަދީލް އެވެ. އަދި މުބާރާތުގެ އެންމެ މޮޅު ކުޅުންތެރިއަކީ، މިދިޔަ ދެ އަހަރުގެ މުބާރާތުގެ ވެސް އެންމެ މޮޅު ކުޅުންތެރިޔާ، ވެމްކޯގެ މާޖިދާ އެވެ.