ރާއްޖޭގައި އުޅޭ ޓެރަރިސްޓު ހަރަކާތްތައް ހިންގާ މީހުން، ޓެކްނޮލޮޖީގެ އެހީގައި އެކަމަށް ޒުވާނުން ލަންބަމުން ދާ ކަމަށް ޑިފެންސް މިނިސްޓަރު ގައްސާން މައުމޫން މިއަދު ވިދާޅުވެއްޖެ އެވެ.

ރާއްޖޭގައި ޓެރަރިސްޓު ވިސްނުމުގައި އުޅޭ މީހުން ދުވަހަކަށް ވުރެ ދުވަހެއް އިތުރުވަމުންދާ ކަމަށް މިދިޔަ ސަރުކާރުން އަދި މި ސަރުކާރުން ވެސް ބުނެފައިވެ އެވެ. އަދި އެކަން ހުއްޓުވަން ސަރުކާރުތަކުން އިސްކަން ދީގެން މަސައްކަތްތަކެއް ވެސް އަންނަނީ ކުރަމުންނެވެ.

ނޭޝަނަލް ހައިލެވެލް ކޮންފަރެންސް އޮން ޕީސް އެންޑް ސެކިޔުރިޓީގައި ފެށުމުގެ ރަސްމިއްޔާތުގައި ގައްސާން ވިދާޅުވީ އެފަދަ ފިކުރުތަކަށް އާ މީހުން ލެންބުމުގެ މަސައްކަތް ކުރާ މީހުން އޫޅޭ ކަމަށާއި އަތޮޅު ތެރޭގެ އިތުރުން މާލޭގައި އެފަދަ ހަމަލާތައް ވެސް ދީފައިވާ ކަމަށެވެ.

"މިފަހަކަށް އައިސް ރައްޔިތުން އާންމު ހާލަތުގައި ބޭނުންކުރާ ޓެކްނޮލޮޖީއާއި ވަސީލަތްތަކާއި ޕްލެޓްފޯމްތައް ބޭނުންކޮށްގެން އާ މީހުން މިފަދަ ނުރައްކާތެރި ހަރަކާތްތަކުގެ ތެރެއަށް އިންޑަކްޓް ކުރުމުގެ މަސައްކަތްތައް ހިންގަން ފަށައިފިކަން ވަރަށް ބޮޑަށް ފާހަގަވޭ. ހިތާމައަކީ މިފަދަ ޓެކްނޮލޮޖިކަލް ޕްލެޓްފޯމްތައް ބޭނުންކުރުމުން އެކަމުގެ ޝިކާރައަކަށް ވެގެންދާނީ އެންމެ ގިނައިން އަޅުގަނޑުމެންގެ ލޮބުވެތި ޒުވާނުން ކަމަށްވާތީ،" އޭނާ ވިދާޅުވި އެވެ.

ގައުމަށް ޒުވާނުންގެ ޝާމިލުވުން އެންމެ މުހިންމު ދަނޑިވަޅުގައި ޓެކްނޮލޮޖީގެ ޕްލެޓްފޯމުތަކުގެ ފަހަތުގައި ބަޔަކު ފިލާ ތިބެގެން، އެ ޒުވާނުންގެ ސިކުނޑިއަށް ފޯރުކޮށްދެނީ ގައުމަށް ގެއްލުންވާ ފިކުރުތައް ކަމަށް ގައްސާން ވިދާޅުވި އެވެ.

ޓެކްނޮލޮޖިކަލް ޕްލެޓްފޯމްތައް ބޭނުންކުރުމުގެ ސަބަބުން އެފަދަ ކަންކަން ހުއްޓުވުމަށް ވަރަށް ބޮޑެތި ގޮންޖެހުންތައް ކުރިމަތިވާކަން ފާހަގަކުރައްވާ އޭނާ އިތުރަށް ވިދާޅުވީ އެފަދަ ނޭދެވޭ އޮއެވަރުތައް ގައުމުގައި ދެމެން ފެށުމަކީ ގައުމީ ސަލާމަތަށް ނުރައްކާކުރާ ހައްސާސް މައްސަލައެއް ކަމަށެވެ.

އެގޮތުން، ޓެރަރިޒަމުގެ ނުރައްކާތެރި ވަބާއިން ރާއްޖެ ސަލާމަތް ކުރުމަށް ދައުުލަތުގެ ތިން ބާރާއި، އިދާރާތަކާއި، އަމިއްލަ ޖަމިއްޔާ ޖަމާއަތްތަކާއެކު އެކަތިގަނޑެއްހެން މަސައްކަތް ކުރުން މުހިންމު ކަމަށް ގައްސާން ވިދާޅުވި އެވެ.