ސަރުކާރުގެ ސްކޮލަޝިޕްތަކާއި ސްޓޫޑެންޓް ލޯނުގައި ބޭރުން ކިޔަވާ ދަރިވަރުންނަށް ފައިސާ ދިނުން ލަސްވާތީ ރައްޔިތުންގެ މަޖިލީހަށް މިއަދު ހުށަހެޅި ކުއްލި މައްސަލަ މަޖިލީހަށް ބަލައި ނުގަނެ ބޭރުކޮށްލައިފި އެވެ.

ރައްޔިތުންގެ މަޖިލީހުގެ މިއަދުގެ ޖަލްސާއަށް ހިތަދޫ ދެކުނު ދާއިރާގެ އެމްޑީޕީ މެންބަރު އިބްރާހީމް ނާޒިލު ހުށަހެޅުއްވި ކުއްލި މައްސަލާގައި ވިދާޅުވީ ދަރިވަރުންނަށް ދޭން ޖެހޭ ފައިސާ ނުލިބި ލަސްވާތީ ބައެއް ޔުނިވާސިޓީތަކަށް ދައްކަން ޖެހޭ ފައިސާ ދެއްކުމުގައި ދަތިތަކާ ކުރިމަތިވެފައިވާ ކަމަށެެވެ. އެ ދަރިވަރުން ދިރިއުޅޭ ތަންތަން ހުސްކުރަން ޖެހި، މަގުމަތިވެދާނެ ކަމުގެ ބިރު ހީވެފައިވާ ކަމަށް ވެސް ކުއްލި މައްސަލާގައި އޭނާ ވިދާޅުވި އެވެ.

"އެކުދިން މަގުމަތިވުމުގެ ބިރު ހީވެފައިވާތީއާއި އަދި އާއިލާއާ ދުރުގައި އާއިލާއާ ދުރުގައި ރާއްޖޭން ބޭރުގައި އެކުދިން ދިރިއުޅެމުންދާ އިރު އެކުދިން ދުވަހުން ދުވަހަށް ކުރަން ޖެހޭ ހަރަދުތައް ވެސް ނުކުރެވި، އެކި ފަރާތްތަކުގެ އެހީތެރިކަމަށް އެދި ސަލާން ޖަހަން ޖެހޭ ހާލަތަށް ބައެއް ކުދިންނާއި އެކުދިންގެ އާއިލާ ގޮސްފައިވާތީ އާއި ރައީސް ޑރ. [މުހައްމަދު] މުއިއްޒުގެ ސަރުކާރުން ދައުލަތުގެ ތިޖޫރީ ހުސްކުރަނީ ސަރުކާރުގެ ވެރިންނަށް ގެކޮޅުތަކާއި އޮފީސްތައް ޒީނަތްތެރިކުރުމާއި ޑޮލަރު ހަރަދުކޮށްގެން ބޮޑެތި ވަފުދުތައް ހަދައިގެން ރާއްޖޭން ބޭރަށް ދަތުރުކުރުމަށާއި ސިޔާސީ މުވައްޒަފުން ފައުޖުފައުޖަށް އައްޔަންކޮށް އެމީހުންނަށް މުސާރަދިނުމަށް [ކަމަށްވާތީ މި ކުއްލި މައްސަލަ ހުށަހަޅަން]،" ކުއްލި މައްސަލަ ހުށަހަޅުއްވަމުން ނާޒިލު ވިދާޅުވި އެވެ.

އެ މައްސަލަ މަޖިލީހަށް ބަލައިގަނެ ބަހުސްކުރުމާ މެދު ގޮތެއް ނިންމަން މިއަދުގެ ޖަލްސާގައި ނެގި ވޯޓުގައި ބައިވެރިވެވަޑަައިގެންނެވި 71 މެންބަރުންގެ ތެރެއިން 59 މެންބަރުން ވޯޓު ދެއްވީ އެ މައްސަލަ ބަލައިގަންނަން ނުފެންނަ ކަމަށެވެ. މައްސަލަ ބަލައިގަންނަން ފެންނަ ކަމަށް ވޯޓު ދެއްވީ އެންމެ 12 މެންބަރުންނެވެ.

"އަދަދު" އަށް އެނގިފައިވާ ގޮތުގައި މިދިޔަ ޖޫން މަހުން ފެށިގެން ހަޔާ އެޑިއުކޭޝަނުން ބައެއް ދަރިވަރުންނަށް ފައިސާ ފޮނުވުން ވަނީ ހުއްޓާލައިފަ އެވެ. އެ ފައިސާ ޖަމާނުވާތީ ދަރިވަރުންނަށް ބޮޑެތި އުނދަގޫތައް ކުރިމަތިވެ، ކޯސްފީ އާއި ގޭގެ ކުލި އަދި ދުވަހުން ދުވަހަށް ކުރަން ޖެހޭ ހަރަދުތައް ވެސް ނުކުރެވޭކަން ވަނީ އެނގިފަ އެވެ.

"ފައިސާއަށް އެޕްލައި ކުރިތާ މިހާރު ތިން ހަފްތާވަރު ވެއްޖެ. މިނިސްޓްރީން މިހާތަނަށް އެއްވެސް ޖަވާބެއް ދީފައެއް ނުވޭ. ރެންޓާއި އެއްޗެހި ދެއްކޭނެ ގޮތެއް ނެތް. ސެމް ފީ ނުދައްކައިފިނަމަ އެ ސެމްއެއް ޑިފާ ކުރަންޖެހޭނީ. އޭރަށް އަނެއްކާވެސް ދުވަސްތަކެއް ގެއްލިގެންދާނީ،" ނޫހުގައި ނަން ނުޖެހުމަށް އެދި އޮސްޓްރޭލިއާގައި ކިޔަވާ ދަރިވަރަކު ބުންޏެވެ.

މި ނޫހަށް އެނގިފައިވާ ގޮތުގައި ރައީސުލްޖުމްހޫރިއްޔާގެ ސްކޮލާޝިޕްގައި ކިޔަވަމުންދާ ބައެއް ދަރިވަރުންނަށް ވެސް ސަރުކާރުން ފައިސާ ޖަމާ ނުކޮށްދެ އެވެ.

"ފައިސާ ނުލިބިގެން ކޮންމެވެސް މީހެއް އަތުން މި ޖެހެނީ ފައިސާ ނަގަން. އެބަ އުޅޭ ބައެއް ކުދިން ރެންޓު ނުދެއްކިގެން ގެއިން ނިކުންނަން ޖެހޭ ހިސާބުގައި ވެސް. އަލުން ތަނެއް ހޯދަން ވެސް ވަރަށް އުނދަގޫވާނެ،" ރައީސްގެ ސްކޮލާޝިޕެއްގައި ކިޔަވާ ކުއްޖަކު ބުންޏެވެ.

އެކަމާ ގުޅޭ ގޮތުން ހަޔާ އެޑިއުކޭޝަން މިނިސްޓަރު ޑރ. މަރިޔަމް މާރިޔާ މި ނޫހާ ވާހަކަ ދައްކަވަމުން ވިދާޅުވީ ޑޮލަރުގެ ތާށިކަމާހެދި ކުދިންނަށް ފައިސާ ޖަމާ ކުރުމުގައި ލަސްތަކެއް އެބަ ހުރި ކަމަށާއި ނަމަވެސް ވީ އެންމެ އަވަހަށް ފައިސާ ޖަމާ ކުރުމަށް ފިނޭންސް މިނިސްޓްރީއާ ގުޅިގެން މަސައްކަތް ކުރަމުންދާ ކަމަށެވެ.